PM Kisan 21th installment: PM Kisan 21 वा हप्ता नोव्हेंबरमध्ये! पैसे खात्यात येणार, आजच तपासा तुमचं नाव यादीत आहे का?

PM Kisan 21th installment: प्रधानमंत्री किसान सन्मान निधी (PM-Kisan) योजनेचा २१ वा हप्ता लवकरच शेतकऱ्यांच्या खात्यात जमा होणार आहे. आचारसंहितेचा यावर कोणताही परिणाम होणार नसून, नोव्हेंबरच्या पहिल्या आठवड्यात पैसे मिळण्याची शक्यता आहे. 

देशभरातील लाखो शेतकऱ्यांसाठी आनंदाची बातमी!

मुंबई: प्रधानमंत्री किसान सन्मान निधी (PM-Kisan) योजनेचा २१ वा हप्ता आता लवकरच थेट शेतकऱ्यांच्या खात्यात जमा होणार आहे. या योजनेअंतर्गत केंद्र सरकार दरवर्षी ₹6,000 ची थेट आर्थिक मदत शेतकऱ्यांना देते, जी तीन समान हप्त्यांमध्ये वितरित केली जाते. आतापर्यंत २० हप्ते वितरित झाले असून, आता शेतकरी २१ व्या हप्त्याची उत्सुकतेने वाट पाहत आहेत. 

आचारसंहिता लागू असूनही हप्ता थांबणार नाही

बिहारमध्ये सध्या निवडणूक आचारसंहिता लागू असल्याने काही शेतकऱ्यांमध्ये संभ्रम होता की, या काळात हप्ता जमा होईल का? परंतु अधिकृत सूत्रांच्या माहितीनुसार आचारसंहितेदरम्यान नवीन योजना सुरू करता येत नाही, मात्र पूर्वी मंजूर झालेल्या योजनांचे पैसे वितरित करण्यात कोणताही अडथळा नाही. म्हणूनच PM-Kisan योजनेअंतर्गत येणारा निधी वेळेवर जमा होईल, अशी खात्री केंद्र सरकारकडून देण्यात आली आहे. 

२१ वा हप्ता कधी मिळणार?

अधिकृत तारीख अद्याप जाहीर झालेली नसली तरी कृषी मंत्रालयाच्या सूत्रांनुसार, नोव्हेंबरच्या पहिल्या आठवड्यातच पैसे खात्यात जमा होण्याची शक्यता आहे. गेल्या ऑगस्ट महिन्यात पंतप्रधान नरेंद्र मोदी यांनी २० वा हप्ता जाहीर केला होता, ज्याचा लाभ ९.८ कोटी शेतकऱ्यांना, त्यात २.४ कोटी महिला शेतकऱ्यांसह, मिळाला होता. सामान्यतः फेब्रुवारी, जून आणि ऑक्टोबर-नोव्हेंबर या कालावधीत हप्ते दिले जातात. त्यामुळे या वेळीही नोव्हेंबरच्या सुरुवातीला निधी वितरित होण्याची अपेक्षा आहे. 

ई-केवायसी पूर्ण करणं अत्यावश्यक

२१ वा हप्ता मिळवण्यासाठी शेतकऱ्यांनी ई-केवायसी (e-KYC) प्रक्रिया पूर्ण करणे आवश्यक आहे. ही प्रक्रिया पीएम-किसानच्या अधिकृत वेबसाइटवरून केली जाऊ शकते.

https://pmkisan.gov.in या संकेतस्थळावर लॉगिन करा

“e-KYC” पर्याय निवडा

OTP किंवा बायोमेट्रिक पद्धतीने प्रमाणीकरण पूर्ण करा

ज्यांनी अद्याप ई-केवायसी पूर्ण केली नाही, त्यांचे पैसे थांबू शकतात. त्यामुळे सर्व लाभार्थ्यांनी तातडीने KYC अपडेट करणे गरजेचे आहे, असे कृषी मंत्रालयाने स्पष्ट केले आहे. 

हप्ता जमा झाला का, कसं तपासायचं?

शेतकरी आपल्या हप्त्याची स्थिती काही क्षणांत तपासू शकतात.

pmkisan.gov.in या संकेतस्थळावर जा

“Know Your Status” या पर्यायावर क्लिक करा

तुमचा नोंदणी क्रमांक आणि कॅप्चा कोड भरा

“Get Data” वर क्लिक करा

त्यानंतर तुमच्या हप्त्याची स्थिती स्क्रीनवर दिसेल.

तसेच, “Beneficiary List” या पर्यायावर क्लिक करून आपल्या गावातील सर्व लाभार्थ्यांची यादी देखील पाहता येईल. 

सरकारचा उद्देश, शेतकऱ्यांच्या खात्यात थेट मदत

PM-Kisan योजनेद्वारे सरकारचा उद्देश शेतकऱ्यांना आर्थिकदृष्ट्या सबळ बनवणे हा आहे. या योजनेतून मिळणारे पैसे शेतकऱ्यांना बियाणे, खत, शेतीसाठी लागणारे साहित्य आणि दैनंदिन गरजांसाठी उपयोगी पडतात. २१ व्या हप्त्यामुळे पुन्हा एकदा लाखो शेतकऱ्यांच्या चेहऱ्यावर समाधान झळकणार आहे.