Quick Sandwich Recipes: फक्त १० मिनिटांत बनवा ५ भन्नाट सँडविच, सगळेच आवडीने खातील

रोज सकाळी नाश्त्याला काय बनवायचं हा मोठा प्रश्न असतो. कमी वेळेत पोटभर नाश्ता हवा असेल, तर सँडविच हा बेस्ट ऑप्शन आहे. ब्रेड, थोड्या भाज्या आणि सॉस असेल तर काम सोपं होतं. पाहा १० मिनिटांत तयार होणाऱ्या ५ सुपरहीट सँडविचच्या रेसिपी.

रोज सकाळी उठल्यावर नाश्त्याला काय बनवायचं, हा सगळ्यांचाच ठरलेला प्रश्न असतो. असा नाश्ता जो झटपट बनेल आणि पोटही भरेल. यावर सर्वात भारी उपाय म्हणजे सँडविच. घरात ब्रेड, थोड्या भाज्या आणि सॉस असला की विषय संपला. आज आम्ही तुम्हाला अशा ५ सुपरहीट सँडविचच्या रेसिपी सांगणार आहोत, ज्या फक्त १० मिनिटांत तयार होतात.

१. बॉम्बे आलू सँडविच

उकडलेले बटाटे हाताने चांगले कुस्करून घ्या. त्यात बारीक चिरलेला कांदा, हिरवी मिरची, कोथिंबीर, चाट मसाला, काळं मीठ आणि लिंबाचा रस टाका. आता ब्रेडला बटर आणि कोथिंबीर-पुदिन्याची चटणी लावा. त्यात हे बटाट्याचं सारण भरा आणि तव्यावर हलकं भाजून घ्या.

२. व्हेज मेयो सँडविच

मुलांच्या डब्यासाठी हा एकदम बेस्ट पर्याय आहे. एका बाऊलमध्ये बारीक चिरलेली काकडी, टोमॅटो, गाजर, कांदा आणि शिमला मिरची घ्या. त्यात २ चमचे मेयोनीज, थोडी काळीमिरी पावडर आणि मीठ मिसळा. वाटल्यास थोडं टोमॅटो केचपही घालू शकता. आता हे मिश्रण दोन ब्रेडच्या मध्ये भरा आणि कट करून सर्व्ह करा. हे सँडविच भाजायचीही गरज नाही.

३. अंडा भुर्जी सँडविच

नॉनव्हेज खाणाऱ्यांसाठी ही भारी रेसिपी आहे. कढईत तेल गरम करून कांदा आणि मिरची परतून घ्या. त्यात २ अंडी फोडून घाला आणि मस्त भुर्जी बनवून घ्या. चवीनुसार मीठ आणि काळीमिरी पावडर टाका. आता ब्रेडला बटर लावून त्यात ही अंडा भुर्जी भरा आणि सँडविच ग्रिल करून घ्या.

४. चीज कॉर्न सँडविच

स्वीट कॉर्न आधी उकडून घ्या. त्यात किसलेलं चीज, एक चमचा मेयोनीज, थोडे चिली फ्लेक्स आणि ओरिगॅनो मिक्स करा. हे सारण ब्रेडमध्ये भरा आणि तव्यावर दाबून भाजून घ्या. चीज वितळेपर्यंत सँडविच शेका. मुलांना हे सँडविच खूप आवडेल.

५. पीनट बटर बनाना सँडविच

काहीतरी गोड खावंसं वाटत असेल, तर हे नक्की ट्राय करा. ब्रेडला पीनट बटर चांगलं लावून घ्या. त्यावर केळीचे गोल काप करून ठेवा. वरून थोडं मध घाला आणि दुसऱ्या ब्रेडने कव्हर करा. हे सँडविच हेल्दी, टेस्टी आणि एनर्जी देणारं आहे.