Apple AI Smart Home Camera: ॲपलचा नवा कॅमेरा, ज्यामध्ये व्हिडिओच दिसणार नाही! काय आहे रहस्य?

ॲपल लवकरच एक नवीन स्मार्ट होम कॅमेरा लाँच करणार आहे. विशेष म्हणजे हा कॅमेरा व्हिडिओ रेकॉर्ड करण्याऐवजी AI च्या मदतीने तुम्हाला थेट टेक्स्ट मेसेज पाठवेल. युजर्सच्या प्रायव्हसीला प्राधान्य देणारा हा कॅमेरा ॲपलच्या नव्या स्मार्ट होम हबचा एक भाग असणार आहे.

ॲपल आता एक असा स्मार्ट होम कॅमेरा आणण्याच्या तयारीत आहे, जो नेहमीच्या सिक्युरिटी कॅमेऱ्यांपेक्षा खूप वेगळा असेल. हा कॅमेरा घरात घडणाऱ्या गोष्टींचा व्हिडिओ रेकॉर्ड करणार नाही किंवा लाईव्ह स्ट्रीमिंगही करणार नाही. त्याऐवजी, AI च्या मदतीने हा कॅमेरा घरात काय घडतंय हे समजून घेईल आणि युजरला थेट टेक्स्ट मेसेज पाठवेल. सिरी (Siri) AI च्या मदतीने एक उत्तम स्मार्ट होम सिस्टीम बनवण्याच्या ॲपलच्या प्लॅनचा हा एक भाग आहे. ब्लूमबर्गचे मार्क गुरमन यांनी दिलेल्या माहितीनुसार, 'J450' या कोडनेमखाली या डिव्हाइसवर काम सुरू आहे.

व्हिडिओशिवाय पाळत कशी ठेवणार?

या कॅमेऱ्यामध्ये नेहमीच्या सिक्युरिटी कॅमेऱ्यांसारखा हाय फ्रेम रेट नसेल. त्याऐवजी, कमी फ्रेम रेटवर चालणाऱ्या इमेज सेन्सरचा वापर करून घराच्या आत आणि बाहेर काय चाललंय, हे ओळखलं जाईल. कॅमेऱ्याने टिपलेले फोटो किंवा डेटा क्लाउडवर न पाठवता, डिव्हाइसमधील AI सिस्टीमद्वारेच त्याचं विश्लेषण केलं जाईल. हे तंत्रज्ञान सोनीच्या (Sony) IMX500 सारख्या इमेज सेन्सर्समध्ये वापरल्या जाणाऱ्या तंत्रज्ञानासारखं असू शकतं. डिव्हाइसमध्येच डेटा प्रोसेस होणार असल्यामुळे, स्मार्ट होम कॅमेऱ्यांबाबत असलेली प्रायव्हसीची मोठी चिंता दूर होईल आणि युजर्सचा डेटा सुरक्षित राहील.

व्हिडिओ दिसणार नाही, फक्त टेक्स्ट मेसेज येणार

फेशियल रेकग्निशन (चेहरा ओळखण्याचं तंत्रज्ञान) वापरून हा कॅमेरा खोलीत आलेल्या व्यक्तीला ओळखू शकेल आणि घरातील वेगवेगळ्या हालचाली समजून घेऊ शकेल. पण यात एक मोठा फरक आहे. तुम्हाला नंतर पाहण्यासाठी यात कोणतंही व्हिडिओ रेकॉर्डिंग मिळणार नाही. तुम्हाला फक्त घडलेल्या घटनांची माहिती टेक्स्ट मेसेजच्या स्वरूपात मिळेल. उदाहरणार्थ, जर कोणी तुमच्या घरातील हॉलमध्ये आलं, तर त्या व्यक्तीचा व्हिडिओ दिसण्याऐवजी, "कोणीतरी हॉलमध्ये प्रवेश केला आहे" असा मेसेज तुम्हाला येईल. थोडक्यात सांगायचं तर, हा कॅमेरा घरातील हालचाली समजून घेईल, पण सतत व्हिडिओ रेकॉर्ड करत बसणार नाही.

स्मार्ट होम प्रोजेक्टमागे मोठी रणनीती

हा कॅमेरा ॲपलच्या मोठ्या स्मार्ट होम प्रोजेक्टचा एक भाग असल्याचं बोललं जात आहे. कंपनी सुमारे ६ इंचाचा डिस्प्ले असलेला एक स्मार्ट होम हब देखील बनवत असल्याच्या बातम्या यापूर्वी आल्या होत्या. हा हब तुम्ही टेबलवर ठेवू शकता किंवा भिंतीवरही लावू शकता. यामध्ये AI वर आधारित 'सिरी'ची भूमिका सर्वात महत्त्वाची असेल. स्मार्ट होम डिव्हाइसेस कंट्रोल करण्यासोबतच, गाणी ऐकणे, व्हिडिओ कॉल करणे आणि फोटो पाहणे यांसारखी कामंही या हबच्या मदतीने करता येतील.

होमपॉड मिनी आणि नवा ॲपल टीव्ही?

नव्या स्मार्ट होम हबसोबतच अपडेटेड होमपॉड मिनी आणि नवीन ॲपल टीव्ही देखील लाँच होण्याची शक्यता आहे. १३ ऑक्टोबरला होणाऱ्या ॲपलच्या इव्हेंटमध्ये कंपनी स्मार्ट होम मार्केटमध्ये मोठी एन्ट्री करेल, असा अंदाज वर्तवला जात आहे. मात्र, ॲपलने अद्याप या कॅमेऱ्याबद्दल किंवा इतर स्मार्ट होम प्रॉडक्ट्सबद्दल कोणतीही अधिकृत माहिती दिलेली नाही. जोपर्यंत कंपनी स्वतःहून घोषणा करत नाही, तोपर्यंत या फक्त अफवाच मानल्या पाहिजेत, असा सल्ला तज्ज्ञांनी दिला आहे.