कमी नफा असलेल्या या क्षेत्रात, तुम्ही महिन्याला किती लाख लिटर पेट्रोल आणि डिझेल विकता यावरच तुमचं उत्पन्न ठरतं. एका सामान्य शहरातील पंपावर महिन्याला १,७०,००० लिटर इंधन (उदा. ४०% पेट्रोल, ६०% डिझेल) विकलं गेल्यास साधारण १.७५ कोटींचा व्यवसाय होतो, असा अंदाज आहे. पण ही सर्व रक्कम मालकाचं उत्पन्न नसते. इंधन खरेदी आणि कर वजा केल्यावर साधारण ६,०७,००० इतकं कमिशन मिळण्याचा अंदाज आहे.
कर्मचाऱ्यांचे पगार (१० लोकांसाठी साधारण १,६०,०००), वीज आणि देखभाल (₹५०,०००), तेल कंपन्यांचे इतर चार्जेस (३०,०००), बाष्पीभवनामुळे होणारे नुकसान / इव्हॅपोरेशन लॉस (₹२५,०००), कर्जावरील व्याज (१७,०००), पंप दुरुस्ती-ऑडिटर फी-इतर खर्च (४०,०००) वजा केल्यास साधारण २,६५,००० उरतात. गुंतवणुकीसाठी कर्ज घेतलं असेल (उदा. १.१२ कोटींच्या कर्जावर १०% व्याजाने १० वर्षांसाठी जवळपास १.५ लाखांचा ईएमआय) तर हातात उरणारी रक्कम साधारण १,१६,००० इतकीच असते.
कमी रहदारी असलेल्या लहान भागांच्या तुलनेत, हायवेवरील पंपांवर जास्त डिझेल ट्रक येत असल्याने तिथे जास्त उत्पन्न (साधारण ३ लाख ते ४ लाखांपर्यंत) मिळू शकते. तसेच ईव्ही आणि सीएनजी वाहनांची संख्या वाढत असल्याने, सुविधा स्टोअर्स, कॅफे, कार वॉश, ईव्ही चार्जिंग यांसारख्या सेवांकडेही पंप चालकांचा कल वाढत आहे. कर्ज फिटल्यावर ईएमआयचा भार कमी होऊन दीर्घकाळात उत्पन्नात सुधारणा होते.