Common Liver Diseases: हे लक्षणं दिसतायत का?, यकृताच्या आजारांचे संकेत वेळीच ओळखा आणि निरोगी ठेवा तुमचं लिव्हर

Common Liver Diseases: हिपॅटायटीस, फॅटी लिव्हर, सिरोसिस यांसारखे सामान्य यकृताचे आजार आणि त्यांची सुरुवातीची लक्षणं जसे की थकवा, पिवळसरपणा, पोटदुखी ओळखा आणि वेळेत उपचार घ्या. तुमचं यकृत निरोगी ठेवा! 

यकृताला होणारे आजार, वेळीच ओळखा

यकृतावर परिणाम करणाऱ्या काही महत्त्वाच्या आजारांबद्दल आणि त्यांच्या लक्षणांबद्दल जाणून घेऊया. 

१. नॉन-अल्कोहोलिक फॅटी लिव्हर डिसीज

यकृतामध्ये जास्त प्रमाणात चरबी जमा होण्याच्या स्थितीला फॅटी लिव्हर म्हणतात. त्वचा पिवळसर होणे, चेहऱ्यावर सूज, खाज, त्वचा कोरडी होणे, पोटात सूज, पोट फुगणे, पोटदुखी, वजन कमी होणे, भूक न लागणे ही याची लक्षणे आहेत.

२. हिपॅटायटीस

हिपॅटायटीस म्हणजे यकृताला सूज येण्याची स्थिती. व्हायरल इन्फेक्शन, मद्यपान, काही औषधांचा वापर, बॅक्टेरियल इन्फेक्शन यामुळे हिपॅटायटीस होऊ शकतो. कावीळ, भूक न लागणे, थकवा, मळमळ, उलट्या ही याची लक्षणे आहेत.

३. लिव्हर सिरोसिस

लिव्हर सिरोसिस हा यकृताचा एक गंभीर आजार आहे. यामुळे यकृताच्या निरोगी पेशी नष्ट होतात आणि त्याच्या कार्यावर वाईट परिणाम होतो. पोटात पाणी साचणे, त्वचेला सतत खाज सुटणे, कावीळ, तीव्र थकवा, भूक न लागणे, वजन कमी होणे ही सिरोसिसची लक्षणे आहेत. 

४. लिव्हर कॅन्सर

लिव्हर कॅन्सर किंवा यकृताचा कर्करोग हा वेगाने पसरणाऱ्या कर्करोगांपैकी एक आहे. पोटदुखी, पोटात सूज, उलट्या, शरीर आणि डोळे पिवळे होणे, त्वचेला खाज सुटणे, जास्त थकवा येणे ही यकृताच्या कर्करोगाची लक्षणे असू शकतात.

हे लक्षात ठेवा:

वर नमूद केलेली लक्षणे दिसल्यास, स्वतः निदान करण्याचा प्रयत्न न करता डॉक्टरांचा सल्ला घ्या. त्यानंतरच आजाराची खात्री करा.