
मेक्सिकोमध्ये एका छोट्या विमानाचे इंजिन बंद पडून ते महामार्गावर कोसळले. अपघातग्रस्त विमानाला काही क्षणांतच आग लागली, पण सुदैवाने विमानातील ६ जणांचे प्राण थोडक्यात बचावले आहेत.
ही घटना १८ नोव्हेंबर रोजी घडली. 'पायपर मालिबु ४६' (Piper Malibu 46) हे विमान मॉन्टेरी आंतरराष्ट्रीय विमानतळाच्या (Monterrey International Airport) धावपट्टीवरून घसरले. त्यानंतर ते कुंपणाला धडकून अपोडाका (Apodaca) येथील मॉन्टेरी-न्यूव्हो लॅरेडो महामार्गावर कोसळले.
हा अपघात स्थानिक वेळेनुसार दुपारी १.५० च्या सुमारास झाला. विमान कोसळताच त्याला मोठी आग लागली आणि काळ्या धुराचे लोट आकाशात पसरले. विशेष म्हणजे, या महामार्गावर वाहतूक सुरूच होती.
घटनास्थळाच्या व्हायरल व्हिडिओमध्ये महामार्गावर दोन ठिकाणी आग लागलेली दिसत आहे, तर गाड्या हळू चालवल्या जात आहेत. अग्निशमन दलाने तातडीने घटनास्थळी पोहोचून आगीवर नियंत्रण मिळवले.
विमानातील सर्व ६ जण या भीषण अपघातातून बचावले. यात ४ प्रवासी आणि २ क्रू मेंबर्स होते. मदत पथकाने त्यांची जागेवरच तपासणी केली. त्यांना किरकोळ दुखापत झाली असून कुणालाही रुग्णालयात दाखल करण्याची गरज भासली नाही.
A plane crashed onto a busy highway in Mexico and burst into flames — all six people on board survived
The Piper Malibu 46 suffered an engine failure during takeoff. The aircraft smashed through the airport perimeter fence and came down on the Monterrey–Nuevo Laredo highway,… pic.twitter.com/ofWaH6R60a— NEXTA (@nexta_tv) November 20, 2026
डेव्हिड कोरोना कॅब्रेरो (David Corona Cabrero, वय ४१) आणि ॲलन ॲड्रिन कुएवास लू (Alan Adrin Cuevas Loo, वय २५) अशी दोन क्रू मेंबर्सची नावे आहेत.
तर जोस लुईस व्हिलासेनर सांचेझ (५६), अरामांडो इझिकेल माटा (४२), कार्लोस अलेजांद्रो कॅस्टिलो पेरेझ (४०) आणि प्रिस्किला गुआडालुपे कॅरिलो फ्रॅगोसो (३६) हे चार प्रवासी होते.
'कासागो' (Casago) कंपनीचे हे विमान मेक्सिको सिटीजवळील अटिझापॅन (Atizapán) कडे जात होते.
अपघातानंतर विमानतळाची धावपट्टी काही काळासाठी बंद ठेवण्यात आली होती. विमानाचे इंजिन का बंद पडले आणि ते दिशा का भरकटले, याचा शोध घेण्यासाठी आता चौकशी सुरू करण्यात आली आहे.