MHADA Pune Lottery 2026 : पुणेकरांसाठी मोठी संधी! म्हाडाच्या ७९२ घरांची सोडत जाहीर; जाणून घ्या संपू्र्ण अर्जप्रक्रिया

MHADA Pune Lottery 2026 : म्हाडा पुणे मंडळाकडून ताथवडे येथे ७९२ घरांची सोडत जाहीर करण्यात आली आहे. अर्ज प्रक्रिया २७ एप्रिलपासून सुरू होऊन २ जूनपर्यंत चालणार आहे. ८ जुलै रोजी ऑनलाइन सोडत जाहीर होणार असून, LIG आणि MIG गटासाठी घरे उपलब्ध आहेत.

MHADA Pune Lottery 2026 : पुण्यात स्वतःचे घर घेण्याचे स्वप्न पाहणाऱ्यांसाठी आनंदाची बातमी आहे. पिंपरी-चिंचवडजवळील ताथवडे येथे म्हाडा पुणे मंडळाने ७९२ घरांच्या सोडतीची घोषणा केली असून, ८ जुलै २०२६ रोजी ही सोडत काढण्यात येणार आहे. यासाठी अर्ज प्रक्रियेला २७ एप्रिलपासून सुरुवात होत असून, नागरिकांना घर खरेदीची मोठी संधी उपलब्ध झाली आहे.

ताथवडे प्रकल्पाचा अंतिम टप्पा

म्हाडाने काही वर्षांपूर्वी ताथवडे येथे गृहनिर्माण प्रकल्प सुरू केला होता. दोन टप्प्यांत उभारण्यात आलेल्या या प्रकल्पातील पहिल्या टप्प्यातील ६०० हून अधिक घरांची विक्री आधीच पूर्ण झाली आहे. आता दुसऱ्या आणि अंतिम टप्प्यातील ७९२ घरांची सोडत जाहीर करण्यात आली आहे. या घरांचे बांधकाम पुढील चार महिन्यांत पूर्ण होणार असल्याने जुलैमध्ये सोडत काढण्याचा निर्णय घेण्यात आला आहे.

घरांची किंमत आणि गटानुसार तपशील

या सोडतीत अल्प उत्पन्न गटासाठी (LIG) २४ घरे राखीव ठेवण्यात आली असून, त्यांची किंमत सुमारे ४६ ते ४७ लाख रुपये आहे. या घरांचे क्षेत्रफळ ५९ ते ६० चौ.मीटर दरम्यान आहे. तर, उर्वरित ७६८ घरे मध्यम उत्पन्न गटासाठी (MIG) असून, त्यांची किंमत ६४.५ लाख ते ६५.५ लाख रुपयांदरम्यान आहे. या घरांचे क्षेत्रफळ ६९ ते ७० चौ.मीटर आहे.

अर्ज प्रक्रिया आणि महत्त्वाच्या तारखा

या सोडतीसाठी २७ एप्रिलपासून ऑनलाइन अर्ज प्रक्रिया सुरू झाली आहे. इच्छुक नागरिक २ जूनपर्यंत अर्ज सादर करू शकतात.

•  LIG गटासाठी अनामत रक्कम: ₹५०,०००
• MIG गटासाठी अनामत रक्कम: ₹७५,०००
• अर्ज शुल्क: ₹७०८ (विनापरतावा)

३० जून रोजी पात्र अर्जांची यादी जाहीर होईल आणि ८ जुलै रोजी दुपारी १२ वाजता सोडत ऑनलाइन जाहीर केली जाईल.

लोकेशनचा मोठा फायदा

ताथवडे हे पुणे-मुंबई द्रुतगती महामार्ग आणि मुंबई-बंगळुरू महामार्गाजवळ असल्याने या प्रकल्पाचे स्थान अत्यंत महत्त्वाचे मानले जाते. शहराशी उत्तम कनेक्टिव्हिटी आणि विकसित होत असलेला परिसर यामुळे हा प्रकल्प घर खरेदीसाठी आकर्षक ठरत आहे.

पुण्यातील इतर म्हाडा प्रकल्प

ताथवडेसह म्हाडा पुणे मंडळाने वाकड, चिखली, लोहगाव, मुंढवा, येवलेवाडी, वाघोली, किवळे, फुरसुंगी, डुडुळगाव, पिसोळी, बालेवाडी, हडपसर आणि पुनावळे या भागांमध्येही गृहनिर्माण योजना राबवल्या आहेत.

म्हाडा फ्लॅटसाठी अर्ज कसा कराल?

म्हाडा फ्लॅटसाठी अर्ज करण्याची प्रक्रिया पूर्णपणे ऑनलाइन आहे.

1. अधिकृत वेबसाईटवर नोंदणी करा

2. लॉगिन करून योग्य योजना निवडा

3. उत्पन्न गटानुसार अर्ज भरा

4. आवश्यक कागदपत्रे अपलोड करा

5. अनामत रक्कम भरून अर्ज सबमिट करा