Hyundai Price Hike: ह्युंदाईच्या गाड्या महागणार, सप्टेंबरपासून नव्या किमती लागू!

ह्युंदाई मोटर इंडियाने सप्टेंबर 2026 पासून आपल्या गाड्यांच्या किमतीत 1 टक्क्यांपर्यंत वाढ करण्याची घोषणा केली आहे. कच्च्या मालाच्या वाढत्या किमती हे यामागील प्रमुख कारण असून, या वर्षातील ही तिसरी दरवाढ आहे. ग्रँड i10 निओसपासून ते आयोनिक 5 पर्यंत सर्वच मॉडेल्सना ही दरवाढ लागू होईल.

ह्युंदाईची कार घेण्याचा विचार करत असाल, तर तुमच्यासाठी ही महत्त्वाची बातमी आहे. ह्युंदाई मोटर इंडियाने जाहीर केलं आहे की, सप्टेंबर 2026 पासून भारतातील त्यांच्या सर्व मॉडेल्सच्या किमती 1 टक्क्यांपर्यंत वाढणार आहेत. कच्चा माल आणि वाहतूक खर्चात झालेली वाढ हे या दरवाढीमागील प्रमुख कारण असल्याचं कंपनीने स्पष्ट केलं आहे. जागतिक पातळीवरील राजकीय आणि आर्थिक अनिश्चिततेमुळे कंपनीच्या खर्चावर दबाव वाढत आहे. हा अतिरिक्त खर्चाचा बोजा कमीत कमी ग्राहकांवर टाकण्याचा कंपनीचा प्रयत्न असला तरी, खर्च सतत वाढत असल्याने त्याचा काही भाग ग्राहकांवर टाकणं गरजेचं झालं आहे, असं ह्युंदाईने म्हटलं आहे.

मॉडेलनुसार किमतीत बदल होणार

ह्युंदाईच्या एन्ट्री-लेव्हल मॉडेल ग्रँड i10 निओसपासून ते प्रीमियम इलेक्ट्रिक एसयूव्ही आयोनिक 5 पर्यंत सर्वच गाड्यांना ही नवीन दरवाढ लागू होईल. सध्या ह्युंदाईच्या गाड्यांची किंमत अंदाजे 5.60 लाख रुपयांपासून ते 55.70 लाख रुपयांपर्यंत आहे. मात्र, सप्टेंबरमध्ये कोणत्या मॉडेलची आणि व्हेरियंटची किंमत किती वाढेल, हे लवकरच स्पष्ट होईल.

2026 मधील ही तिसरी दरवाढ

2026 या वर्षात ह्युंदाईने गाड्यांच्या किमती वाढवण्याची ही तिसरी वेळ आहे. याआधी 1 जानेवारीपासून कंपनीने वाहनांच्या किमतीत सुमारे 0.6 टक्क्यांनी वाढ केली होती. त्यानंतर एप्रिलमध्ये पुन्हा एकदा 1 टक्का दरवाढ जाहीर करण्यात आली, जी 1 जूनपासून लागू झाली. त्यावेळी मॉडेल आणि व्हेरियंटनुसार गाड्यांच्या किमती 12,800 रुपयांपर्यंत वाढल्या होत्या.

निर्यातीतही घट झाली

यावर्षी ह्युंदाईच्या व्यवसायावर अनेक गोष्टींचा परिणाम झाला आहे. 2026-27 या आर्थिक वर्षाच्या पहिल्या तिमाहीत, म्हणजे एप्रिल ते जून या काळात कंपनीच्या निर्यातीत मोठी घट नोंदवण्यात आली. पश्चिम आशियातील संघर्ष आणि कंपनीचा एक प्रमुख पुरवठादार असलेल्या 'मोबिस' (Mobis) च्या फॅक्टरीला लागलेल्या आगीमुळे उत्पादनावर तात्पुरता परिणाम झाला होता. याचाच परिणाम निर्यातीवरही दिसून आला.

निर्यात 19.6% नी घटली

मागील आर्थिक वर्षाच्या याच काळात ह्युंदाईने 48,140 वाहनांची निर्यात केली होती. मात्र, 2026-27 च्या पहिल्या तिमाहीत ही निर्यात 38,708 युनिट्सवर आली. ही घट सुमारे 19.6% आहे. कच्च्या मालाच्या वाढत्या किमती आणि जागतिक आर्थिक परिस्थितीतील अनिश्चितता लक्षात घेऊनच सप्टेंबरपासून ही नवीन दरवाढ लागू केली जात असल्याचं ह्युंदाईने स्पष्ट केलं आहे.