Lotion Hacks: एक्सपायर झालेलं लोशन फेकू नका, या कामांसाठी भारी जुगाड!

तुमच्याकडेही एक्सपायर झालेलं लोशन आहे का? ते फेकून देण्याऐवजी तुम्ही त्याचा फर्निचर पॉलिश, लेदरच्या वस्तू चमकवण्यासाठी, अडकलेली झिप मोकळी करण्यासाठी आणि दरवाजाच्या बिजागऱ्या दुरुस्त करण्यासाठी वापरू शकता. यामुळे वस्तू वाया जात नाहीत आणि पैशांचीही बचत होते.

Expired Beauty Products Reuse: आपल्या सगळ्यांनाच लोशनच्या मोठ्या बाटल्या घरात साठवून ठेवायला आवडतात. कारण थंडी असो वा गर्मी, प्रत्येक ऋतूत हाता-पायांना लोशन लावलंच जातं. त्यामुळे आपण अनेकदा मोठ्या साईझचे कंटेनर विकत घेतो. त्यातल्या त्यात, ऑनलाइन किंवा मॉलमध्ये 'एक विकत घ्या, एक मोफत मिळवा' (Buy One, Get One Free) अशी ऑफर दिसली की आपण आनंदाने दोन-दोन बाटल्या उचलतो. पण या नादात आपण अनेकदा एक्सपायरी डेट बघायलाच विसरतो आणि पैसे वाचवण्याचा हा छोटासा प्रयत्न आपल्याला महागात पडतो.

अशावेळी, खराब किंवा एक्सपायर झालेलं लोशन त्वचेवर वापरल्यास एलर्जी, खाज, पुरळ किंवा मुरुमांसारख्या समस्या होऊ शकतात. पण म्हणून लोशनची अख्खी बाटली फेकून देण्यापेक्षा, तिचा योग्य वापर करणं कधीही चांगलं. तुमच्याकडेही अशी एखादी लोशनची बाटली असेल जी एक्सपायर झाली आहे, तर तुम्ही काही स्मार्ट टिप्स वापरून तिचा पुन्हा वापर करू शकता. चला, या स्मार्ट टिप्स आणि ट्रिक्सबद्दल जाणून घेऊया.

एक्सपायर झालेल्या लोशनचा पुन्हा वापर कसा करायचा?

फर्निचर पॉलिश म्हणून

तुम्ही तुमच्या फर्निचरला चमकवण्यासाठी लोशनचा वापर करू शकता. लोशनचा टेक्स्चर क्रीमी असल्यामुळे, लाकडी फर्निचरवर लावल्यास एक प्रकारचा संरक्षक थर तयार होतो. यामुळे फर्निचरला एक नैसर्गिक चमक येते आणि ते चांगलं स्वच्छही होतं. पण एक गोष्ट लक्षात ठेवा, लोशन खूप जास्त लावू नका, नाहीतर फर्निचर चिकट होऊ शकतं.

लेदरच्या वस्तू साफ करण्यासाठी

तुम्ही लेदरच्या वस्तू साफ करण्यासाठी आणि त्यांना मऊ बनवण्यासाठीही एक्सपायर झालेल्या लोशनचा वापर करू शकता. लोशनमध्ये ओलावा असल्यामुळे लेदरला चमक आणण्यास मदत होते. याशिवाय, तुम्ही लेदरचे शूज, सँडल, हिल्स आणि बॅग पॉलिश करण्यासाठीही लोशन वापरू शकता. यामुळे जास्त मेहनत न करता लेदरच्या वस्तू स्वच्छ आणि चमकदार दिसू लागतात.

अडकलेली झिप मोकळी करा

तुमच्या बॅगची किंवा कपड्यांची झिप अडकत असेल, तर लोशन ती मोकळी करण्यास मदत करू शकतं. अनेकदा झिप अडकते, अशावेळी तुम्ही त्यावर थोडंसं लोशन लावू शकता. फक्त हे करताना लोशन कपड्यांवर लागणार नाही याची काळजी घ्या.

दरवाजांसाठी

याशिवाय, तुम्ही दरवाजाच्या बिजागऱ्या किंवा कड्यांसाठीही लोशन वापरू शकता. अनेकदा बिजागऱ्या अडकतात किंवा त्यातून करकर असा आवाज येतो. अशावेळी लोशन लावल्यास ही समस्या दूर होते.