Maruti Suzuki EV : 500 किमी रेंज, मारुती सुझुकी करणार कमाल; ईव्ही मार्केटमध्ये येणार नवीन मॉडेल्स

मारुती सुझुकी इलेक्ट्रिक वाहन बाजारात आपला दबदबा वाढवण्यासाठी नवीन ७-सीटर इलेक्ट्रिक एमपीव्ही (MPV) लाँच करण्याच्या तयारीत आहे. 'YMC' या कोडनेमने ओळखल्या जाणाऱ्या या कारमध्ये ५०० किलोमीटरहून अधिक रेंज आणि भन्नाट फीचर्स मिळण्याची शक्यता आहे.

मुंबई : मारुती सुझुकी आता इलेक्ट्रिक वाहन (EV) मार्केटमध्ये आपली पकड मजबूत करत आहे. येत्या तीन वर्षांत कंपनी अनेक नवीन मॉडेल्स बाजारात आणणार आहे. यात ७ नवीन एसयूव्ही (SUVs) गाड्यांचा समावेश असेल. हायब्रिड, इलेक्ट्रिक, सीएनजी (CNG) आणि आयसीई (ICE) अशा विविध इंजिन पर्यायांसह मारुती आपला पोर्टफोलिओ वाढवणार आहे. सध्या मारुती सुझुकीची 'ई-विटारा' (e-Vitara) ही एकमेव इलेक्ट्रिक कार आहे. यानंतर आता तीन रांगा असलेली (3-row) नवीन इलेक्ट्रिक एमपीव्ही (MPV) बाजारात येणार आहे. 'YMC' या कोडनेमने ओळखल्या जाणाऱ्या या मॉडेलची या वर्षाच्या अखेरीस झलक पाहायला मिळू शकते. तर, पुढच्या वर्षाच्या सुरुवातीला या कारची विक्री सुरू होण्याची शक्यता आहे.

मारुतीची सर्वात स्वस्त ७-सीटर कार

भारतीय बाजारात मारुती सुझुकीची ही नवीन YMC सर्वात छोटी आणि स्वस्त ७-सीटर कार असू शकते. याच्या बेस व्हेरियंटची किंमत साधारण १४ लाख रुपये असण्याची शक्यता आहे. यामुळे जास्तीत जास्त ग्राहकांपर्यंत पोहोचण्याचा कंपनीचा प्रयत्न असेल. 'बॅटरी-अ‍ॅज-अ-सर्व्हिस' (Battery-as-a-Service) या बॅटरी रेंटल स्कीममुळे गाडी खरेदी करण्याचा सुरुवातीचा खर्च कमी होण्यास मदत मिळेल. YMC च्या प्लॅटफॉर्मवर आधारित टोयोटा (Toyota) देखील भविष्यात आपली स्वतःची नवीन कार लाँच करू शकते, असे रिपोर्ट्स आहेत.

५०० किलोमीटरहून अधिक रेंज

मारुतीच्या या नवीन ७-सीटर इलेक्ट्रिक एमपीव्हीची अधिकृत तांत्रिक माहिती अद्याप समोर आलेली नाही. पण, ई-विटारामध्ये वापरलेले ४९ kWh आणि ६१ kWh चे बॅटरी पॅक YMC मध्येही दिले जाण्याची शक्यता आहे. हे दोन्ही बॅटरी पर्याय फ्रंट-माउंटेड इलेक्ट्रिक मोटरसह फ्रंट-व्हील ड्राइव्ह सिस्टीममध्ये येऊ शकतात. ही कार सिंगल चार्जवर ५०० किलोमीटरहून अधिक अंतर कापू शकेल, असा अंदाज आहे.

ई-विटारावरून घेतली प्रेरणा

सध्या मारुतीची ही नवीन ७-सीटर इलेक्ट्रिक एमपीव्ही टेस्टिंगच्या टप्प्यात आहे. टेस्टिंगदरम्यान ही कार अनेकदा कॅमेऱ्यात कैद झाली आहे. यातून कारच्या डिझाइनबद्दल काही गोष्टी समोर आल्या आहेत. या गाडीला जास्त उंची असलेली बॉक्सी डिझाइन मिळेल. ई-विटारावरून प्रेरणा घेतलेला फ्रंट बंपर, एअर इनटेक्स आणि एरोडायनॅमिक डिझाइन असलेले अलॉय व्हील्स या कारमध्ये पाहायला मिळतील. मागच्या विंडस्क्रीनच्या आजूबाजूला दिलेले उभे टेल लॅम्प्स मारुती अर्टिगा (Ertiga) मधून घेतल्याचे स्पष्ट दिसते.

फीचर्सवरही विशेष लक्ष

फीचर्सच्या बाबतीतही ही नवीन इलेक्ट्रिक एमपीव्ही एकदम भारी असेल. यात १०.२५ इंचाचा डिजिटल ड्रायव्हर डिस्प्ले आणि १०.१ इंचाची टचस्क्रीन इन्फोटेनमेंट सिस्टीम मिळण्याची शक्यता आहे. प्रीमियम साउंड सिस्टीम, ऑटो-डिमिंग आयआरव्हीएम (IRVM), फ्रंट-रिअर पार्किंग सेन्सर्स, टायर प्रेशर मॉनिटरिंग सिस्टीम, मल्टिपल एअरबॅग्ज आणि हिल होल्ड कंट्रोल यांसारखे भन्नाट फीचर्स यात मिळू शकतात. जास्तीत जास्त फॅमिली ग्राहकांना आकर्षित करण्याच्या उद्देशाने मारुतीची ही नवीन इलेक्ट्रिक ७-सीटर एमपीव्ही बाजारात दाखल होईल.