LPG Crisis : तुमच्या शहरात गॅसची टंचाई? घरातील सिलिंडर संपला की नाही या 3 सोप्या ट्रिक्सने तपासा

LPG Crisis : अनेक शहरांमध्ये एलपीजी सिलिंडरची टंचाई जाणवत असल्याने नागरिकांची चिंता वाढली आहे. अशा परिस्थितीत घरातील गॅस सिलिंडरमध्ये किती गॅस शिल्लक आहे हे आधीच समजले तर मोठी अडचण टाळता येते. काही सोप्या ट्रिक्स वापरून सिलिंडरमधील गॅस संपत आला आहे की नाही हे सहज ओळखता येते.

LPG Crisis : अलीकडच्या काळात अनेक शहरांमध्ये एलपीजी गॅस सिलिंडरच्या पुरवठ्यात अडचणी निर्माण झाल्याच्या बातम्या समोर येत आहेत. अचानक सिलिंडर संपल्यास स्वयंपाक करताना मोठी गैरसोय होऊ शकते. विशेषतः टंचाईच्या काळात नवीन सिलिंडर मिळण्यास विलंब होण्याची शक्यता असते. त्यामुळे घरातील सिलिंडरमध्ये किती गॅस उरला आहे हे आधीच तपासणे महत्त्वाचे ठरते. काही सोप्या आणि सुरक्षित पद्धती वापरून तुम्ही घरच्या घरीच सिलिंडरमधील गॅसचे प्रमाण अंदाजे ओळखू शकता.

ओल्या कापडाची ट्रिक वापरा

सिलिंडरमध्ये किती गॅस उरला आहे हे तपासण्याची सर्वात सोपी पद्धत म्हणजे ओल्या कापडाचा वापर. सर्वप्रथम सिलिंडरवर ओले कापड गुंडाळा आणि काही मिनिटे थांबा. त्यानंतर कापड काढून सिलिंडरवर हात फिरवा. ज्या भागात गॅस असेल तो भाग थंड वाटतो, तर रिकामा भाग गरम वाटतो. यामुळे सिलिंडरमध्ये किती गॅस उरला आहे याचा अंदाज सहज लावता येतो.

सिलिंडरचे वजन तपासा

सिलिंडरमध्ये गॅस किती उरला आहे हे तपासण्यासाठी वजन पाहणेही उपयुक्त ठरते. प्रत्येक सिलिंडरवर त्याचे रिकामे वजन (Tare Weight) लिहिलेले असते. सिलिंडरचे सध्याचे वजन करून त्यातून रिकामे वजन वजा केले तर गॅसचे अंदाजे वजन कळू शकते. त्यामुळे गॅस संपायला किती वेळ लागेल याचा अंदाज लावता येतो.

गॅस फ्लेमकडे लक्ष द्या

गॅस संपत आल्यावर स्टोव्हची ज्वाळा कमी आणि पिवळसर दिसू लागते. स्वयंपाक करताना ज्वाळा अचानक कमी होत असेल किंवा गॅसचा प्रेशर कमी वाटत असेल तर सिलिंडर संपण्याची शक्यता असते. अशावेळी वेळेत नवीन सिलिंडर बुक करणे योग्य ठरते.

टंचाईच्या काळात आधीच तयारी करा

गॅसची टंचाई असताना सिलिंडर संपल्यानंतरच बुकिंग करण्याऐवजी आधीच त्याची स्थिती तपासणे फायदेशीर ठरते. शक्य असल्यास घरात अतिरिक्त सिलिंडर ठेवणे किंवा वेळेत बुकिंग करणेही आवश्यक आहे. तसेच सिलिंडर वापरताना सुरक्षिततेचे नियम पाळणे अत्यंत महत्त्वाचे आहे.