टीम इंडियात मोठे फेरबदल, वैभव सूर्यवंशीला वरिष्ठ गटात खेळायची मिळाली संधी

भारतीय टी-20 संघात मोठे बदल झाले असून, श्रेयस अय्यरला नवा कर्णधार बनवण्यात आले आहे. माजी कर्णधार सूर्यकुमार यादवला संघातून वगळण्यात आले असून, १५ वर्षीय वैभव सूर्यवंशीला प्रथमच संधी मिळाली आहे. हे बदल आगामी आयर्लंड आणि इंग्लंड दौऱ्यासाठी करण्यात आले आहेत.

टीम इंडियात मोठा बदल; टी-20 संघाला नवा कर्णधार, सूर्यकुमार बाहेर भारतीय क्रिकेटमध्ये मोठा बदल पाहायला मिळाला आहे. आगामी आयर्लंड आणि इंग्लंड दौऱ्यासाठी जाहीर करण्यात आलेल्या टी-20 संघात नेतृत्वाची धुरा आता श्रेयस अय्यरकडे सोपवण्यात आली आहे. यामुळे सूर्यकुमार यादवच्या नेतृत्वाखालील पर्व संपुष्टात आले असून निवड समितीने नव्या दिशेने वाटचाल सुरू केल्याचे संकेत दिले आहेत.

मुख्य निवडकर्ता अजित आगरकर यांच्या नेतृत्वाखालील निवड समितीने श्रेयस अय्यरची टी-20 कर्णधार म्हणून निवड केली आहे. आयपीएल आणि इतर स्पर्धांमधील त्याच्या नेतृत्वगुणांचा विचार करून हा निर्णय घेण्यात आल्याचे सांगितले जात आहे. तिलक वर्माला उपकर्णधारपदाची जबाबदारी देण्यात आली आहे. सर्वात मोठा धक्का म्हणजे माजी कर्णधार सूर्यकुमार यादवला केवळ कर्णधारपदावरून हटवण्यात आले नाही, तर त्याला संघातही स्थान मिळालेले नाही. निवडकर्त्यांनी त्याच्या अलीकडील कामगिरीचा आणि आगामी दोन वर्षांच्या नियोजनाचा विचार करून हा निर्णय घेतल्याचे स्पष्ट केले आहे.

वैभव सूर्यवंशीची ऐतिहासिक एन्ट्री 

अवघ्या 15 वर्षीय वैभव सूर्यवंशीला प्रथमच भारतीय वरिष्ठ टी-20 संघात संधी देण्यात आली आहे. आयपीएल 2026 मध्ये त्याने केलेल्या धडाकेबाज फलंदाजीमुळे निवडकर्त्यांचे लक्ष वेधले होते. त्याला पदार्पणाची संधी मिळाल्यास भारतीय पुरुष संघासाठी खेळणारा सर्वात युवा क्रिकेटपटू ठरण्याची शक्यता आहे. विश्वचषक विजेत्या संघाचा गाभा कायम ठेवत निवडकर्त्यांनी काही नव्या खेळाडूंनाही संधी दिली आहे. युवा प्रतिभेला प्रोत्साहन देत भविष्यातील संघबांधणीवर भर दिला जात असल्याचे या निवडींवरून दिसून येते. काही अनुभवी खेळाडूंना विश्रांती देत नव्या खेळाडूंना आंतरराष्ट्रीय स्तरावर स्वतःला सिद्ध करण्याची संधी मिळणार आहे.

भारतीय टी-20 क्रिकेटच्या नव्या पर्वाची सुरुवात? 

श्रेयस अय्यरचे नेतृत्व, वैभव सूर्यवंशीसारख्या युवा खेळाडूंचा समावेश आणि सूर्यकुमार यादवसारख्या वरिष्ठ खेळाडूची अनुपस्थिती यामुळे भारतीय टी-20 संघ एका नव्या पर्वात प्रवेश करत असल्याचे चित्र दिसत आहे. आता या बदलांचा आगामी आयर्लंड आणि इंग्लंड दौऱ्यावर किती सकारात्मक परिणाम होतो, याकडे क्रिकेट चाहत्यांचे लक्ष लागले आहे.