शिंदे गटास गृह, महसूल खाते मिळणार नाही? शहांच्या घरी नड्डा, फडणवीस यांच्यात मंथन

महाराष्ट्राचे मुख्यमंत्री देवेंद्र फडणवीस आणि भाजपचे राष्ट्रीय अध्यक्ष जेपी नड्डा यांनी केंद्रीय गृहमंत्री अमित शहा यांच्याशी दिल्लीत भेट घेतली. खातेवाटपाबाबत चर्चा झाली असून, मंत्रिमंडळ विस्तार १४ डिसेंबरला होऊ शकतो.

नवी दिल्ली: महाराष्ट्राचे मुख्यमंत्री देवेंद्र फडणवीस आणि भाजपचे राष्ट्रीय अध्यक्ष जेपी नड्डा यांनी बुधवारी रात्री उशिरा केंद्रीय गृहमंत्री अमित शहा यांच्याशी त्यांच्या दिल्ली येथील निवासस्थानी भेट घेतली. महाराष्ट्र विधानसभा निवडणुकीत दणदणीत विजय मिळवून ५ डिसेंबर रोजी महायुती सरकारने सत्ता हाती घेतली. त्यानंतर भाजप, शिवसेना आणि राष्ट्रवादी यांच्यात खाते वाटपावरून सुरू असलेल्या मतभेदा दरम्यान ही बैठक झाली. अमित शहा यांच्या भेटीला उपमुख्यमंत्री एकनाथ शिंदे उपस्थित नव्हते.

सूत्रांनी दिलेल्या माहितीनुसार, महायुती सरकारमध्ये सहभागी असलेल्या पक्षांमधील खातेवाटपाबाबत देवेंद्र फडणवीस यांनी भाजपच्या वरिष्ठ नेत्यांशी चर्चा केली. भाजपच्या एका वरिष्ठ नेत्याने पीटीआय या वृत्तसंस्थेला सांगितले की, महाराष्ट्रात मंत्रिमंडळाचा विस्तार १४ डिसेंबरला होऊ शकतो. एकनाथ शिंदे यांच्या नेतृत्वाखालील शिवसेनेला गृहखाते मिळणार नाही तसेच महसूल खातेही मिळण्याची शक्यता नाही, असेही भाजपचे नेते म्हणाले.

मंत्रिमंडळाचा विस्तार १४ डिसेंबरला होऊ शकतो

नाव न सांगण्याच्या अटीवर भाजप नेत्याने सांगितले की, 'मंत्रिमंडळ विस्तार १४ डिसेंबरपर्यंत होण्याची शक्यता आहे. शिवसेनेला गृहखाते मिळणार नाही, नगरविकास मंत्रालय मिळू शकते. महसूल खाते मिळण्याची शक्यता नाही. भाजपकडे मुख्यमंत्रिपदासह २१ ते २२ मंत्रीपदे कायम राहणार असून चार ते पाच मंत्रीपदे रिक्त ठेवली जाऊ शकतात. तीन पक्ष (महायुतीतील मित्रपक्ष भाजप, शिवसेना आणि राष्ट्रवादी) सहभागी असल्याने पोर्टफोलिओ वाटपाची चर्चा लांबणीवर पडत आहे. महाराष्ट्राच्या मंत्रिमंडळात मुख्यमंत्र्यांसह जास्तीत जास्त ४३ मंत्री असू शकतात.

हिवाळी अधिवेशनापूर्वी खाते वाटप होईल- शिरसाट

शिवसेनेचे आमदार आणि प्रवक्ते संजय शिरसाट म्हणाले की, १६ डिसेंबरपासून सुरू होणाऱ्या विधानसभेच्या हिवाळी अधिवेशनापूर्वी खाते वाटप होईल, असे मुख्यमंत्री देवेंद्र फडणवीस यांनी स्पष्ट केले आहे. तत्पूर्वी, त्यांच्या दिल्ली दौऱ्याबद्दल विचारले असता, देवेंद्र फडणवीस यांनी माध्यमांना सांगितले की, मुख्यमंत्री झाल्यानंतर मी भाजपच्या वरिष्ठ नेत्यांची भेट घेण्यासाठी दिल्लीला जात आहे. त्यांनी राष्ट्रपती द्रौपदी मुर्मू आणि राज्यसभा सभापती जगदीप धनकड यांची भेट घेतली.

महाराष्ट्रात २० नोव्हेंबर रोजी झालेल्या विधानसभा निवडणुकीत महायुतीने २८८ पैकी २३० जागा जिंकून प्रचंड बहुमत मिळवले. देवेंद्र फडणवीस यांनी ५ डिसेंबरला मुख्यमंत्रीपदाची शपथ घेतली. एकनाथ शिंदे आणि अजित पवार यांनी उपमुख्यमंत्री पदाची शपथ घेतली. दरम्यान, देवेंद्र फडणवीस यांनी मुख्यमंत्री सहाय्यता कक्ष प्रमुख पदी रामेश्वर नाईक यांची नियुक्ती केली आहे. नाईक यांनी एकनाथ शिंदे यांच्या जवळचे मानले जाणाऱ्या मंगेश चिवटे यांची जागा घेतली.

रामेश्वर नाईक बनले मुख्यमंत्री सहाय्यता निधीचे नवे प्रमुख 

जून २०२२ मध्ये शिंदे मुख्यमंत्री झाल्यानंतर मंगेश चिवटे यांना हे पद देण्यात आले होते. फडणवीस उपमुख्यमंत्री असताना रामेश्वर नाईक हे यापूर्वी उपमुख्यमंत्र्यांच्या वैद्यकीय सहाय्यता कक्षाचे प्रमुख होते. मुख्यमंत्री सहाय्यता निधी नैसर्गिक आपत्तीमुळे बाधित झालेल्या कुटुंबांना आणि व्यक्तींना, अपघातात प्राण गमावणाऱ्यांचे कुटुंबे आणि नातेवाईकांना किंवा मोठ्या आजारांवर उपचार घेत असलेल्या रुग्णांना मदत पुरवतो.

नवीन मंत्रिमंडळात शिवसेनेच्या तीन माजी मंत्र्यांना पुन्हा संधी नाही?

खाते वाटपाच्या दरम्यान, शिवसेनेचे एक नेता म्हणाले की, पक्ष नवीन मंत्रिमंडळात तीन माजी मंत्र्यांना संधी देणार नाही. मंत्री म्हणून त्यांची कामगिरी चांगली नसून ते लोकांपर्यंत पोहोचत नव्हते, असे त्यामागचे कारण सांगितले जात आहे. त्यांच्या जागी पक्ष नव्या चेहऱ्यांना संधी देऊ शकतो. एकनाथ शिंदे यांच्या निकटवर्तीय शिवसेनेच्या आमदाराने पीटीआयला सांगितले की, या वेळी ज्या तीन माजी मंत्र्यांचा मंत्रिमंडळात समावेश न करण्याचा निर्णय घेण्यात आला आहे ते कोकण, पश्चिम महाराष्ट्र आणि मराठवाड्यातील आहेत. यापूर्वीच्या महायुती सरकारच्या काळात या तीन मंत्र्यांपर्यंत पोहोचणे सोपे नव्हते अशी तक्रार पक्षाच्या अनेक आमदारांनी केली होती.

आणखी वाचा-