Rail Neer GST Cut : भारतीय रेल्वेचा प्रवाशांना दिलासा, उद्यापासून पाणी होणार स्वस्त!

Rail Neer GST Cut : GST दरातील कपातीचा फायदा ग्राहकांपर्यंत पोहोचवण्यासाठी भारतीय रेल्वेने रेल्वे स्टेशनवर मिळणाऱ्या पाण्याच्या बाटल्या स्वस्त करण्याचा निर्णय घेतला आहे. 'रेल नीर'च्या नवीन किमती येथे जाणून घ्या.

कर कपात लागू, रेल्वे प्रवाशांना फायदा

रेल्वे मंत्रालयाने घोषणा केली आहे की GST कर दरातील कपातीमुळे 'रेल नीर' स्वस्त होणार आहे. सरकारने अनेक वस्तूंवरील कर कमी केला असून, नवीन दर 22 सप्टेंबरपासून लागू होतील.

रेल नीर पिण्याच्या पाण्याची नवीन किंमत

रेल्वे बोर्डाच्या परिपत्रकानुसार, 1 लिटर 'रेल नीर' बाटलीची किंमत ₹15 वरून ₹14 झाली आहे, तर 500 मिलीची बाटली ₹10 ऐवजी ₹9 ला मिळेल. नवीन दर 22 सप्टेंबरपासून लागू होतील.

देशभरात नवीन दर लागू होणार

मंत्रालयाने X वर पोस्ट केले आहे की, "कमी झालेल्या GST चा फायदा थेट ग्राहकांना देण्यासाठी, 'रेल नीर'ची कमाल विक्री किंमत 1 लिटरसाठी 15 रुपयांवरून 14 रुपये आणि अर्ध्या लिटरसाठी 10 रुपयांवरून 9 रुपये करण्याचा निर्णय घेण्यात आला आहे."

देशभरातील रेल्वे स्टेशन आणि ट्रेनमध्ये विकल्या जाणाऱ्या विविध ब्रँडच्या पॅकेज्ड पाण्याच्या बाटल्यांनाही ही नवीन कमाल किरकोळ किंमत लागू होईल. परिपत्रकात म्हटले आहे की, "त्यानुसार आवश्यक कारवाई केली जावी."