Vinod Kambli Health Update: विनोद कांबळी यांची प्रतिक्रिया

मुंबई: प्रकृती बिघडल्याने रुग्णालयात दाखल करण्यात आलेले माजी भारतीय क्रिकेटपटू विनोद कांबळी यांच्या प्रकृतीत सुधारणा झाली आहे. मुंबईतील खासगी रुग्णालयातील डॉक्टरांनी ही माहिती दिली. काल रुग्णालयात दाखल करण्यात आलेल्या कांबळी यांच्या मेंदूत रक्ताची गुठळी झाल्याचे तपासणीत आढळून आले होते. संसर्गामुळे रुग्णालयात दाखल झालेल्या कांबळींना एक महिन्यापेक्षा जास्त काळ रुग्णालयात राहावे लागणार आहे. दरम्यान, रुग्णालयात असलेल्या विनोद कांबळी यांची पहिली प्रतिक्रिया समोर आली आहे.

डॉक्टरांमुळेच मी जिवंत आहे, असे कांबळी व्हिडिओत म्हणताना दिसत आहेत. ते जे सांगतात ते मी करतोय आणि मला काहीही वेदना होत नाहीत, असेही कांबळी म्हणाले. कांबळींना रुग्णालयात आणले तेव्हा त्यांना बसताही येत नव्हते आणि चालताही येत नव्हते, असे डॉक्टरांनी सांगितले. व्हिडिओ पहा...

गेल्या महिन्यातही कांबळींना रुग्णालयात दाखल करण्यात आले होते. २०१३ मध्ये कांबळी यांच्यावर दोनदा हृदय शस्त्रक्रिया झाली होती. अलीकडेच बालपणीचे प्रशिक्षक रमाकांत आचरेकर यांच्या स्मृतिदिनानिमित्त झालेल्या कार्यक्रमात कांबळी यांचे रूप आणि बोलणे पाहून सगळेच थक्क झाले होते. कपिल देव यांच्या नेतृत्वाखालील माजी खेळाडूंनी कांबळींना व्यसनातून बाहेर पडण्यासाठी मदत करण्याची तत्परता दर्शवली होती.

मी मद्यपान आणि धूम्रपान पूर्णपणे सोडले आहे आणि मी पुन्हा एकदा आरोग्य सुधारण्यासाठी प्रयत्न करत आहे, असे कांबळी यांनी या महिन्याच्या सुरुवातीला स्पष्ट केले होते. कुटुंब जवळ असल्यामुळे मला आयुष्यात काहीही घाबरण्याचे कारण नाही आणि मी पुन्हा एकदा व्यसनमुक्ती उपचारांसाठी तयार आहे, असे विकी लवलानी यांच्या युट्यूब चॅनेलला दिलेल्या मुलाखतीत कांबळी म्हणाले.

मद्यपानामुळेच माझ्या सध्याच्या सर्व समस्या निर्माण झाल्या आहेत, असे कांबळी यांनी स्पष्टपणे सांगितले. पण गेल्या सहा महिन्यांपासून मी एक थेंबही दारू प्यायलो नाही किंवा धूम्रपान केले नाही. मी सर्व काही सोडले आहे. हे सर्व मी माझ्या मुलांसाठी केले आहे. हे मला आधीच करायला हवे होते. पण आता ते सांगून काही उपयोग नाही, असेही कांबळी म्हणाले.