Viral Video: इस्तंबूलमध्ये लग्नाच्या शूटदरम्यान नवरी हवेत उडू लागली, महाकाय फुग्यांनी केला घात

इस्तंबूलमधील बॉस्फोरस सामुद्रधुनीजवळ लग्नाचे फोटो काढताना एका नवरीचा थरकाप उडाला. जोराचा वारा आणि हातातल्या मोठ्या फुग्यांमुळे ती थेट हवेत फेकली जात होती. पण फोटोग्राफरने ऐनवेळी धाव घेत तिला भिंतीवर आणि सी-वॉलवर आदळण्यापासून वाचवले.

इस्तंबूलमध्ये लग्नाच्या फोटोशूटदरम्यान एक अजब आणि थरारक प्रकार घडला. जोरदार वाऱ्यामुळे आणि हातात असलेल्या मोठ्या फुग्यांमुळे नवरीचा समतोल सुटला आणि ती चक्क हवेत उडू लागली. प्रसिद्ध बॉस्फोरस सामुद्रधुनीजवळ ही तरुणी नवरीच्या पोषाखात फोटो काढत होती. तिच्या हातात बेज रंगाच्या मोठ्या फुग्यांचा गुच्छ होता. पण तितक्यात हवामान बिघडले आणि वाऱ्याच्या जोरदार झोताने तिचा तोल घालवला.

न्यू यॉर्क पोस्टने जॅम प्रेसच्या हवाल्याने दिलेल्या वृत्तानुसार, जोरदार वाऱ्याने तिच्या हातातील फुगे आणि सजावटीचे सामान ओढायला सुरुवात केली. नवरीने स्वतःला सावरण्याचा प्रयत्न केला, पण एका अचानक आलेल्या वाऱ्याच्या झोताने तिला थेट जवळच असलेल्या सी-वॉलकडे खेचले. ती जमिनीवरून वर उचलली जात असल्याचे दिसताच फोटोग्राफरने प्रसंगावधान दाखवत तिला पकडले. त्यामुळे ती जवळच्या इमारतीवर आदळण्यापासून बालंबाल वाचली.

पहा व्हायरल व्हिडिओ

İstanbul Boğazı kenarında, elindeki çok sayıda dekoratif balonun etkisiyle sürüklenen bir gelin, fotoğraf çekimi sırasında zor anlar yaşadı. Balonların gelini sürüklemesi nedeniyle çekim bir türlü gerçekleştirilemedi. https://t.co/BOvbWd5nB6

— Anbean (@anbeanews) October 28, 2026

फोटोशूटदरम्यान घडलेला हा सगळा प्रकार कॅमेऱ्यात कैद झाला आणि लवकरच त्याचा व्हिडिओ सोशल मीडियावर व्हायरल झाला. सुदैवाने या घटनेत नवरीला कोणतीही दुखापत झाली नाही. या थरारानंतर तिने आपले उरलेले फोटोशूट सुरक्षितपणे पूर्ण केले.

परिपूर्ण आणि सुंदर फोटोंसाठी केलेले हे फोटोशूट नवरीसाठी कधीही न विसरता येणारा एक विचित्र अनुभव ठरले. ग्लॅमरस दिसणाऱ्या या शूटचे अचानक एका भीतीदायक घटनेत रूपांतर झाले होते. मोठे फुगे लग्नाच्या फोटोंची शोभा वाढवत असले, तरी मोकळ्या हवेत शूटिंग करताना निसर्गाचा मूड कधी बदलेल हे सांगता येत नाही, हेच या घटनेने दाखवून दिले.