Business Idea : 17व्या वर्षीच बिझनेस माइंड; दांडिया नाईटमध्ये पाण्याची बाटली विकून याने किती कमावले?

अभ्यासाच्या वयात आजकालची मुलं बिझनेसमध्ये रस दाखवत आहेत. नवनवीन आयडिया वापरून ते चांगले पैसे कमवत आहेत. सध्या अशाच एका १७ वर्षांच्या मुलाचा बिझनेस प्लॅन सोशल मीडियावर व्हायरल होत आहे.

सूरत : नवरात्रीच्या काळात दांडियाची मोठी धूम असते. सलग नऊ दिवस लोक छान तयार होऊन गाण्यांच्या तालावर गरबा खेळतात. सगळे जण दांडिया नाईट कशी एन्जॉय करायची याचा विचार करत असताना, एका १७ वर्षांच्या मुलाने मात्र पैसे कसे कमवायचे याचा प्लॅन केला. त्याची ही आयडिया भन्नाट चालली आणि त्याने चांगलीच कमाई केली.

छोटी आयडिया, मोठी कमाई

गुजरातच्या प्रसिद्ध गरबा कार्यक्रमांमध्ये लोकांची प्रचंड गर्दी असते. हजारो लोक एकत्र येतात, तिथे साहजिकच पिण्याच्या पाण्याची मागणी जास्त असते. या मुलाने नेमकी हीच संधी हेरली आणि तिथे पाण्याच्या बाटल्या विकण्याचा बिझनेस सुरू केला.

या मुलाने दिवसाला पाण्याच्या बाटल्यांचे तब्बल १०० बॉक्स (कार्टन) विकले. एका बॉक्समध्ये २४ बाटल्या असतात आणि एका बाटलीची किंमत २० रुपये आहे. म्हणजेच, १०० बॉक्समध्ये एकूण २,४०० बाटल्या झाल्या. २० रुपये प्रति बाटली या हिशोबाने त्याने दिवसाला तब्बल ४८ हजार रुपयांचा गल्ला जमवला.

पण हे ४८ हजार रुपये त्याचा निव्वळ नफा नाही. हा स्टॉल लावण्यासाठी त्याने दिवसाला सुमारे २० हजार रुपये भाडे दिले आहे. याशिवाय पाण्याच्या बाटल्या खरेदी करण्याचा खर्च आणि इतर किरकोळ खर्चही यात आहेत. हे सगळं वजा जाता, नऊ दिवसांत त्याने ५० ते ६० हजार रुपयांचा निव्वळ नफा कमावला असल्याचा अंदाज आहे.

कमाई कितीही असो, पण या मुलाच्या बिझनेस आयडियामधून एक महत्त्वाची गोष्ट शिकायला मिळते. लोक कुठे जास्त जमतात, त्यांना कोणत्या गोष्टीची गरज असते आणि त्या गरजेचं बिझनेसमध्ये कसं रूपांतर करता येईल, हे ओळखण्याची समज त्याच्याकडे आहे. बिझनेस करण्यासाठी मोठं दुकान किंवा लाखो रुपयांची गुंतवणूकच लागते असं नाही. कधीकधी एक छोटीशी आयडियासुद्धा मोठी संधी बनू शकते.