Honda Hybrid: होंडाची हायब्रीड 'पॉवर' प्ले! बाजारात येणार एकापेक्षा एक दमदार गाड्या

Honda Hybrid जपानची प्रसिद्ध कार कंपनी होंडा भारतीय बाजारात जोरदार कमबॅक करण्याच्या तयारीत आहे. यासाठी कंपनी हायब्रीड गाड्यांवर लक्ष केंद्रित करणार आहे.

जापानची प्रसिद्ध कार कंपनी होंडा (Honda) भारतीय बाजारात पुन्हा एकदा आपला दबदबा निर्माण करण्यासाठी सज्ज झाली आहे. या कमबॅकसाठी कंपनीने हायब्रीड गाड्यांवर लक्ष केंद्रित केलं आहे. कंपनी आपल्या येणाऱ्या गाड्यांमध्ये चांगलं मायलेज देण्यासाठी स्ट्रॉंग हायब्रीड व्हर्जन आणणार आहे. यामुळे होंडाच्या गाड्या भविष्यात येणाऱ्या CAFE (कॉर्पोरेट ॲव्हरेज फ्युएल इकॉनॉमी) नियमांचं पालन करतील. कंपनीच्या या नवीन गाड्यांमध्ये होंडा सिटी हायब्रीड फेसलिफ्ट आणि प्रेल्युड हायब्रीड कुपे यांचा समावेश आहे. चला तर मग, या गाड्यांबद्दल सविस्तर जाणून घेऊया.

होंडा सिटी हायब्रीड फेसलिफ्ट (Honda City Hybrid Facelift)

सध्या होंडा सिटी दोन वेगवेगळ्या व्हर्जनमध्ये उपलब्ध आहे - एक रेग्युलर सेडान आणि दुसरी e:HEV हायब्रीड सेडान. यावर्षी रेग्युलर सेडानला एक फेसलिफ्ट मिळणार आहे, ज्यामुळे गाडीच्या डिझाइनमध्ये मोठे बदल आणि काही नवीन फीचर्स मिळण्याची शक्यता आहे. यासोबतच, e:HEV व्हर्जनलाही लवकरच अपडेट मिळण्याची अपेक्षा आहे. रिपोर्ट्सनुसार, नेक्स्ट जनरेशन सिटी आणि सिटी e:HEV 2028 मध्ये लाँच होऊ शकतात, ज्यात मोठे बदल दिसतील. या गाड्या नवीन PF2 प्लॅटफॉर्मवर आधारित असतील आणि त्यात सुधारित हायब्रीड पॉवरट्रेन दिली जाईल.

होंडा ZR-V हायब्रीड एसयूव्ही (Honda ZR-V Hybrid SUV)

होंडा भारतात ZR-V लाँच करून आपल्या एसयूव्ही लाइनअपचा विस्तार करण्याच्या विचारात आहे. मात्र, ही गाडी मोठ्या प्रमाणात विकली जाणार नाही. ही गाडी थेट परदेशातून आयात (CBU) केली जाईल, त्यामुळे तिची किंमत जास्त असेल. ZR-V एक टेक्नोलॉजीने परिपूर्ण एसयूव्ही असेल. यात 9-इंचाची टचस्क्रीन, 12-स्पीकर बोस ऑडिओ सिस्टीम, पॉवर टेलगेट, पॅनोरॅमिक सनरूफ आणि 10.2-इंचाचा डिजिटल इन्स्ट्रुमेंट क्लस्टर यांसारखे फीचर्स मिळतील. पण या गाडीची सर्वात मोठी खासियत तिचं इंजिन असेल. ZR-V मध्ये ड्युअल-मोटर सेटअपसह 2.0-लिटर हायब्रीड पेट्रोल इंजिन मिळेल, जे 184 हॉर्सपॉवरची एकत्रित पॉवर देईल. या गाडीत ऑल-व्हील ड्राइव्ह (AWD) सिस्टीमही असेल.

होंडा प्रेल्युड हायब्रीड कुपे (Honda Prelude Hybrid Coupe)

नवीन प्रेल्युड भारतात येण्यासाठी सज्ज आहे. ही टू-डोअर कुपे कार 2026 च्या पहिल्या सहामाहीत लाँच होईल. यात 2.0-लिटर हायब्रीड पेट्रोल इंजिन दिलं जाईल, जे सुमारे 200 हॉर्सपॉवरची पॉवर निर्माण करेल. प्रेल्युड सुद्धा CBU मार्गाने भारतात येईल, त्यामुळे तिची किंमत प्रीमियम असेल. रिपोर्ट्सनुसार, तिची एक्स-शोरूम किंमत सुमारे 80 लाख रुपये असू शकते. ही गाडी होंडाची सर्वात एक्सक्लुझिव्ह आणि प्रीमियम कार ठरेल.

होंडा एलिव्हेट हायब्रीड (Honda Elevate Hybrid)

सध्याच्या जनरेशनच्या होंडा एलिव्हेटला 2026 च्या दुसऱ्या सहामाहीत फेसलिफ्ट मिळण्याची शक्यता आहे. कॉस्मेटिक बदलांव्यतिरिक्त, यात नवीन हायब्रीड पॉवरट्रेन दिली जाईल. ही सिस्टीम सध्याच्या सिटी e:HEV मध्ये वापरल्या जाणाऱ्या सिस्टीमपेक्षा वेगळी असेल. यात हलक्या वजनाची बॅटरी पॅक आणि जास्त एनर्जी डेन्सिटी असलेली इलेक्ट्रिक मोटर वापरली जाईल. ही नवीन सिस्टीम अधिक किफायतशीर आणि कमी गुंतागुंतीची असेल, ज्यामुळे तिची दुरुस्ती करणं सोपं होईल. कंपनी या सेटअपसोबत 1.5-लिटर ॲटकिन्सन सायकल पेट्रोल इंजिन देईल. यात e-CVT ऑटोमॅटिक ट्रान्समिशन असेल. या नवीन सिस्टीममुळे गाडीचं एकूण मायलेज सुधारेल अशी अपेक्षा आहे.