Kargil Vijay Diwas 2025 : भारतीय वीरांनी पाकिस्तानच्या तोंडाला आणला होता फेस, पाकिस्तान्यांनी कोल्ह्यासारखी ठोकली होती धूम
मुंबई - १९९९ मध्ये भारत आणि पाकिस्तान यांच्यात झालेले कारगिल युद्ध हे आधुनिक भारताच्या लष्करी इतिहासातील एक अत्यंत महत्त्वपूर्ण व तेजस्वी पर्व आहे. हे युद्ध जम्मू-काश्मीरमधील कारगिल एलओसी जवळ झाले होते. आज या युद्धाला २६ वर्षे पूर्ण झाली आहेत.
हे युद्ध जम्मू-काश्मीरमधील कारगिल जिल्ह्यातील नियंत्रण रेषेच्या (LoC) जवळच्या भागात झाले होते. हे युद्ध केवळ सैनिकी संघर्ष नव्हते, तर भारतीय सैन्याच्या पराक्रम, संयम आणि देशप्रेमाची अतीव साक्ष होती. २६ जुलै हा दिवस दरवर्षी 'कारगिल विजय दिवस' म्हणून साजरा केला जातो.
युद्धाची पार्श्वभूमी
१९९९ च्या सुरुवातीस, पाकिस्तानच्या सैन्याने आणि त्यांच्या समर्थित दहशतवाद्यांनी भारतीय सीमारेषा ओलांडून कारगिलच्या उंच पर्वतीय भागात गुपचूप घुसखोरी केली. त्यांनी भारताच्या संरक्षणात्मक चौक्यांवर ताबा मिळवला आणि उंचीचा भूभाग बळकावला. यामुळे लेह-लडाख रस्त्याला धोका निर्माण झाला आणि संपूर्ण काश्मीरच्या सुरक्षेवर प्रश्नचिन्ह उभं राहिलं.
भारताला ही घुसखोरी एप्रिल-मेमध्ये लक्षात आली. सुरुवातीला हा केवळ अतिरेक्यांचा प्रकार वाटला, पण नंतर स्पष्ट झालं की यात पाकिस्तानी सैन्य थेट सामील आहे. त्यानंतर भारत सरकारने ऑपरेशन विजय सुरू केले, ज्याद्वारे या घुसखोरांना हुसकावून लावण्याचा निर्णय घेतला गेला.