बँक खातेदारांच्या सोयीसाठी देशभरात २१ ऑक्टोबर ते ३१ डिसेंबरपर्यंत विशेष शिबिरांचे आयोजन करण्यात येत आहे. यामध्ये केवायसी (KYC) अपडेट करणे, खात्यात वारसदाराचे नाव जोडणे यांसारख्या सेवा मिळवता येतील.
बँक खातेदारांच्या सोयीसाठी केंद्रीय वित्तीय सेवा विभागाने २१ ऑक्टोबर ते ३१ डिसेंबर २०२६ या कालावधीत देशभरात वित्तीय सेवा समावेशन शिबिरांचे आयोजन केले आहे. सुमारे २.७० लाख ग्रामपंचायती आणि शहरी स्थानिक स्वराज्य संस्थांमध्ये ही मोहीम राबवली जात आहे. यामध्ये बँक खात्यांसाठी केवायसी अपडेट करणे, खात्यात वारसदाराचे नाव जोडणे, आधार लिंक करणे, निष्क्रिय जनधन खाती पुन्हा सुरू करणे यांसारख्या सेवांसाठी मदत केली जाते. सर्वांनी ३१ डिसेंबरच्या आत केवायसी अपडेट करणे बंधनकारक आहे, असा याचा अर्थ नाही. बँकेत जाऊन तुमचे केवायसी अपडेट स्टेट्स तपासणे महत्त्वाचे आहे.
25
केवायसी माहितीत बदल नसेल तर?
तुमचे नाव, पत्ता यांसारख्या आधी दिलेल्या माहितीत कोणताही बदल नसेल, तर साधारणपणे पुन्हा सर्व कागदपत्रे जमा करण्याची गरज नसते. बँकेत नोंदणी केलेल्या मोबाईल नंबर किंवा ईमेलवरून तुम्ही सेल्फ डिक्लेरेशन देऊ शकता. इंटरनेट बँकिंग, बँकेचे ॲप, एटीएम किंवा पत्राद्वारेही ही सुविधा मिळू शकते. फक्त पत्ता बदलला असेल, तरीही नवीन पत्ता सेल्फ डिक्लेरेशनद्वारे देता येतो. बँक त्याची पडताळणी करेल.
35
माहिती बदलली असल्यास कोणती कागदपत्रे लागतील?
नाव, ओळखीचा पुरावा यांसारख्या माहितीत बदल असल्यास बँकेने मागितलेली अधिकृत कागदपत्रे जमा करावी लागतील. पासपोर्ट, ड्रायव्हिंग लायसन्स, आधार कार्ड, मतदान ओळखपत्र, नरेगा जॉब कार्ड आणि राष्ट्रीय लोकसंख्या नोंदणी पत्र ही कागदपत्रे ग्राह्य धरली जातात. पॅन कार्डची माहितीही बँक स्वतंत्रपणे मागू शकते. बँकेच्या सुविधेनुसार आधार ओटीपी किंवा व्हिडिओ केवायसीद्वारे ऑनलाइन अपडेट करता येते.
ज्यांना ऑनलाइन अपडेट करणे शक्य नाही, ते बँकेच्या कोणत्याही शाखेत आवश्यक कागदपत्रे जमा करून केवायसी अपडेट करू शकतात. बँकेच्या व्यवसाय प्रतिनिधींमार्फतही ही सुविधा उपलब्ध आहे. विशेष शिबिराचे ठिकाण, तारीख आणि वेळ जाणून घेण्यासाठी जवळच्या बँकेशी संपर्क साधावा. प्रत्येक ग्राहकासाठी केवायसी अपडेट करण्याची मुदत सारखी नसते. आरबीआयच्या नियमांनुसार, जास्त जोखीम असलेल्या ग्राहकांना दर दोन वर्षांनी, मध्यम जोखीम असलेल्यांना आठ वर्षांनी आणि कमी जोखीम असलेल्यांना दहा वर्षांनी अपडेट करणे आवश्यक असते.
55
केवायसी अपडेट न केल्यास काय होईल?
केवायसी अपडेट करण्याची मुदत संपल्यानंतरही आवश्यक माहिती दिली नाही, तर खात्यातील व्यवहारांवर निर्बंध येऊ शकतात. मात्र, ३१ डिसेंबरनंतर सर्वांची खाती आपोआप ब्लॉक होतील, असा याचा अर्थ नाही. खात्याचा प्रकार, प्रलंबित अपडेट आणि बँकेच्या प्रक्रियेनुसार कारवाई बदलते. दरम्यान, केवायसी अपडेट करण्याच्या नावाने येणाऱ्या फेक एसएमएस आणि लिंकपासून सावध राहा. अनोळखी लिंक उघडू नका किंवा ओटीपी, पिन, पासवर्ड शेअर करू नका. फक्त बँकेच्या अधिकृत ॲप किंवा शाखेतूनच अपडेट करा.
Utility News (उपयुक्तता बातम्या): Check Latest उपयुक्तता बातम्या थेट in Marathi. Read वैयक्तिक कर्ज, बँकिंग टिप्स, गुंतवणूक, सोने आणि चांदीच्या किंमती बातम्या, ताज्या बातम्या at Asianet Marathi News .
