"एकतर्फी प्रेमाचं विकृत रूप : तरुणाकडून पीडितेवर जबरदस्ती करून खंडणीची मागणी

पुण्यात एकतर्फी प्रेमातून एका तरुणाने तरुणीला शारीरिक संबंध ठेवण्यास भाग पाडले, ५० लाखांची खंडणी मागितली, जबरदस्तीने लग्न लावले आणि नग्न फोटो वडिलांना पाठवण्याची धमकी दिली. कोंढवा पोलिसांनी आरोपीविरुद्ध गुन्हा दाखल केला आहे.

पुणे | प्रतिनिधी एकतर्फी प्रेमाच्या आडून विकृत हेतूने तगादा लावणाऱ्या तरुणाने तरुणीचे आयुष्य उद्ध्वस्त करण्याचा प्रयत्न केल्याचा धक्कादायक प्रकार पुण्यात समोर आला आहे. कोंढवा परिसरात घडलेल्या या घटनेने परिसरात खळबळ उडाली आहे. जबरदस्तीने शारीरिक संबंध, ५० लाख रुपयांची मागणी, मारहाण, जबरदस्तीचं लग्न, आणि शेवटी नग्न फोटो काढून वडिलांना पाठवण्याची धमकी — या साऱ्या घटना पीडितेच्या आयुष्यावर घाव घालणाऱ्या ठरल्या आहेत.

आरोपी ओळखीचा, पण हेतू घातकी रोहित कांबळे (वय २४, रा. भारतीय विद्यापीठ) या तरुणावर कोंढवा पोलीस ठाण्यात गुन्हा दाखल करण्यात आला आहे. पीडित तरुणी आणि आरोपी पूर्वीपासून एकमेकांच्या ओळखीचे होते. मात्र ओळखीच्या आड लपलेल्या विकृतीने गंभीर स्वरूप घेत, तिच्यावर जबरदस्तीने शारीरिक संबंध ठेवण्यात आले आणि ५० लाखांची खंडणी मागण्यात आली.

धमकी, मारहाण आणि ‘फोर्सड मॅरेज’ रक्कम न मिळाल्याने आरोपीने पीडितेला शिवीगाळ करत मारहाण केली. इतकंच नाही, तर तिला गाडीत बसवून मंदिरात नेले आणि जबरदस्ती लग्न लावलं. तरीही पीडिता आरोपीसोबत राहण्यास नकार देत होती. त्यामुळे संतप्त आरोपीने तिचे नग्न फोटो काढले आणि थेट तिच्या वडिलांना पाठवले. यानंतर पुन्हा एकदा जीवे मारण्याची धमकीही दिली गेली.

वर्षभर चाललेला मानसिक छळ 

अखेर उघड हा सारा प्रकार गेल्या वर्षभरापासून सुरू असल्याची माहिती पोलिसांनी दिली. पीडिता दीर्घकाळ मानसिक छळ सहन करत होती. अखेर तिने कोंढवा पोलीस ठाण्यात धाडसाने तक्रार दाखल केली. पोलिसांनी संबंधित कलमांखाली गुन्हा दाखल करून तपासाला सुरुवात केली आहे.

एकतर्फी प्रेम 

समाजासाठी धोक्याचा इशारा या प्रकारामुळे एकतर्फी प्रेमाचे अतिरेकी व विकृत रूप पुन्हा एकदा समोर आले आहे. महिला सुरक्षिततेच्या दृष्टीने ही घटना गंभीर असून, समाजाने अशा प्रकारांबाबत सजग राहण्याची गरज अधोरेखित झाली आहे. पोलिसांकडून आरोपीला लवकरात लवकर अटक होण्याची शक्यता असून, तपास सुरू आहे. संपर्कात असलेल्या ओळखीही धोका ठरू शकतात – महिलांनी सतर्क राहावं, असा इशाराही या घटनेतून पुढे येतो आहे.