Independence Day: स्वातंत्र्य दिनासाठी दिल्लीत अभेद्य सुरक्षा! लाल किल्ल्यावर १५,००० जवानांचा पहारा

स्वातंत्र्य दिनानिमित्त दिल्लीतील लाल किल्ल्यावर सुरक्षेचा अभेद्य किल्ला उभारण्यात आला आहे. १५,००० ते २०,००० जवान, १,००० पेक्षा जास्त कॅमेरे आणि अँटी-ड्रोन सिस्टीमसह दिल्ली पोलीस सज्ज आहेत.

येत्या १५ ऑगस्टला होणाऱ्या स्वातंत्र्य दिनाच्या सोहळ्यासाठी दिल्लीतील लाल किल्ल्यावर अभूतपूर्व सुरक्षा व्यवस्था करण्यात आली आहे. दिल्ली पोलिसांनी रविवारी याबद्दलची सविस्तर माहिती दिली.

एएनआय वृत्तसंस्थेशी बोलताना डीसीपी (नॉर्थ) राजा बंठिया यांनी सांगितलं की, ही सुरक्षा व्यवस्था दोन भागांमध्ये विभागली आहे - एक म्हणजे मनुष्यबळ आणि दुसरं म्हणजे तांत्रिक सुरक्षा.

मनुष्यबळ आणि निमलष्करी दलांची तैनाती

मनुष्यबळाच्या तैनातीमध्ये जवळपास १५,००० ते २०,००० सुरक्षा कर्मचारी असतील. यात दिल्ली पोलिसांचे ट्रॅफिक युनिट, नॉर्थ डिस्ट्रिक्ट टीम, स्थानिक पोलीस, पीसीआर, स्पेशल ब्रांच आणि स्पेशल सेलचे जवान सामील आहेत. "याशिवाय, निमलष्करी दलाच्या अनेक कंपन्या, कमांडो, एनएसजी टीम्स, 'हिट टीम्स' आणि स्नायपर्सही तैनात असतील. कोणत्याही आपत्कालीन परिस्थितीला तोंड देण्यासाठी एनडीआरएफची टीम आणि महत्त्वाच्या ठिकाणी क्विक रिॲक्शन टीम्स (QRTs) सुद्धा असतील," असं बंठिया यांनी सांगितलं.

हाय-टेक कॅमेरे आणि ड्रोनविरोधी यंत्रणा

तांत्रिक सुरक्षेबद्दल बोलताना डीसीपी म्हणाले की, लाल किल्ला आणि आसपासच्या परिसरात १,००० पेक्षा जास्त कॅमेरे बसवण्यात आले आहेत. या कॅमेऱ्यांवर लक्ष ठेवण्यासाठी खास कंट्रोल रूम बनवले आहेत. गरजेनुसार, फेशियल रिकग्निशन सिस्टीम (FRS), नंबर प्लेट ओळखणारी यंत्रणा आणि घुसखोरी ओळखणारी सिस्टीम (intrusion detection) वापरली जात आहे. ड्रोन हल्ल्याचा धोका लक्षात घेता अँटी-ड्रोन सिस्टीम बसवण्यात आली आहे.

"काही पोलिसांकडे बॉडी-वॉर्न कॅमेरेही असतील. सोशल मीडियावरही आमचं बारीक लक्ष आहे. आमची तयारी पूर्ण झाली असून सर्व प्रशिक्षण सत्रं पूर्ण झाली आहेत," असंही बंठिया यांनी स्पष्ट केलं.

स्वातंत्र्य दिनानिमित्त हवाई दलाच्या बँडचा खास कार्यक्रम

दरम्यान, स्वातंत्र्य दिनानिमित्त भारतीय हवाई दलाचा (IAF) बँड आज संध्याकाळी दिल्लीतील नॅशनल वॉर मेमोरियलच्या पब्लिक प्लाझामध्ये एक खास कार्यक्रम सादर करणार आहे. संरक्षण मंत्रालयानुसार, "'वंदे मातरम्' या राष्ट्रीय गीताला १५० वर्षे पूर्ण झाल्याच्या निमित्ताने देशभक्तीची भावना जागवण्यासाठी हा कार्यक्रम आयोजित केला आहे."

या बँडमध्ये ३२ एअरमेन आणि ८ अग्निवीरवायू (ज्यात ३ महिला आहेत) सहभागी होतील. मास्टर वॉरंट ऑफिसर ए. श्रीहरी हे या कार्यक्रमाचे मुख्य कंडक्टर असतील, तर ज्युनियर वॉरंट ऑफिसर मून डेका, ज्युनियर वॉरंट ऑफिसर अभिषेक पॉल आणि सार्जंट एनटी सिंग त्यांना मदत करतील. (एएनआय)