Xiaomi 17 Series: कॅमेऱ्यात क्रांती? शाओमीचा आतापर्यंतचा सर्वात महागडा फोन भारतात दाखल!
सार
Xiaomi 17 Series शाओमीने भारतात आपली नवी फ्लॅगशिप सिरीज - शाओमी 17 आणि शाओमी 17 अल्ट्रा लाँच केली आहे. प्रसिद्ध कॅमेरा कंपनी 'लायका' (Leica) सोबत मिळून बनवलेले कॅमेरे हे याचं मुख्य आकर्षण आहे. अल्ट्रा मॉडेलमध्ये तर 200MP चा टेलीफोटो लेन्सही दिला आहे.
Xiaomi 17 Series नवी दिल्ली: चायनीज स्मार्टफोन ब्रँड शाओमीने (Xiaomi) भारतात आपली नवी फ्लॅगशिप सिरीज, शाओमी 17, लाँच केली आहे. या सिरीजमध्ये शाओमी 17 आणि शाओमी 17 अल्ट्रा हे दोन मॉडेल्स सादर करण्यात आले आहेत. जर्मनीची प्रसिद्ध लेन्स कंपनी 'लायका' (Leica) सोबत मिळून शाओमीने या दोन्ही फोन्सचे कॅमेरे तयार केले आहेत. 200MP टेलीफोटो लेन्स, मोठी बॅटरी आणि दमदार प्रोसेसर ही या फोन्सची खासियत आहे. विशेष म्हणजे, शाओमी 17 अल्ट्रा हा भारतात लाँच झालेला कंपनीचा आतापर्यंतचा सर्वात महागडा स्मार्टफोन ठरला आहे.
शाओमी 17: चिप, डिस्प्ले, कॅमेरा, बॅटरी
शाओमी 17 मध्ये नवीन स्नॅपड्रॅगन 8 एलाईट जेन 5 चिपसेट वापरण्यात आला आहे. 3nm आर्किटेक्चरवर बनलेला हा प्रोसेसर उत्तम परफॉर्मन्स आणि कमी बॅटरी वापरेल, असा कंपनीचा दावा आहे. या फोनमध्ये 16GB पर्यंत रॅम आणि 512GB पर्यंत UFS 4.1 स्टोरेजचा पर्याय मिळतो. फोन जास्त गरम होऊ नये यासाठी 3D आइसलूप कूलिंग सिस्टीमही देण्यात आली आहे. डिस्प्लेबद्दल बोलायचं झाल्यास, यात 6.3-इंचाचा क्रिस्टलरेस OLED स्क्रीन आहे. 2656×1220 रिझोल्यूशन, 120Hz ॲडाप्टिव्ह रिफ्रेश रेट, 3,500 निट्सची पीक ब्राईटनेस, HDR10+ आणि डॉल्बी व्हिजन सपोर्ट यांसारखी फीचर्स यात आहेत.
या फोनचं मुख्य आकर्षण म्हणजे त्याचा कॅमेरा. 'लायका'च्या मदतीने बनवलेली ट्रिपल रिअर कॅमेरा सिस्टीम यात आहे. यात 50-मेगापिक्सलचा मुख्य कॅमेरा, 50-मेगापिक्सलचा टेलीफोटो कॅमेरा आणि 50-मेगापिक्सलचा अल्ट्रा-वाइड कॅमेरा आहे. सेल्फीसाठीही 50-मेगापिक्सलचा ऑटोफोकस कॅमेरा दिला आहे. या कॅमेऱ्यांमधून 8K व्हिडिओ रेकॉर्डिंगही करता येते.
फोनमध्ये 6,330 mAh क्षमतेची बॅटरी आहे, जी 100W वायर्ड हायपरचार्ज आणि 50W वायरलेस चार्जिंगला सपोर्ट करते. फोनला IP68 डस्ट-वॉटर रेझिस्टन्स रेटिंग मिळालं आहे. कनेक्टिव्हिटीसाठी वाय-फाय 7, ब्लूटूथ 6.0, NFC आणि यूएसबी टाइप-सी पोर्ट आहे. डॉल्बी ॲटमॉस सपोर्ट असलेले स्टिरिओ स्पीकर्स आणि चार मायक्रोफोनही यात आहेत. सुरक्षेसाठी अल्ट्रासॉनिक इन-डिस्प्ले फिंगरप्रिंट सेन्सर आणि AI फेस अनलॉकची सोय आहे.
भारतात शाओमी 17 च्या 12GB रॅम + 256GB स्टोरेज मॉडेलची किंमत 89,999 रुपये आहे. तर 12GB + 512GB मॉडेलसाठी 99,999 रुपये मोजावे लागतील. हा फोन ब्लॅक, आइस ब्लू आणि व्हेंचर ग्रीन या रंगांमध्ये उपलब्ध असेल. 18 मार्चपासून ॲमेझॉन, शाओमी इंडियाची वेबसाइट आणि शाओमीच्या रिटेल स्टोअर्समधून याची विक्री सुरू होईल. कंपनीने सुरुवातीच्या काळात काही ग्राहकांसाठी खास ऑफर्स जाहीर केल्या आहेत, ज्यात जास्त स्टोरेजचं मॉडेल कमी किमतीत मिळण्यासोबतच काही सबस्क्रिप्शन सेवांचे फायदेही दिले जातील.
शाओमी 17 अल्ट्रा: काय आहे खास?
दुसरीकडे, शाओमी 17 अल्ट्रा हा एकाच स्टोरेज व्हेरिएंटमध्ये येतो आणि त्याची किंमत 1,39,999 रुपये आहे. यात 16GB रॅम आणि 512GB स्टोरेज मिळतं. हायपरओएसवर चालणाऱ्या या फोनमध्ये 6.9-इंचाचा OLED डिस्प्ले, 3,500 निट्सची पीक ब्राईटनेस आणि स्नॅपड्रॅगन 8 एलाईट जेन 5 चिपसेट आहे. कॅमेऱ्याबद्दल बोलायचं तर, यात 50MP मुख्य सेन्सर, 200MP टेलीफोटो सेन्सर (120x पर्यंत डिजिटल झूम), 50MP अल्ट्रा-वाइड कॅमेरा आणि 50MP सेल्फी कॅमेरा आहे. या फोनमध्ये 6,000 mAh बॅटरी असून ती 90W वायर्ड आणि 50W वायरलेस फास्ट चार्जिंगला सपोर्ट करते. विशेष म्हणजे, शाओमी 17 अल्ट्रासोबत 19,999 रुपये किमतीची 'शाओमी फोटोग्राफी किट' मोफत दिली जाणार आहे.