श्रीनगरमध्ये ५० वर्षांतील नीचांकी तापमान: दाल सरोवर गोठले

श्रीनगर/ शिमला: उत्तर भारतातील अनेक राज्यांमध्ये थंडीचा कडाका कायम असून हिमाचल प्रदेशातील टाबो येथे रविवारी उणे ११.६ अंश सेल्सिअस तापमान नोंदवले गेले. रविवारी देशात नोंदवले गेलेले हे सर्वात कमी तापमान आहे. शुक्रवारी रात्री श्रीनगरमध्ये उणे ८ अंश सेल्सिअस तापमान नोंदवले गेले, जे ५० वर्षांतील नीचांकी आहे. १९७४ मध्ये उणे १०.३ अंश सेल्सिअस तापमान नोंदवले गेले होते, जे आतापर्यंतचे सर्वात कमी तापमान आहे. दक्षिण काश्मीरमध्ये तापमान शून्यापेक्षा खाली गेल्याने प्रसिद्ध दाल सरोवर अंशतः गोठले आहे. मात्र रविवारी तापमानात थोडी वाढ झाली आणि ते उणे ४.६ अंश सेल्सिअसवर पोहोचले.

थंडी वाढल्यानंतर दिल्लीतील प्रदूषण पुन्हा गंभीर पातळीवर

नवी दिल्ली: राजधानी दिल्लीत थंडी आणि धुके वाढल्यानंतर वायू प्रदूषणाची पातळी पुन्हा गंभीर झाली आहे. रविवारी वायू गुणवत्ता निर्देशांक (AQI) ४०६ अंकांवर पोहोचला, जो अतिशय खराब मानला जातो. यासोबतच थंडीही प्रचंड असल्याने दिल्लीकरांना त्रास सहन करावा लागत आहे. ही परिस्थिती हाताळण्यासाठी, इमारत बांधकाम यासारख्या वायू प्रदूषणाला कारणीभूत ठरणाऱ्या कामांवर बंदी घालणारा GRAP-४ आधीच लागू करण्यात आला आहे, असे अधिकाऱ्यांनी सांगितले.

७१,००० लोकांना आज व्हिडिओ कॉन्फरन्सिंगद्वारे पंतप्रधान मोदींकडून नियुक्तीपत्र वितरण

नवी दिल्ली: पंतप्रधान नरेंद्र मोदी सोमवारी केंद्र सरकारच्या विविध विभागांमध्ये नव्याने नियुक्त झालेल्या ७१,००० कर्मचाऱ्यांना व्हिडिओ कॉन्फरन्सिंगद्वारे नियुक्तीपत्रे देणार आहेत. नियुक्तीपत्र वितरण कार्यक्रम देशातील ४५ ठिकाणी होणार असून, यावेळी पंतप्रधान मोदी व्हिडिओ कॉन्फरन्सिंगद्वारेच जनतेला संबोधित करतील. 'रोजगार मेळा' अंतर्गत गृह मंत्रालय, टपाल विभाग, उच्च शिक्षण विभाग, आरोग्य आणि कुटुंब कल्याण विभाग, वित्तीय सेवा विभाग यासह केंद्र सरकारच्या विविध मंत्रालये आणि विभागांमध्ये नियुक्त्या करण्यात आल्या आहेत, अशी माहिती पंतप्रधान कार्यालयाने दिली आहे.