फडणवीसांनी घेतली मोदी-शाह यांची भेट; फॉर्म्युला ठरला! १४ डिसेंबरला शपथविधी?

मुख्यमंत्री देवेंद्र फडणवीस यांनी पंतप्रधान नरेंद्र मोदी आणि गृहमंत्री अमित शहा यांची भेट घेतली. मंत्रिमंडळ विस्तार आणि शपथविधी १४ डिसेंबर रोजी होण्याची शक्यता आहे. भाजपला २०, शिवसेनेला १२ आणि राष्ट्रवादीला १० मंत्रीपदे दिली जाऊ शकतात.

नवी दिल्ली: ५ डिसेंबरला महाराष्ट्रात सरकार स्थापन झाल्यानंतर ७ दिवसांनी गुरुवारी मंत्रिमंडळाबाबत निर्णय घेतला जाऊ शकतो. मुख्यमंत्री देवेंद्र फडणवीस यांनी गुरुवारी संसदेत पंतप्रधान नरेंद्र मोदी यांची भेट घेतली. बुधवारी रात्री उशिरा त्यांनी गृहमंत्री अमित शहा यांचीही भेट घेतली होती.

शहा यांच्यासोबत झालेल्या बैठकीत मंत्रिमंडळावर चर्चा झाल्याचा दावा सूत्रांनी केला आहे. बैठकीत मंत्रिमंडळाचा फॉर्म्युला ठरविण्यात आला. मंत्रिमंडळ विस्तार आणि मंत्र्यांचा शपथविधी १४ डिसेंबरला होऊ शकते. उपमुख्यमंत्री अजित पवारही दिल्लीत आहेत. शाह यांची भेट घेण्यासाठी ते संसदेतही पोहोचले आहेत. उपमुख्यमंत्री एकनाथ शिंदे दिल्लीत पोहोचले नाहीत.

महाराष्ट्र मंत्रीमंडळाचा फॉर्मुला: भाजपचे सर्वाधिक मंत्री

सूत्रांनी दिलेल्या माहितीनुसार, शहा-फडणवीस यांच्या बैठकीत मंत्रिमंडळाचा फॉर्म्युला जवळपास निश्चित झाला असून त्याला आज अंतिम मंजुरी मिळू शकते. महाराष्ट्र सरकारमधील मंत्रीपदांच्या वाटपाचे सूत्र ठरले आहे. भाजपला २०, शिवसेनेला १२ आणि राष्ट्रवादीला १० मंत्रीपदे दिली जाऊ शकतात. राज्यात मुख्यमंत्र्यांसह एकूण ४३ मंत्री असू शकतात.

गृहमंत्रालयामुळे मंत्रिमंडळ विस्तार रखडला

सूत्रांनी दिलेल्या माहितीनुसार, शिंदे सरकारमध्ये उपमुख्यमंत्री देवेंद्र फडणवीस यांच्याकडे गृहमंत्रालय होते. त्यांना हे मंत्रिपद सोडायचे नाही. दुसरीकडे आपल्याला उपमुख्यमंत्रीपद मिळत असेल तर गृहखातेही मिळायला हवे, असा शिंदे गटाचा युक्तिवाद आहे.

भाजपला गृह, महसूल, उच्च शिक्षण, कायदा, ऊर्जा, ग्रामविकास ही खाती आपल्याकडेच ठेवायची आहेत. त्यांनी शिवसेनेला आरोग्य, नगरविकास, सार्वजनिक बांधकाम, उद्योग ऑफर केले आहेत. तर राष्ट्रवादी अजित पवार गटाला अर्थ, नियोजन, सहकार, कृषी आदी खाती ऑफर केली आहेत.

मंत्रिमंडळात कोणाचा समावेश करायचा हे फडणवीस ठरवतील :  वळसे पाटील

दोन दिवसांपूर्वी फडणवीस-शिंदे-पवार यांची ९० मिनिटे बैठक झाली. या बैठकीत मंत्रिमंडळाची स्थापना, खाते वाटप, विविध जिल्ह्यांचे पालकमंत्री आणि महामंडळांच्या अध्यक्षांच्या नियुक्त्या यावर चर्चा झाली. माजी कॅबिनेट मंत्री दिलीप वळसे पाटील यांनी या बैठकीनंतर सांगितले होते की, मंत्रिमंडळात कोणाचा समावेश करायचा आणि कोणाला नाही याचा निर्णय मुख्यमंत्री फडणवीस घेतील.

आणखी वाचा-