Maharashtra Weather Update आज महाराष्ट्रात हवामानाची विचित्र परिस्थिती निर्माण झाली आहे. अनेक जिल्ह्यांमध्ये एकाच वेळी कडक ऊन, अवकाळी पाऊस आणि वादळाचा सामना करावा लागत आहे.
भारतीय हवामान विभागाने (IMD) आज, १५ मे २०२६ रोजी, महाराष्ट्रात तीव्र उष्णता आणि अवकाळी पावसाचा अंदाज वर्तवला आहे. उत्तर मध्य महाराष्ट्र आणि मराठवाड्याच्या काही भागांमध्ये उष्णतेची लाट येण्याची शक्यता आहे. तर, दक्षिण मध्य महाराष्ट्र आणि मराठवाड्यातील जिल्ह्यांमध्ये विजांच्या कडकडाटासह वादळ, मध्यम पाऊस आणि ताशी ४०-५० किमी वेगाने वारे वाहू शकतात. या अचानक बदललेल्या हवामानामुळे नागरिकांना एकाच वेळी वाढतं तापमान आणि वादळी पावसाचा सामना करावा लागत आहे.
23
कोकण, मध्य महाराष्ट्र आणि विदर्भातील अंदाज
कोकण: आज तुरळक ठिकाणी हलका पाऊस अपेक्षित आहे. काही ठिकाणी विजांच्या कडकडाटासह वादळ आणि सोसाट्याचा वारा वाहू शकतो. तुरळक ठिकाणी उष्णतेची लाट येण्याची शक्यता आहे.
मध्य महाराष्ट्र: अनेक भागांमध्ये मेघगर्जनेसह हलका पाऊस आणि जोरदार वारे वाहण्याची शक्यता आहे. मराठवाडा: विभागाच्या काही भागांमध्ये विखुरलेला पाऊस, वादळ आणि सोसाट्याचा वारा अपेक्षित आहे. काही जिल्ह्यांमध्ये उष्णतेची लाट कायम राहू शकते.
विदर्भ: हवामान बहुतांशी कोरडे राहण्याची शक्यता आहे, तरीही तुरळक ठिकाणी विजांच्या कडकडाटासह वादळ आणि सोसाट्याचा वारा वाहू शकतो. काही ठिकाणी उष्णतेची लाट अपेक्षित आहे.
33
राज्यात सतत तापमानात वाढ
गेल्या २४ तासांत महाराष्ट्रातील अनेक शहरांमध्ये तापमानाने उच्चांक गाठला. अकोल्यात ४५.९°C, अमरावतीत ४५.८°C, जळगावमध्ये ४५.६°C आणि वर्ध्यात ४५°C तापमानाची नोंद झाली. नागपुरात तापमान ४४.२°C पर्यंत वाढले, तर छत्रपती संभाजीनगरमध्ये ४३.४°C नोंदवले गेले. पुण्यात दिवसा आकाश निरभ्र राहील, तर दुपारनंतर आणि संध्याकाळी अंशतः ढगाळ वातावरण असेल. तापमान ३७°C ते ४१°C दरम्यान राहण्याची शक्यता आहे. मुंबईत सकाळी अंशतः ढगाळ आकाश असेल आणि नंतर निरभ्र होईल. कमाल तापमान ३४°C तर किमान तापमान २८°C राहण्याचा अंदाज आहे. IMD नुसार, पुढील तीन दिवसांत महाराष्ट्रातील कमाल तापमानात २-३°C ने वाढ होऊ शकते आणि त्यानंतर हळूहळू घट होईल. पुढील ४८ तासांत अंतर्गत भागातील किमान तापमानातही किंचित वाढ अपेक्षित आहे.
