Sangli Murder: ओरडल्याचा धरला राग, १६ वर्षांच्या मुलाने केला स्कूल डायरेक्टरचा खून

सांगलीत एका एज्युकेशन सोसायटीचे डायरेक्टर संजय परांजपे यांच्या हत्येप्रकरणी एका १६ वर्षांच्या मुलाला ताब्यात घेण्यात आलं आहे. गेटवरून उडी मारल्यामुळे रागावल्याने मुलाने हे कृत्य केल्याचा पोलिसांचा दावा आहे. पण, कुटुंबीयांनी मात्र हत्येच्या या कारणावर शंका व्यक्त केली आहे.

सांगली: सांगली पोलिसांनी संजय प्रभाकर परांजपे यांच्या हत्येचा छडा लावल्याचा दावा केला आहे. या प्रकरणी एका १६ वर्षांच्या मुलाला पोलिसांनी ताब्यात घेतलं असून, त्याने १८ मार्च रोजी हत्या केल्याची कबुली दिली आहे. पालुस पोलीस स्टेशनचे इन्स्पेक्टर सिद्धेश्वर जंगम यांनी सांगितलं की, त्या दिवशी या मुलाचा दहावीचा शेवटचा पेपर होता. पेपर देऊन झाल्यावर तो सोसायटीच्या गेटवरून उडी मारून शॉर्टकटने घरी जात होता. त्याचवेळी परांजपे यांनी त्याला पाहिलं आणि हटकलं. यावर मुलाने रागाच्या भरात परांजपेंना भिंतीवर ढकलून दिलं, ज्यात त्यांच्या डोक्याला मार लागला. आपली तक्रार होईल या भीतीने, त्याने एका धारदार वस्तूने त्यांच्यावर हल्ला केला, असं त्याने कबूल केलं आहे.

सीसीटीव्ही फुटेजमधून लागला छडा

रात्री साडेआठच्या सुमारास परांजपे यांच्या मुलाला वडिलांचा मृतदेह त्यांच्याच अपार्टमेंटमध्ये जिन्याखालील जागेत सापडला. घरातले सगळे जण रात्रीच्या जेवणासाठी त्यांची वाट पाहत होते, तेव्हा मुलाने त्यांचा शोध सुरू केला. पोलिसांनी जवळच्या सीसीटीव्ही फुटेजच्या आधारे आरोपी मुलाची ओळख पटवली. तो मुलगा परांजपेंच्या अपार्टमेंटजवळच राहत होता.

हत्येच्या कारणावर कुटुंबाला शंका

पोलिसांच्या माहितीनुसार, मुलाने मृतदेह लपवला आणि परांजपे यांची अंगठी व मोबाईल फोन घेतला. त्यानंतर त्याला बाल न्याय मंडळाने (Juvenile Justice Board) बालसुधारगृहात पाठवलं. मात्र, परांजपे यांच्या कुटुंबीयांनी पोलिसांच्या या थिअरीवर शंका उपस्थित केली आहे. परांजपे हे खूप शांत स्वभावाचे होते, ते कधी कुणाला मोठ्या आवाजात बोलतही नव्हते, असं कुटुंबीयांनी तपास अधिकाऱ्यांना सांगितलं. फक्त गेटवरून उडी मारल्यामुळे रागावून हत्या करणं हे कारण त्यांना पटत नाहीये. त्यामुळे या प्रकरणाचा सर्व बाजूंनी तपास करावा, अशी मागणी त्यांनी केली आहे.

कोण होते संजय परांजपे?

• ६० वर्षांचे परांजपे हे पालुसमधील एका एज्युकेशन सोसायटीचे डायरेक्टर होते. तसेच ते एक नोंदणीकृत खासगी सावकारही होते. त्यांचे मोठे भाऊ उदय हे त्याच सोसायटीचे चेअरमन आहेत, जी शहरात एक शाळा चालवते. इन्स्पेक्टर जंगम यांनी सांगितलं की, परांजपे देवळातून परत येत असताना ही घटना घडली. त्यांनी मुलाला गेटवरून उडी मारताना पाहिलं. धक्काबुक्कीत डोक्याला मार लागल्यानंतर, मुलगा घाबरला आणि त्याने त्यांच्यावर जीवघेणा हल्ला केला.
• या घटनेमुळे संपूर्ण परिसरात खळबळ उडाली आहे, कारण शिक्षण क्षेत्रात परांजपे यांचं मोठं नाव होतं. कुटुंबीयांनी व्यक्त केलेल्या शंका लक्षात घेऊन तपास सुरूच राहील, असं पोलिसांनी स्पष्ट केलं आहे. अल्पवयीन मुलाला बाल न्याय कायद्यानुसार (Juvenile Justice Act) सर्व प्रक्रिया पूर्ण करून बालसुधारगृहात पाठवण्यात आल्याची माहिती अधिकाऱ्यांनी दिली.