शिबू सोरेन यांचे निधन, झारखंड मुक्ती मोर्चाचे संस्थापक काळाच्या पडद्याआड

गेल्या काही वर्षांपासून सक्रिय राजकारणापासून दूर असलेले शिबू सोरेन यांना जूनच्या अखेरीस मूत्रपिंडाच्या समस्येमुळे दिल्लीतील रुग्णालयात दाखल करण्यात आले होते.

नवी दिल्ली- झारखंडचे माजी मुख्यमंत्री आणि झारखंड मुक्ती मोर्चा (JMM) या पक्षाचे संस्थापक संरक्षक शिबू सोरेन यांचे सोमवारी दिल्लीतील रुग्णालयात प्रदीर्घ आजारानंतर निधन झाले. ते ८१ वर्षांचे होते.

झारखंडचे विद्यमान मुख्यमंत्री आणि त्यांचे चिरंजीव हेमंत सोरेन यांनी त्यांच्या निधनाची माहिती देताना भावनिक शब्दांत म्हटले, “आदरणीय दिशोम गुरु आता आपल्यात नाहीत. आज मी पूर्णपणे पोकळ झालो आहे.”

गेल्या काही वर्षांपासून सक्रिय राजकारणापासून दूर असलेले शिबू सोरेन यांना जूनच्या अखेरीस मूत्रपिंडाच्या समस्येमुळे दिल्लीतील रुग्णालयात दाखल करण्यात आले होते.

‘दिशोम गुरु’ या नावाने ओळखले जाणारे शिबू सोरेन हे भारतीय राजकारणातील एक प्रभावी आदिवासी नेते होते. त्यांनी झारखंडचे मुख्यमंत्री म्हणून तीन वेळा सेवा बजावली, तसेच केंद्रात मंत्रीपदही भूषवले होते.

१९८७ मध्ये झारखंड मुक्ती मोर्चाच्या नेतृत्वाची जबाबदारी त्यांनी स्वीकारली आणि एप्रिल २०२५ पर्यंत पक्षाचे निर्विवाद अध्यक्ष राहिले. झारखंड स्वतंत्र राज्यासाठीच्या चळवळीचे ते अग्रणी नेतृत्व होते.

मुख्यमंत्री म्हणून त्यांनी तीनदा कार्यभार सांभाळला, मार्च २००५ मध्ये प्रथमच, नंतर ऑगस्ट २००८ ते जानेवारी २००९ आणि पुन्हा डिसेंबर २००९ ते मे २०१० दरम्यान. मात्र, एका कार्यकाळासाठीही ते संपूर्ण पाच वर्षे पूर्ण करू शकले नाहीत.

त्यांनी २००४ ते २००६ या कालावधीत तीनदा केंद्रीय कोळसा मंत्री म्हणूनही काम पाहिले. तसेच, ते सहा वेळा लोकसभेवर निवडून गेले (१९८० ते २००५ दरम्यान), आणि तीन वेळा राज्यसभेचे सदस्यही राहिले.

झारखंडच्या सामाजिक, राजकीय आणि आदिवासी अधिकारांसाठीच्या लढ्यात शिबू सोरेन यांचे योगदान अमूल्य राहिले आहे. त्यांच्या निधनामुळे झारखंड आणि देशातील आदिवासी समाजाने एक प्रभावी मार्गदर्शक गमावला आहे.