Retirement Planning : पगार फक्त 25 हजार? रिटायरमेंटपर्यंत जमा करा 1 कोटी रुपये, वाचा सोप्या टिप्स

तुमचा महिन्याचा पगार २५ हजार रुपये असेल, तरीही तुम्ही रिटायरमेंटपर्यंत १ कोटी रुपयांचा फंड सहज उभा करू शकता. म्युच्युअल फंडात दरमहा ४ ते १० हजार रुपयांची गुंतवणूक करून हे ध्येय कसं गाठायचं?

२५ हजारांच्या पगारात १ कोटींची बचत

तरुण वयात अनेक जण बचत आणि गुंतवणुकीकडे फारसं लक्ष देत नाहीत. साधारण ३५ किंवा ४० वय ओलांडल्यावर लोकांना रिटायरमेंटची चिंता सतावू लागते. तोपर्यंत पुरेशी बचत न झाल्याने टेन्शन येतं. पण, जुन्या गोष्टींचा विचार करत बसण्यापेक्षा आता उरलेल्या वेळेचा योग्य वापर करून फायनान्शियल प्लॅनिंग करणं गरजेचं आहे, असा सल्ला आर्थिक तज्ज्ञ देतात.

उशिरा गुंतवणूक सुरू करणाऱ्यांनी सर्वात आधी स्वतःच्या आरोग्याकडे लक्ष दिलं पाहिजे. कारण, म्हातारपणी मेडिकलचा खर्च खूप वाढतो. त्यामुळे आतापासूनच चांगलं आरोग्य जपणं आणि उत्तम हेल्थ इन्शुरन्स घेणं खूप फायद्याचं ठरतं.

तसंच, ५५ किंवा ५८ व्या वर्षी रिटायर झाल्यावरही तुम्ही तुमच्या अनुभवाच्या जोरावर फ्रीलान्सिंग किंवा पार्ट-टाइम काम करून एक्स्ट्रा इन्कम मिळवू शकता. यामुळे जुन्या बचतीवर अवलंबून राहण्याची वेळ येणार नाही. आता १ कोटींचं टार्गेट पूर्ण करण्यासाठी दरमहा किती बचत करावी लागेल, ते पाहूया.

१ कोटी रुपये कसे जमा करायचे?

जर तुमचा पगार २५ हजार रुपये असेल आणि तुम्हाला १ कोटी रुपये जमा करायचे असतील, तर म्युच्युअल फंड हा एक उत्तम पर्याय आहे. समजा, तुम्ही १२% परतावा देणाऱ्या फंडात दरमहा ४,००० रुपयांची गुंतवणूक केली, तर १ कोटी जमा करण्यासाठी तुम्हाला २८ वर्षांपेक्षा थोडा जास्त काळ (३३९ महिने) लागेल.

जर तुम्ही दरमहा ५,००० रुपये गुंतवले, तर याच १२% परताव्यानुसार तुम्हाला २६ वर्षांपेक्षा थोडा जास्त काळ (३१७ महिने) लागेल.

जर तुम्ही पगाराच्या ३०% म्हणजे ७,५०० रुपये दरमहा गुंतवले, तर २३ वर्षांत (२७६ महिन्यांत) तुम्ही १ कोटींचं टार्गेट पूर्ण करू शकता.

आणि जर तुम्ही पगाराच्या ४०% म्हणजे १०,००० रुपये दरमहा गुंतवले, तर अवघ्या २० वर्षांत (२४८ महिन्यांत) तुमच्याकडे १ कोटी रुपये जमा होतील. थोडक्यात सांगायचं तर, तुम्ही जेवढी जास्त गुंतवणूक कराल, तेवढ्या लवकर तुम्ही तुमचं ध्येय गाठू शकाल.

पैशांची बचत आणि फायनान्शियल प्लॅनिंग

ज्यांनी गुंतवणुकीला उशिरा सुरुवात केली आहे, त्यांना आपल्या रोजच्या जीवनशैलीत काही महत्त्वाचे बदल करावे लागतील. अनावश्यक खर्च, नवीन कर्ज आणि खिशाला कात्री लावणारे EMI यांसारख्या गोष्टींपासून त्यांनी लांब राहिलं पाहिजे. कोणताही खर्च करण्यापूर्वी, ती गोष्ट खरोखरच गरजेची आहे का, की तो खर्च आपण पुढे ढकलू शकतो, याचा त्यांनी गांभीर्याने विचार करायला हवा. अशी सवय लावून घेतल्यास पैशांची चांगली बचत होऊ शकते.

गुंतवणूकदारांसाठी काही महत्त्वाच्या टिप्स

भूतकाळात आपण किती बचत केली किंवा किती पैसे उडवले, हे आता आपण बदलू शकत नाही. पण, आज आपण घेतलेला प्रत्येक आर्थिक निर्णय आपल्या भविष्यावर थेट परिणाम करतो. म्हणूनच, स्वतःचं आरोग्य, उत्पन्नाचे अतिरिक्त मार्ग, खर्चावर नियंत्रण आणि म्युच्युअल फंडातील सिस्टिमॅटिक इन्व्हेस्टमेंट प्लॅन (SIP) या गोष्टींवर लक्ष केंद्रित करा. या सवयींमुळे तुम्ही तुमच्या रिटायरमेंटसाठी एक भक्कम आणि सुरक्षित फायनान्शियल प्लॅन नक्कीच तयार करू शकता.