India Iran Talks : पंतप्रधान नरेंद्र मोदींनी इराणच्या राष्ट्राध्यक्षांना सांगितल्या २ मोठ्या प्राथमिकता, मिळालं 'हे' उत्तर

होर्मुझच्या सामुद्रधुनीतील संकटामुळे भारताचा तेल पुरवठा धोक्यात आलाय का? पंतप्रधान मोदींनी इराणच्या राष्ट्राध्यक्षांशी थेट बोलून भारतीयांची सुरक्षा आणि ऊर्जा पुरवठा याला सर्वोच्च प्राधान्य असल्याचं सांगितलंय. भारतीय टँकर्सना सुरक्षित मार्ग मिळणार का?

पंतप्रधान नरेंद्र मोदींनी नुकतंच इराणचे राष्ट्राध्यक्ष मसूद पेझेश्कियानसोबत फोनवरुन चर्चा

मिडल ईस्टमध्ये वाढता तणाव आणि युद्धासारख्या परिस्थितीमुळे भारताची चिंता स्पष्ट दिसतेय. त्यामुळेच पंतप्रधान नरेंद्र मोदींनी नुकतंच इराणचे राष्ट्राध्यक्ष मसूद पेझेश्कियान यांच्याशी फोनवर महत्त्वाची चर्चा केली. या चर्चेत भारताने स्पष्ट केलं की, परदेशात राहणाऱ्या भारतीयांची सुरक्षा आणि तेल-वायू पुरवठा अखंडित राहणं, या दोन गोष्टी भारतासाठी सध्या सर्वोच्च प्राधान्याच्या आहेत.

पंतप्रधानांकडून परिस्थितीवर चिंता व्यक्त

पंतप्रधान मोदी आणि इराणच्या राष्ट्राध्यक्षांमधील ही चर्चा अशा वेळी झालीये, जेव्हा मिडल ईस्टमध्ये तणाव शिगेला पोहोचला आहे. अनेक ठिकाणी हल्ले होत आहेत, सामान्य लोकांचा जीव जातोय आणि तेल-ऊर्जा प्रकल्पांचं मोठं नुकसान होतंय. पंतप्रधानांनी या परिस्थितीवर तीव्र चिंता व्यक्त केली. त्यांनी सांगितलं की, शांतता, चर्चा आणि मुत्सद्देगिरी हाच परिस्थिती आणखी बिघडण्यापासून रोखण्याचा योग्य मार्ग आहे. भारताने नेहमीच या भागात शांतता आणि स्थिरतेचं समर्थन केलं आहे आणि पुन्हा एकदा तीच भूमिका मांडली.

भारतावर होऊ शकतो परिणाम

सध्याच्या संकटाचं मुख्य कारण होर्मुझच्या सामुद्रधुनीवरून निर्माण झालेला तणाव आहे. हा जगातील एक अत्यंत महत्त्वाचा सागरी मार्ग आहे. जगातील सुमारे २० टक्के कच्च्या तेलाचा आणि नैसर्गिक वायूचा पुरवठा याच मार्गावरून होतो. इराणने हा मार्ग रोखल्याच्या बातम्यांनी संपूर्ण जगाची चिंता वाढवली आहे. जर हा मार्ग जास्त काळ बंद राहिला, तर जागतिक तेल संकट आणखी गडद होऊ शकतं. याचा परिणाम भारतासारख्या देशांच्या ऊर्जा सुरक्षेवरही होऊ शकतो, कारण भारत आपल्या गरजेचा मोठा हिस्सा परदेशातून आयात करतो.

परराष्ट्र मंत्री एस. जयशंकर यांचीही त्यांच्या इराणी समकक्षांशी चर्चा

या संकटकाळात भारताने मुत्सद्दी पातळीवर वेगाने पावलं उचलली आहेत. भारताचे परराष्ट्र मंत्री एस. जयशंकर यांनीही त्यांच्या इराणी समकक्षांशी चर्चा केली. सूत्रांनी दिलेल्या माहितीनुसार, इराणने भारतीय तेल टँकर्सना होर्मुझच्या सामुद्रधुनीतून जाण्यासाठी सुरक्षित मार्ग देण्याचं आश्वासन दिलं आहे. भारत आणि इराणमध्ये चर्चा सुरू आहे, जेणेकरून किमान २० भारतीय तेल आणि वायू टँकर्स या मार्गावरून सुरक्षितपणे जाऊ शकतील.

मिडल ईस्टमधील संघर्षाचा फटका भारतीयांना

मिडल ईस्टमधील संघर्षाचा फटका भारतीयांनाही बसला आहे. भारताच्या परराष्ट्र मंत्रालयाचे प्रवक्ते रणधीर जयस्वाल यांनी याला दुजोरा दिला आहे. त्यांनी सांगितलं की, या भागात व्यापारी जहाजांवर झालेल्या हल्ल्यांमध्ये दोन भारतीय नागरिकांचा मृत्यू झाला आहे, तर एक भारतीय अजूनही बेपत्ता आहे. हे भारतीय त्या जहाजांवर काम करत होते, ज्यांना संघर्षादरम्यान लक्ष्य करण्यात आलं. या घटनेमुळे भारताची चिंता आणखी वाढली आहे.

पंतप्रधान नरेंद्र मोदी काय म्हणाले?

भारत या संपूर्ण संकटाकडे अत्यंत गांभीर्याने पाहत आहे. पंतप्रधान मोदींनी आपल्या चर्चेत स्पष्ट केलं की, भारतीयांची सुरक्षा, व्यापार आणि ऊर्जा पुरवठ्याची सुरक्षितता ही भारताची सर्वोच्च प्राथमिकता आहे. भारताने पुन्हा एकदा जोर देऊन सांगितलं की, या वाढत्या संघर्षावर तोडगा काढण्यासाठी चर्चा, मुत्सद्देगिरी आणि शांतता हाच एकमेव मार्ग आहे. आता येत्या काळात मिडल ईस्टचं हे संकट कोणतं वळण घेतं आणि त्याचा जागतिक अर्थव्यवस्थेवर व ऊर्जा बाजारावर किती परिणाम होतो, याकडे संपूर्ण जगाचं लक्ष लागलं आहे.