Cosmetic Acupuncture: चेहऱ्यावर इतक्या सुया? शाहिदच्या बायकोच्या ग्लोइंग स्किनचं हे आहे सीक्रेट!

अभिनेता शाहिद कपूरची पत्नी मीरा राजपूतने कॉस्मेटिक अ‍ॅक्युपंक्चरचा व्हिडिओ शेअर केल्यापासून या ब्यूटी ट्रीटमेंटची जोरदार चर्चा सुरू आहे. जाणून घेऊया हे नेमकं काय आहे आणि त्याने त्वचेला कसा फायदा होतो.

अभिनेता शाहिद कपूरची पत्नी मीरा राजपूतने नुकताच सोशल मीडियावर एक व्हिडिओ शेअर केला. यात ती 'कॉस्मेटिक अ‍ॅक्युपंक्चर' नावाची ट्रीटमेंट घेताना दिसतेय. तिच्या चेहऱ्यावर अनेक सुया लावलेल्या पाहून तिचे चाहते चकित झाले. हे पाहिल्यावर खूप वेदना होत असतील असं वाटतं, पण प्रत्यक्षात तसं काही नाहीये. आजकाल त्वचा चमकदार आणि तरुण दिसण्यासाठी 'कॉस्मेटिक अ‍ॅक्युपंक्चर' ही ब्यूटी ट्रीटमेंट खूप लोकप्रिय होत आहे. यामुळे फक्त रक्ताभिसरण (blood circulation) सुधारत नाही, तर त्वचा नैसर्गिकरित्या निरोगी राहण्यासही मदत होते. मीरा राजपूतने तिच्या व्हिडिओमध्ये या ट्रीटमेंटमुळे त्वचेला होणारे फायदेही सांगितले आहेत. चला तर मग जाणून घेऊया कॉस्मेटिक अ‍ॅक्युपंक्चरचे नेमके काय फायदे आहेत.

त्वचेवर नैसर्गिक चमक येते

कॉस्मेटिक अ‍ॅक्युपंक्चरमुळे रक्ताभिसरण वाढतं, ज्यामुळे त्वचेला भरपूर ऑक्सिजन मिळतो. यामुळे चेहऱ्यावर एक नैसर्गिक चमक येते.

सुरकुत्या कमी होतात

ही ट्रीटमेंट घेतल्यास त्वचेतील कोलेजन (collagen) निर्मितीला चालना मिळते. यामुळे चेहऱ्यावरील बारीक सुरकुत्या हळूहळू कमी होऊ लागतात. वाढत्या वयात ही ट्रीटमेंट घेतल्यास याचा परिणाम स्पष्टपणे दिसून येतो.

त्वचा घट्ट होण्यास मदत

कॉस्मेटिक अ‍ॅक्युपंक्चरमुळे चेहऱ्याच्या त्वचेत चांगलाच कसाव येतो आणि चेहरा तरुण दिसू लागतो. जर तुमची त्वचा सैल पडली असेल, तर या ट्रीटमेंटने ती पुन्हा घट्ट होऊ शकते.

मुरुम आणि डागांपासून सुटका

काही लोकांना मुरुम (acne) किंवा चेहऱ्यावरील डागांची समस्या असते. अशावेळी कॉस्मेटिक अ‍ॅक्युपंक्चर ट्रीटमेंट फायदेशीर ठरू शकते. यामुळे त्वचेचा पोत (skin texture) देखील सुधारतो.

चेहऱ्यावरची सूज कमी होते

काही लोकांच्या चेहऱ्यावर नेहमी सूज किंवा पफीनेस (puffiness) दिसतो. तुम्हालाही हा त्रास असेल तर कॉस्मेटिक अ‍ॅक्युपंक्चर हा एक चांगला उपाय आहे. यामुळे तुमचा चेहरा अधिक फ्रेश आणि संतुलित दिसतो.

कॉस्मेटिक अ‍ॅक्युपंक्चर फक्त त्वचेसाठीच नाही, तर शरीराला आराम देण्यासाठीही (relaxation) मदत करते. अनेक लोकांना ही ट्रीटमेंट घेतल्यावर तणाव कमी झाल्यासारखं वाटतं. पण लक्षात ठेवा, तुम्हाला जर ही ट्रीटमेंट करायची असेल, तर ती नेहमी तज्ज्ञांच्या देखरेखीखालीच करावी.