Perplexity ने अँड्रॉइडसाठी लॉन्च केला Comet AI ब्राउझर, Google Chrome ला देणार टक्कर!
सार
Perplexity Launches Comet AI Browser : जगात सर्वाधिक वापरल्या जाणाऱ्या गुगल क्रोम या इंटरनेट ब्राउझरला आव्हान देण्याच्या उद्देशाने Perplexity ने Comet ब्राउझर सादर केला आहे.
Perplexity Launches Comet AI Browser : AI सर्च इंजिन Perplexity चा Comet ब्राउझर आता अँड्रॉइड वापरकर्त्यांसाठी उपलब्ध झाला आहे. Comet हा AI वर आधारित काम करणारा ब्राउझर आहे. या ब्राउझरमुळे अँड्रॉइड वापरकर्त्यांना ब्राउझिंग करताना Perplexity च्या बिल्ट-इन AI असिस्टंटचा वापर करता येईल. Comet AI ब्राउझरची iOS आवृत्ती कधी लाँच होणार याबाबत Perplexity ने अद्याप माहिती दिलेली नाही. Comet ची वेब आवृत्ती यापूर्वीच उपलब्ध होती.
Comet ब्राउझर आता अँड्रॉइडवर
Perplexity ने AI-आधारित वेब ब्राउझर Comet ची अँड्रॉइड आवृत्ती सादर केली आहे. मोबाईल प्लॅटफॉर्मवर येणाऱ्या पहिल्या AI-नेटिव्ह ब्राउझरपैकी Comet एक आहे. ChatGPT चा Atlas ब्राउझर फक्त macOS साठी लाँच झाला होता, तर Comet आता मोबाईल फोनवरही उपलब्ध झाला आहे. Comet ची डेस्कटॉप आवृत्ती Perplexity Max सदस्यांसाठी जुलै 2025 मध्ये सादर करण्यात आली होती. तथापि, Comet च्या डेस्कटॉप आवृत्तीमधील काही फीचर्स अँड्रॉइड प्लॅटफॉर्मवर उपलब्ध नाहीत. Perplexity च्या प्रवक्त्या बिजॉली शाह यांनी स्पष्ट केले की, येत्या काही आठवड्यांत डेस्कटॉप आणि मोबाईल आवृत्त्यांमध्ये ब्राउझिंग हिस्ट्री आणि बुकमार्क सिंक केले जातील. यासोबतच, एजंटिक व्हॉईस मोड आणि बिल्ट-इन पासवर्ड मॅनेजर देखील Comet मध्ये विकसित केले जात आहेत. तोपर्यंत, Comet अँड्रॉइडच्या नेटिव्ह पासवर्ड मॅनेजरवर काम करेल.
AI असिस्टंट, व्हॉईस इंटरॅक्शन, क्रॉस-टॅब समरायझेशन, ॲड ब्लॉकिंग आणि कॉन्टेक्स्चुअल असिस्टंट ही अँड्रॉइड Comet मधील प्रमुख फीचर्स आहेत.
Comet AI ब्राउझर म्हणजे काय?
Perplexity ने जुलै महिन्यात AI-आधारित ब्राउझर म्हणून Comet सादर केला. ऑगस्टमध्ये Perplexity ने Comet Plus देखील सादर केला. जगात सर्वाधिक वापरल्या जाणाऱ्या गुगल क्रोम या इंटरनेट ब्राउझरला आव्हान देण्याच्या उद्देशाने Perplexity ने Comet सादर केला आहे. Comet ब्राउझरची रचना एका AI एजंटप्रमाणे केली आहे. हे सर्व टॅब मॅनेज करू शकते, ईमेल आणि कॅलेंडर इव्हेंट्सचा सारांश देऊ शकते आणि वेब पेजेसवर नेव्हिगेट करू शकते. एक वर्कस्पेस जिथे सर्व आवश्यक माहिती सहज उपलब्ध होते आणि वेबपेज ईमेल म्हणून पाठवण्याची क्षमता यांसारखी वैशिष्ट्ये Comet ला गुगल क्रोम आणि मायक्रोसॉफ्ट एज सारख्या इतर वेब ब्राउझरपेक्षा वेगळे ठरवतात.