Viral Video: व्हीलचेअरवर झोमॅटो डिलिव्हरी बॉय, त्याचा हसरा चेहरा जिंकतोय इंटरनेट!

मुंबईत एका झोमॅटो डिलिव्हरी पार्टनरचा मोटराइज्ड व्हीलचेअरवरून हसतमुखाने काम करतानाचा व्हिडिओ व्हायरल झाला आहे. साक्षी नावाच्या तरुणीने शेअर केलेल्या या इन्स्टाग्राम रीलला ११.४ दशलक्षाहून अधिक व्ह्यूज मिळाले असून, त्याचा सकारात्मक दृष्टिकोन जगभरातील लोकांना प्रेरणा देत आहे.

कधीकधी अनोळखी लोक आपल्याला आयुष्यातले सर्वात मोठे धडे देऊन जातात. मुंबईच्या रस्त्यांवरून जाणाऱ्या एका तरुणीला असाच एक अनुभव आला. जेव्हा गोष्टी मनासारख्या होत नाहीत, तेव्हाही आनंद कसा शोधायचा आणि आपल्याकडे जे आहे त्यात कृतज्ञ कसं राहायचं, हे तिला एका अनोळखी व्यक्तीच्या हसऱ्या चेहऱ्याने शिकवलं.

तिने या खास क्षणाचा व्हिडिओ आपल्या कॅमेऱ्यात कैद केला आणि इन्स्टाग्रामवर शेअर केला. यात एक झोमॅटो डिलिव्हरी पार्टनर मोटराइज्ड व्हीलचेअरवर बसून आपलं काम करताना दिसतोय. हा व्हिडिओ आतापर्यंत लाखो लोकांनी पाहिला असून, त्याच्या जिद्दीचं आणि सकारात्मकतेचं सर्वत्र कौतुक होत आहे.

साक्षी आपल्या कारमधून जात असताना, तिला हा डिलिव्हरी पार्टनर रस्त्यावरून जाताना दिसला. त्याच्या खास डिझाईन केलेल्या मोटराइज्ड व्हीलचेअरवर डिलिव्हरी बॅग बांधलेली होती. कानात हेडफोन्स लावून, गाणी ऐकत तो अगदी मजेत आपला प्रवास करत होता. त्याच्या शारीरिक स्थितीपेक्षा त्याच्या चेहऱ्यावरचा आनंद आणि काम करण्याची जिद्द साक्षीला जास्त भावली. जेव्हा त्याला समजलं की कोणीतरी त्याचा व्हिडिओ काढतंय, तेव्हा त्याने अगदी मनमोकळं हास्य दिलं.

साक्षी आणि तिच्या मैत्रिणीने गाडी थांबवून त्याला अभिवादन केलं आणि त्याच्या या स्पिरीटला सलाम केला. त्यांच्या या छोट्याशा भेटीतही तो सतत हसत होता, ज्यामुळे त्या दोघीही खूप प्रभावित झाल्या.

साक्षीने हा व्हिडिओ इन्स्टाग्रामवर शेअर करताना लिहिलं की, "कधीकधी आयुष्याकडे बघण्याचा तुमचा दृष्टिकोन बदलण्यासाठी एका अनोळखी व्यक्तीचीच गरज असते."

पाहा हा व्हायरल व्हिडिओ

पोस्टच्या कॅप्शनमध्ये तिने पुढे लिहिलंय, "चालत राहा, हसत राहा आणि आयुष्यातल्या छोट्या छोट्या आनंदांना कधीच कमी लेखू नका, याची ही एक आठवण आहे. जर या व्हिडिओने तुमच्या चेहऱ्यावर हास्य आणलं असेल, तर आज ज्याला थोड्या सकारात्मकतेची गरज आहे, त्याच्यासोबत हा नक्की शेअर करा."

तिने झोमॅटोचंही कौतुक केलं. ती म्हणाली, "वेगवेगळ्या क्षमता असलेल्या लोकांसाठी जागा निर्माण केल्याबद्दल आणि 'इन्क्लुजन' (समावेशन) नेमकं कसं असू शकतं हे दाखवून दिल्याबद्दल @zomato ला खूप सारं प्रेम."

सोशल मीडियाची प्रतिक्रिया काय?

हा व्हिडिओ शेअर झाल्यापासून त्याला ११.४ दशलक्षाहून अधिक व्ह्यूज मिळाले आहेत. लोक या डिलिव्हरी पार्टनरवर प्रेमाचा वर्षाव करत आहेत.

एका युजरने लिहिलं, "जेव्हा तुम्हाला सगळीकडे फक्त नकारात्मकता दिसते, तेव्हा आयुष्यात अशी सकारात्मकता असायला हवी. त्याची ही एनर्जी खूप भारी आहे."

दुसऱ्या एकाने कमेंट केली, "बापरे... त्याचा तो हसरा आणि आनंदी चेहरा." तर आणखी एकाने लिहिलं, "मित्रा... आयुष्यात आपल्याला याच एनर्जीची गरज आहे! फक्त हा क्षण एन्जॉय करा."