Apple iPhone Duo : लाँच होताच स्क्रीनमध्ये बिघाड, ॲपल बदलून देणार फोल्डेबल आयफोन

ॲपलचा पहिला फोल्डेबल स्मार्टफोन लाँच होऊन काही दिवसच झालेत, पण आता त्याच्या स्क्रीनमध्ये बिघाड असल्याच्या तक्रारी येऊ लागल्या आहेत. ग्राहकांच्या या तक्रारींनंतर कंपनीने हे फोन बदलून देण्याचा निर्णय घेतलाय.

मुंबई : अॅप्पलने नुकताच आपला पहिला फोल्डेबल आयफोन ड्युओ (iPhone Duo) लाँच केला. पण ग्राहकांच्या हातात फोन पडताच काही दिवसांतच त्याच्या आतल्या डिस्प्लेमध्ये बिघाड असल्याच्या तक्रारी येऊ लागल्या. यानंतर ॲपलने आता काही ठराविक फोनसाठी रिप्लेसमेंट प्रोग्राम जाहीर केला आहे.

ॲपलने फोल्डेबल स्मार्टफोन मार्केटमध्ये पहिल्यांदाच एन्ट्री मारली आहे. आयफोन ड्युओची डिलिव्हरी सुरू होऊन आठवडाही उलटला नाही, तोच हा निर्णय घ्यावा लागलाय. सुरुवातीला या फोनला ग्राहकांचा तुफान प्रतिसाद मिळाला. ऑनलाइन स्टॉक लगेच संपला आणि अनेक ठिकाणी तर दुकानांबाहेर ग्राहकांच्या रांगाही पाहायला मिळाल्या.

पण वीकेंडला या फोनच्या डिस्प्लेमध्ये समस्या असल्याच्या बातम्या येऊ लागल्या. अनेक युजर्सनी सोशल मीडियावर फोटो शेअर केले. यात फोनच्या आतल्या स्क्रीनवर, जिथून फोन फोल्ड होतो त्या बिजागरीच्या (hinge) जवळ क्रॅक आणि रेषा दिसत होत्या.

ग्राहकांच्या या तक्रारींची ॲपलने दखल घेतली आहे. काही मोजक्याच फोनमध्ये ही अडचण असल्याचं कंपनीने मान्य केलंय. ज्या ग्राहकांना हा त्रास होतोय, त्यांना नवीन फोन बदलून दिला जाईल, असंही कंपनीने स्पष्ट केलंय.

कंपनीने एका निवेदनात म्हटलंय की, आयफोन ड्युओच्या काही मोजक्या युनिट्सच्या आतल्या डिस्प्लेमध्ये अडचण असल्याची त्यांना कल्पना आहे. ज्या ग्राहकांना स्क्रीनचा प्रॉब्लेम येतोय, त्यांनी नवीन फोनसाठी ॲपल केअरशी (AppleCare) संपर्क साधावा, असा सल्ला कंपनीने दिलाय.

मात्र, या टेक कंपनीने या समस्येचं नेमकं कारण काय आहे आणि किती फोनमध्ये हा बिघाड झालाय, याचा आकडा सांगितलेला नाही.

गेल्या काही वर्षांतील ॲपलचं हे सर्वात महत्त्वाचं हार्डवेअर लाँच मानलं जात होतं. पण लाँचिंगनंतर लगेचच कंपनीसमोर हे पहिलं मोठं आव्हान उभं राहिलंय.

साध्या स्मार्टफोनपेक्षा फोल्डेबल फोन बनवणं तांत्रिकदृष्ट्या जास्त गुंतागुंतीचं असतं, असं तज्ज्ञांनी आधीच सांगितलं होतं. त्यामुळे लाँचिंगनंतर या फोनचा पुरवठा मर्यादित राहील, असा अंदाजही वर्तवला जात होता.

आयफोन ड्युओची डिझाईन पुस्तकासारखी फोल्ड होणारी आहे. उघडल्यावर त्याचा मोठा डिस्प्ले तयार होतो. यामुळे बाजारात आधीपासून असलेल्या इतर कंपन्यांच्या फोल्डेबल फोनशी त्याची थेट स्पर्धा आहे.

फोल्डेबल हिंजजवळ दाब पडल्याने बिघाड झाल्याचा अंदाज

आयफिक्सिट (iFixit) या स्वतंत्र रिपेअर आणि इलेक्ट्रॉनिक्स ॲनालिसिस कंपनीने या बिघाडाची तपासणी केली आहे. त्यांनी उपलब्ध टीअरडाऊन फुटेज, पेटंटची कागदपत्रं आणि सीटी स्कॅनच्या आधारे आपला प्राथमिक अहवाल दिलाय.

या कंपनीच्या इंजिनिअर्सनी फोल्डेबल हिंज सिस्टीमचं थ्री-डी सिम्युलेशन तयार केलं. त्यानंतर युजर्सनी सांगितलेल्या डॅमेज पॅटर्नशी त्याची तुलना केली.

या विश्लेषणातून असं समोर आलंय की, डिस्प्लेच्या खाली जिथून एक केबल सेंट्रल सपोर्ट स्ट्रक्चरच्या जवळून जाते, नेमक्या त्याच भागात हा बिघाड जास्त दिसून आलाय.

आयफिक्सिटने सांगितलं की, फोन फोल्ड करताना सपोर्ट मेकॅनिझम नेहमीच डिस्प्लेच्या मार्गातून पूर्णपणे बाजूला होत नाही. यामुळे तिथे दाब पडतो आणि ज्या भागात स्क्रीन खराब झाल्याच्या तक्रारी आल्यात, तिथेच हा ताण पडत असावा.

ॲपलने मात्र या अहवालावर अद्याप कोणतीही अधिकृत प्रतिक्रिया दिलेली नाही.

या समस्येचं मूळ कारण शोधलं असलं तरी, आयफिक्सिटने आयफोन ड्युओचं कौतुकही केलंय. आतापर्यंत तपासलेल्या फोल्डेबल स्मार्टफोन्समध्ये हा फोन रिपेअर करायला सर्वात सोपा असल्याचं त्यांनी म्हटलंय. याचा अर्थ इतर कंपन्यांच्या तुलनेत ॲपलने रिपेअरिंगची सोय अधिक चांगली दिली आहे.

ॲपलने तातडीने फोन बदलून देण्याचा जो निर्णय घेतलाय, त्याचं टेक क्षेत्रातील जाणकारांनी स्वागत केलंय.

आयडीसी (IDC) या मार्केट रिसर्च फर्मचे उपाध्यक्ष फ्रान्सिस्को जेरोनिमो म्हणाले की, तातडीने रिप्लेसमेंट प्रोग्राम सुरू करणं हे या समस्येवरचं योग्य पहिलं पाऊल आहे. फोल्डेबल फोन मार्केटमध्ये सुरुवातीच्या काळात अशा अडचणी याआधीही आल्याचं त्यांनी निदर्शनास आणून दिलं.

यावरून साहजिकच सॅमसंगच्या २०१९ मधील पहिल्या गॅलेक्सी फोल्ड (Galaxy Fold) लाँचची आठवण येते. त्यावेळीही रिव्ह्युअर्सच्या हातात फोन पडताच त्याच्या टिकाऊपणावर प्रश्नचिन्ह निर्माण झालं होतं. पारदर्शकता आणि तातडीने घेतलेला निर्णय एखाद्या प्रॉडक्टचं मोठं नुकसान कसं टाळू शकतो, याचं उत्तम उदाहरण म्हणून तज्ज्ञ नेहमी सॅमसंगच्या त्यावेळच्या प्रतिसादाचा दाखला देतात.