इराणी टँकर तेल घेऊन पोहचला गुजरातला, भारतातील कंपन्या खरेदी करणार का?

गुजरात किनाऱ्याजवळ एक इराणी तेलवाहू जहाज सुमारे 20 लाख बॅरल कच्चे तेल घेऊन कोणतीही पूर्वसूचना न देता पोहोचले आहे. या जहाजाचा कोणताही अधिकृत खरेदीदार किंवा गंतव्य निश्चित नसल्याने ऊर्जा क्षेत्रात खळबळ उडाली आहे.

गुजरात किनाऱ्याजवळ अचानक आलेल्या इराणी तेलवाहू जहाजामुळे ऊर्जा क्षेत्रात खळबळ उडाली आहे. कोणतीही पूर्वसूचना न देता हे जहाज भारतीय समुद्रसीमेच्या जवळ पोहोचल्याने त्याच्या उद्देशाबाबत प्रश्नचिन्ह निर्माण झाले आहे. मिळालेल्या माहितीनुसार, या टँकरमध्ये सुमारे 20 लाख बॅरल इराणी कच्चे तेल असल्याचा अंदाज आहे. मात्र या जहाजाने कोणताही अधिकृत खरेदीदार किंवा गंतव्य जाहीर केलेले नाही, त्यामुळे हे तेल कोणासाठी आणले आहे याबाबत अनिश्चितता आहे.

इराणमधून तेल टँकर भारताच्या किनाऱ्यावर 

दरम्यान, भारतीय रिफायनरी कंपन्या या टँकरमधील तेल खरेदी करण्यास फारशी उत्सुक नसल्याचे दिसत आहे. कारण हे तेल अमेरिकेने दिलेल्या सवलतीनंतर लोड करण्यात आले असण्याची शक्यता असून, त्यामुळे व्यवहारावर निर्बंध लागू शकतात. याआधी भारताने काही प्रमाणात इराणी तेल खरेदी केले होते, पण ते केवळ सवलतीच्या कालावधीत आधीच लोड केलेल्या मालापुरते मर्यादित होते. सध्याच्या परिस्थितीत नवीन व्यवहार करणे भारतीय कंपन्यांसाठी जोखमीचे ठरू शकते.

तेल वाहतुकीवर झाला मोठा परिणाम 

दरम्यान मध्यपूर्वेत सुरू असलेल्या तणावामुळे आणि अमेरिकेच्या निर्बंधांमुळे तेल वाहतुकीवर मोठा परिणाम झाला आहे. त्यामुळे अशा अनपेक्षित हालचालींमुळे जागतिक तेल बाजारात अनिश्चितता वाढत आहे. एकूणच, गुजरात किनाऱ्याजवळ आलेल्या या इराणी टँकरमुळे भारताच्या ऊर्जा धोरणासमोर नवे प्रश्न उभे राहिले आहेत. पुढील काही दिवसांत या जहाजाबाबत काय निर्णय घेतला जातो, याकडे सर्वांचे लक्ष लागले आहे.