Maruti SUV: मारुती सुझुकीचा धमाका! बाजारात आणणार ७ नव्या SUV, छोट्या गाड्यांचेही दिवस परतणार

मारुती सुझुकी पुढील सहा वर्षांत सात नवीन SUV मॉडेल्स आणून आपली बाजारपेठेतील स्थिती मजबूत करणार आहे. कंपनी उत्पादन क्षमता वाढवत असून बायोगॅस प्लांटमध्येही गुंतवणूक करत आहे.

देशातील सर्वात मोठी कार कंपनी मारुती सुझुकी इंडियाने एक मोठी घोषणा केली आहे. कंपनी पुढच्या पाच ते सहा वर्षांत सात नवीन SUV मॉडेल्स बाजारात आणणार आहे. या माध्यमातून देशांतर्गत प्रवासी वाहन बाजारात आपली पकड आणखी मजबूत करण्याची कंपनीची योजना आहे.

SUV लाँचिंग आणि क्षमता वाढवण्यावर भर

कंपनीने नुकताच आपला 2025-26 चा वार्षिक अहवाल प्रसिद्ध केला आहे. यामध्ये कंपनीचे व्यवस्थापकीय संचालक आणि सीईओ, हिसाशी ताकेउची यांनी ही माहिती दिली. ते म्हणाले, "बाजाराच्या भविष्यातील वाढीबद्दल आम्हाला खात्री आहे, त्यामुळे आम्ही आमची उत्पादन क्षमता वाढवण्याची योजना अधिक वेगाने पुढे नेत आहोत. आर्थिक वर्ष 2026-27 मध्ये आम्ही 500,000 युनिट्सची अतिरिक्त उत्पादन क्षमता जोडली आहे. ग्राहकांच्या अपेक्षाही वेगाने बदलत आहेत. त्यामुळे, SUV पोर्टफोलिओ अधिक मजबूत करण्यासाठी कंपनी पुढील 5 ते 6 वर्षांत 7 नवीन SUV आणण्याच्या तयारीत आहे."

बाजारपेठेच्या वाढीचा अंदाज

मारुती सुझुकीला अपेक्षा आहे की, पुढील पाच वर्षांत भारताची प्रवासी कार बाजारपेठ लक्षणीयरीत्या वाढेल. याच पार्श्वभूमीवर कंपनीने आपली उत्पादन क्षमता वाढवण्याचा निर्णय घेतला आहे. कंपनीला छोट्या कारच्या सेगमेंटमध्येही पुन्हा एकदा मोठी वाढ होण्याची शक्यता दिसत आहे.

मारुती सुझुकीचे चेअरमन आर. सी. भार्गव यांनी सांगितले की, "आम्ही सध्या पुढील पाच वर्षांत कार बाजाराच्या संभाव्य वाढीचा अचूक अंदाज लावण्याचा प्रयत्न करत आहोत. आमच्या अंदाजानुसार, आर्थिक वर्ष 2030-31 पर्यंत भारतीय कार उद्योग 6.1 ते 6.3 मिलियन युनिट्सपर्यंत (61 ते 63 लाख) वाढू शकतो आणि गेल्या पाच वर्षांच्या तुलनेत छोट्या कारच्या बाजाराचा वाटा खूप वेगाने वाढेल."

वाढीची प्रमुख कारणं आणि विक्रमी कामगिरी

कंपनीच्या मते, छोट्या कार सेगमेंटला पुन्हा मिळणारी चालना, SUV पोर्टफोलिओची मजबुती, मल्टी-पॉवरट्रेन स्ट्रॅटेजी (म्हणजेच पेट्रोल, सीएनजी, हायब्रीड अशा विविध इंधन पर्यायांच्या गाड्या), उत्पादन क्षमतेत वाढ आणि निर्यात हे कंपनीच्या पुढील टप्प्यातील वाढीचे प्रमुख आधारस्तंभ असतील.

आर्थिक वर्ष 2025-26 मध्ये मारुती सुझुकीने आतापर्यंतची सर्वाधिक वार्षिक विक्री नोंदवली. कंपनीने एकूण 24.22 लाख वाहने विकली, तर निर्यातीनेही 4.47 लाख वाहनांचा विक्रमी आकडा गाठला. कंपनीने सलग तिसऱ्या वर्षी वीस लाखांपेक्षा जास्त वार्षिक विक्रीचा टप्पा ओलांडला आहे.

पर्यायी इंधनावर लक्ष केंद्रित

वाहनांचे उत्पादन आणि पोर्टफोलिओ वाढवण्यासोबतच मारुती सुझुकी पर्यायी इंधनावरही भर देत आहे. कंपनीच्या बोर्डाने पहिल्या टप्प्यात 561 कोटी रुपये खर्चून चार बायोगॅस प्लांट उभारण्यास मंजुरी दिली आहे.

यावर बोलताना भार्गव म्हणाले की, सुरुवातीच्या प्रकल्पांमधून अनुभव मिळाल्यानंतर मारुती सुझुकी बायोगॅस उत्पादन आणि वितरणात आणखी गुंतवणूक करू शकते. "आमचा ठाम विश्वास आहे की स्थानिक पातळीवर उपलब्ध संसाधनांमधून मोठ्या प्रमाणात बायोगॅस तयार केला जाऊ शकतो. हा ऊर्जा प्रकार आयात केलेल्या सीएनजीला पर्याय ठरेल आणि तो स्वच्छ व नवीकरणीय असेल," असं भार्गव यांनी नमूद केलं.

ते पुढे म्हणाले की, पहिल्या टप्प्यातून प्रक्रिया आणि तंत्रज्ञानाबद्दल अधिक माहिती मिळाल्यानंतर "बायोगॅसच्या उत्पादन आणि वितरणात मोठी रक्कम गुंतवण्याची" कंपनीला आशा आहे.

मारुती सुझुकीने म्हटले आहे की, उत्पादन, निर्यात, तंत्रज्ञान विकास आणि स्वच्छ मोबिलिटी यांसारख्या गोष्टींमुळे कंपनीच्या विकास धोरणाला पाठिंबा मिळेल. यातूनच कंपनी पुढील दहा लाख वाहनांच्या विक्रीचा टप्पा गाठण्यासाठी काम करत आहे.