Prashant Bhushan: देशात सत्तांतर हवंय, यात गैर काय? प्रशांत भूषण यांचा मोदी सरकारवर हल्लाबोल
सार
ज्येष्ठ वकील प्रशांत भूषण यांनी देशात सत्तांतर होणे काळाची गरज असून त्यात काहीही गैर नसल्याचे म्हटले आहे. मोदी सरकार देशातील लोकशाही संपवत असल्याचा आरोप त्यांनी केला.
नवी दिल्ली: ज्येष्ठ वकील प्रशांत भूषण यांनी देशात आता सत्तांतर व्हायलाच हवं, अशी ठाम भूमिका मांडली आहे. मोदी सरकारने देशातील निवडणूक लोकशाही उद्ध्वस्त करण्यासाठी कंबर कसली आहे, असा घणाघात त्यांनी केला. सरकारविरोधात मतभेद व्यक्त करणं हा काही गुन्हा नाही, असंही ते म्हणाले. दिल्लीत सीजेपी (CJP) आणि आयसा (AISA) कार्यकर्त्यांनी आयोजित केलेल्या पत्रकार परिषदेत ते बोलत होते.
"विरोधक सत्तांतराचा डाव रचत आहेत, असा आरोप सरकार नेहमी करतं. पण आम्ही देशातील लोकशाही वाचवण्याची मागणी करत आहोत. जर हा अन्याय असाच सुरू राहिला, तर देशात नक्कीच सत्तांतर होईल. आम्हा सर्वांना तेच हवंय आणि त्यात गैर काय? सत्ता बदलणं हा प्रत्येक नागरिकाचा लोकशाही अधिकार आहे. सरकारशी असहमती दर्शवणं हा काही गुन्हा नाही," असं प्रशांत भूषण यांनी स्पष्ट केलं.
नागरिकांच्या मूलभूत अधिकारांशी खेळणारं आणि लोकशाहीला नख लावणारं सरकार जास्त काळ टिकू शकत नाही, असा इशाराही त्यांनी दिला. दरम्यान, मुख्य निवडणूक आयुक्तांविरोधातील आंदोलनाचा पुढचा टप्पा म्हणून सीजेपी आणि इतर संघटना उद्या संध्याकाळी ५ वाजता दिल्लीतील कॅनॉट प्लेस येथील सेंट्रल पार्कमध्ये 'तिरंगा मार्च' काढणार आहेत. आम आदमी पार्टीनेही (AAP) या आंदोलनाला आपला पाठिंबा दिला आहे.