Chef Hat : शेफ नेहमी पांढरी टोपी का घालतात? जाणून घ्या यामागचं खरं कारण

मोठ्या रेस्टॉरंटमध्ये काम करताना शेफ नेहमी पांढरी टोपी घालतात. पण ही टोपी फक्त स्टाईलसाठी नसून स्वच्छता, सुरक्षितता आणि व्यावसायिकतेसाठी किती महत्त्वाची आहे, हे तुम्हाला माहिती आहे का?

पांढऱ्या टोपीमागचं रहस्य

स्टार हॉटेल्स आणि रेस्टॉरंट्समधील शेफची एक वेगळीच क्रेझ असते. किचनमध्ये स्वयंपाक करताना हे शेफ आवर्जून टोपी घालतात. राजासाठी जसा मुकुट महत्त्वाचा असतो, तशीच शेफसाठी ही पांढरी टोपी महत्त्वाची असते. प्रत्येक हॉटेलमध्ये आपण त्यांना लांब, पांढऱ्या रंगाची टोपी घातलेलं पाहतो. पण शेफ फक्त पांढरा रंगच का निवडतात? ते काळा किंवा लाल रंग का टाळतात? यामागचं नेमकं कारण आपण आता जाणून घेणार आहोत.

स्वच्छतेसाठी पांढरा रंग

किचनमध्ये पांढरी टोपी घालण्यामागचं सर्वात मोठं कारण म्हणजे स्वच्छता. जेवणात केस पडू नयेत म्हणून शेफ टोपी घालतात. उच्च दर्जाची स्वच्छता राखण्यासाठी ते खास पांढऱ्या रंगाची निवड करतात. पांढऱ्या टोपीवर एखादा छोटासा डाग किंवा घाण लगेच दिसून येते. यामुळे शेफला आपली टोपी आणि कपडे नियमितपणे स्वच्छ करावे लागतात. या सवयीमुळे ग्राहकांचा विश्वास वाढतो. १८ व्या शतकात प्रसिद्ध फ्रेंच शेफ बाउचर (Boucher) यांनी हा कडक नियम लागू केला होता. किचनमध्ये स्वच्छता राखण्यासाठी त्यांनी सर्व शेफला पांढरी टोपी घालण्याचे आदेश दिले होते. जगभरातील किचन आजही याच नियमाचं पालन करतात.

या टोपीचं नाव काय आहे?

फ्रेंच भाषेत लोक या प्रसिद्ध पांढऱ्या टोपीला "टोक" (Toque) किंवा "टोक ब्लांच" (Toque blanche) म्हणतात. 'टोक ब्लांच' म्हणजे पांढरी टोपी.

टोपीची उंची सांगते शेफचं पद

किचनमध्ये तुम्ही वेगवेगळ्या आकाराच्या टोप्या पाहिल्या असतील. काही शेफ खूप उंच टोपी घालतात, तर काही लहान टोपी घालतात. जुन्या काळी फक्त मुख्य हेड शेफ सर्वात उंच टोपी घालत असे. प्रसिद्ध फ्रेंच शेफ मेरी-अँटोइन केरेम (Marie-Antoine Carême) तब्बल १८ इंच उंच पांढरी टोपी घालत असत! ती टोपी पाहूनच इतर शेफ त्यांच्या अनुभवाचा आदर करत असत.

टोपीवरील घड्यांचं रहस्य!

शेफच्या टोपीवर तुम्हाला अनेक उभ्या घड्या दिसतील. या घड्या फक्त डिझाईनसाठी असतात, असा अनेकांचा गैरसमज आहे. पूर्वीच्या काळी या घड्यांवरून शेफचं कौशल्य मोजलं जायचं. १०० घड्या असलेल्या टोपीचा अर्थ असा होता की, त्या शेफला एका अंड्यापासून १०० वेगवेगळे पदार्थ बनवता येतात.

अन्नाची स्वच्छता राखण्यासाठी ही टोपी डोकं पूर्णपणे झाकून ठेवते. शेफ अनेक तास गरम गॅसजवळ काम करतात. चेहऱ्यावरील घाम जेवणात पडू नये म्हणून ही टोपी मदत करते. टोपीच्या उंच डिझाईनमुळे आत हवा खेळती राहते. यामुळे कामाच्या गडबडीतही शेफचं डोकं शांत आणि थंड राहतं.