पत्नीच्या मैत्रिणीमुळे पतीला घटस्फोट मंजूर

कोलकाता: पत्नीने तिच्या मैत्रिणीला आणि कुटुंबाला पतीच्या इच्छेविरुद्ध घरात ठांबवल्याने पतीला मानसिक त्रास झाला. कलकत्ता उच्च न्यायालयाने पतीला घटस्फोट मंजूर केला आहे. घटस्फोटाची मागणी फेटाळणाऱ्या कुटुंब न्यायालयाच्या निर्णयाविरुद्ध पतीने उच्च न्यायालयात धाव घेतली होती. न्यायमूर्ती सब्यसाची भट्टाचार्य यांच्या अध्यक्षतेखालील खंडपीठाने युवकाची मागणी मान्य करत हा निर्णय दिला. युवकाला मानसिक त्रास सहन करावा लागला आणि घटस्फोटासाठी पुरेसे कारणे आहेत, असे खंडपीठाने म्हटले आहे. 

१५ डिसेंबर २००५ रोजी दोघांचे लग्न झाले. मिदनापूर जिल्ह्यातील कोलाघाट येथे युवकाचे नोकरीच्या ठिकाणी निवासस्थान होते. येथे पत्नीच्या मैत्रिणी आणि कुटुंबीयांनी आपल्या विरोधाला न जुमानता राहण्यास सुरुवात केली, अशी युवकाची तक्रार होती. पत्नी घरी नसतानाही, युवकाच्या विरोधाला न जुमानता, कुटुंब आणि मैत्रीण दीर्घकाळ घरात राहिल्याने हे क्रूरतेच्या मर्यादेत येते, असे न्यायालयाने म्हटले आहे. पत्नीने बराच काळ लैंगिक संबंध ठेवण्यास नकार दिला आणि ती तिच्या मैत्रिणीसोबतच जास्त वेळ घालवायची, असे युवकाने न्यायालयात सांगितले. 

२००८ मध्ये पतीने घटस्फोटासाठी अर्ज दाखल केला. त्यानंतर लगेचच पत्नीने पती आणि सासरच्यांविरुद्ध कौटुंबिक हिंसाचाराची तक्रार दाखल केली. या प्रकरणी पती आणि कुटुंबीय दोषी नाहीत, असा निर्णय न्यायालयाने आधीच दिला होता. २००८ पासून पत्नी दुसऱ्या घरात राहत होती आणि वैवाहिक जीवनात परतण्यास ती तयार नव्हती, हे यावरून स्पष्ट होते, असे न्यायालयाने म्हटले आहे. पतीविरुद्ध खोटा गुन्हा दाखल केल्याने हे देखील क्रूरतेच्या मर्यादेत येते, असे नमूद करत न्यायालयाने घटस्फोट मंजूर केला आहे.