भारीच...नव्या ताकदीसह टॉरस आणि हिप्पो; अशोक लेलँडच्या दिग्गजांचे पुनरागमन, काय-काय आहे यात खास?
सार
अशोक लेलँडने आपले प्रसिद्ध टॉरस आणि हिप्पो ट्रक मॉडेल्स आधुनिक तंत्रज्ञानासह पुन्हा बाजारात आणले आहेत. उच्च शक्ती आणि इंधन कार्यक्षमता देणारी ही वाहने खाणकाम आणि बांधकाम यांसारख्या क्षेत्रांसाठी तयार केली आहेत.
हिंदुजा ग्रुपच्या मालकीची आघाडीची व्यावसायिक वाहन उत्पादक कंपनी अशोक लेलँडने आपले दोन सर्वात प्रसिद्ध ट्रक मॉडेल्स, टॉरस आणि हिप्पो, पुन्हा बाजारात आणले आहेत. आधुनिक काळासाठी सुधारित केलेला टॉरस उच्च हॉर्सपॉवरच्या टिपर श्रेणीचे प्रतिनिधित्व करतो, तर हिप्पो ट्रेलर ट्रॅक्टर श्रेणीचे प्रतिनिधित्व करतो. कंपनीने एका प्रसिद्धीपत्रकात म्हटले आहे की, शक्ती आणि विश्वासार्हतेसाठी ओळखले जाणारे हे दोन्ही मॉडेल्स भारताच्या वाढत्या आर्थिक गरजा पूर्ण करण्यासाठी पुढच्या पिढीच्या तंत्रज्ञानासह परत येत आहेत.
अशोक लेलँडचे मीडियम अँड हेवी कमर्शियल व्हेईकलचे अध्यक्ष संजीव कुमार, नॅशनल सेल्स हेड माधवी देशमुख, प्रमुख ग्राहक, डीलर्स आणि माध्यम प्रतिनिधींच्या उपस्थितीत अशोक लेलँडचे व्यवस्थापकीय संचालक आणि सीईओ शेनू अग्रवाल यांनी ही वाहने लाँच केली.
उच्च उत्पादकता, उत्तम इंधन कार्यक्षमता आणि ड्रायव्हरसाठी अधिक आराम सुनिश्चित करणारी नवीन टॉरस आणि हिप्पो श्रेणी, वाहन फ्लीट ऑपरेटर्सना अधिक नफा मिळवून देण्याच्या उद्देशाने डिझाइन केली आहे. अशोक लेलँडच्या नाविन्यपूर्ण AVTR मॉड्युलर ट्रक प्लॅटफॉर्मवर तयार केलेली ही वाहने देशभरातील अशोक लेलँड डीलरशिपद्वारे बुक करता येतील.
8.0-लिटर ए-सीरिज, 6-सिलेंडर इंजिन 360 एचपी शक्ती प्रदान करते. या श्रेणीतील सर्वोत्तम 1600 एनएम टॉर्क, 430 मिमी व्यासाचा क्लच, हेवी-ड्यूटी 9S 15409 सिंक्रोमेश गिअरबॉक्स, मजबूत 9 मिमी जाडीची फ्रेम, हिल स्टार्ट असिस्ट, ऑटोमॅटिक ट्रॅक्शन कंट्रोल आणि टिल्टेबल टॉरस डे केबिन ही टॉरस टिपर श्रेणीची वैशिष्ट्ये आहेत.
हिप्पो ट्रेलर श्रेणीलाही ए-सीरिज, 6-सिलेंडर 8.0-लिटर इंजिनमधून 360 एचपी शक्ती मिळते. उत्तम प्रवासाचा अनुभव आणि सुरक्षिततेसाठी यात टिल्टेबल हिप्पो स्लीपर केबिन आणि 8 मिमी जाडीची हेवी-ड्यूटी फ्रेम आहे. टायर प्रेशर मॉनिटरिंग, रिव्हर्स कॅमेरा आणि ॲडव्हान्स्ड ड्रायव्हर असिस्ट सिस्टीम (ADAS) हे पर्याय म्हणून उपलब्ध असतील.
अशोक लेलँडचे व्यवस्थापकीय संचालक आणि सीईओ शेनू अग्रवाल म्हणाले की, टॉरस आणि हिप्पो हे विशेषतः खाणकाम, पायाभूत सुविधा आणि बांधकाम क्षेत्रांच्या गरजा पूर्ण करण्यासाठी बनवले आहेत. अशोक लेलँडचे ए-सीरिज 6-सिलेंडर इंजिन या वाहनांना अतुलनीय शक्ती आणि टिकाऊपणा देईल, असेही ते म्हणाले.
अशोक लेलँडच्या मीडियम अँड हेवी कमर्शियल व्हेईकलचे अध्यक्ष संजीव कुमार म्हणाले की, हिप्पो आणि टॉरस ही केवळ नावे नाहीत, तर भारतीय वाहतूकदारांच्या पिढ्यानपिढ्यांचा विश्वास जिंकणारे दिग्गज आहेत. भारतीय महामार्गांवर आणि खाणकाम क्षेत्रात ही नावे हेवी-ड्यूटी कामगिरीचा समानार्थी शब्द बनली आहेत आणि त्याच परंपरेत आम्ही नवीन बदल घडवत आहोत. ग्राहक-केंद्रित नवकल्पना आणि उत्कृष्ट कामगिरीप्रती आमची वचनबद्धता या लाँचमधून दिसून येते, असेही ते म्हणाले.