'त्याची बॅटिंग पाहून मला खरंच राग आला होता', विजयानंतर सूर्यकुमार यादवचा खुलासा!

Suryakumar Yadav Being Angry With Ishan Kishan Batting : संजू सॅमसन आणि अभिषेक शर्मा यांची विकेट अवघ्या सहा धावांवर गमावूनही, ईशानने पहिल्या सहा षटकांतच ५६ धावा केल्या.

Suryakumar Yadav Being Angry With Ishan Kishan Batting : न्यूझीलंडविरुद्धच्या दुसऱ्या टी20 सामन्यात भारताने दमदार विजय मिळवल्यानंतर, कर्णधार सूर्यकुमार यादवने त्याचा सहकारी खेळाडू ईशान किशनबद्दल एक मजेशीर खुलासा केला आहे. सामन्यानंतरच्या कार्यक्रमात सूर्यकुमारने गंमतीने सांगितले की, सामन्यादरम्यान त्याला ईशानचा थोडा राग आला होता. ईशानने फक्त ३२ चेंडूत ७६ धावा केल्या. संजू सॅमसन आणि अभिषेक शर्मा यांची विकेट अवघ्या सहा धावांवर गमावूनही, ईशानने पहिल्या सहा षटकांतच ५६ धावा केल्या.

ईशान किशनच्या स्फोटक फलंदाजीदरम्यान आपल्याला फक्त एक प्रेक्षक म्हणून उभे राहावे लागले, याबद्दल सूर्यकुमार यादवने सामन्यानंतर गंमतीने सांगितले. "ईशानने दुपारच्या जेवणात काय खाल्ले होते किंवा सामन्यापूर्वी कोणता प्री-वर्कआउट केला होता, हे मला माहीत नाही. पॉवर प्लेमध्ये संघ ६ धावांवर २ बाद अशा स्थितीत असताना कोणीतरी अशाप्रकारे फलंदाजी करतो हे मी यापूर्वी कधीही पाहिले नाही. पॉवर प्लेमध्ये तो मला स्ट्राइक देत नव्हता, त्यामुळे मला थोडा राग आला होता. पण काही हरकत नाही, मला नंतर संधी मिळेल आणि मी धावा करू शकेन हे मला माहीत होते," असे सूर्यकुमार म्हणाला.

ईशान बाद झाल्यावर जबाबदारी स्वीकारत सूर्यकुमारने ३७ चेंडूत नाबाद ८२ धावा करून भारताला विजय मिळवून दिला. ४६८ दिवसांच्या अंतरानंतर सूर्यकुमारने आंतरराष्ट्रीय टी२० मध्ये अर्धशतक झळकावले आहे.

२१० धावांचा पाठलाग करून जिंकणे हे अविश्वसनीय आहे. फलंदाजीमध्ये प्रत्येकाने आपली सर्वोत्तम कामगिरी करावी अशी आमची इच्छा असते आणि ईशानने आज तेच केले, असेही सूर्यकुमार म्हणाला. ईशान आणि सूर्या फॉर्मात परतल्याने आगामी टी२० विश्वचषकापूर्वी भारताचा आत्मविश्वास वाढला आहे.

२०९ धावांच्या मोठ्या लक्ष्याचा पाठलाग करताना भारताची सुरुवात खराब झाली होती. संजू सॅमसन आणि अभिषेक शर्मा लवकर बाद झाल्याने भारत ६ धावांवर २ बाद अशा स्थितीत होता. पण त्यानंतर क्रीजवर आलेल्या ईशान किशन आणि सूर्यकुमारने सामन्याचे चित्रच पालटले.