अमरावतीकर जितेश शर्माने नागपुरात आलेल्या टीम इंडियाची घेतली भेट, संजूला प्रेमाने मारली मिठी!

Jitesh Sharma Welcomes Sanju Samson in Nagpur : T20 विश्वचषकापूर्वी भारत-न्यूझीलंड मालिकेची नागपुरात सुरुवात होत आहे. विश्वचषक संघातून वगळण्यात आलेल्या जितेश शर्माने नागपुरात आलेल्या भारतीय संघाची आणि संजू सॅमसनची भेट घेतली. 

Jitesh Sharma Welcomes Sanju Samson in Nagpur : T20 विश्वचषकापूर्वी भारताची शेवटची कसोटी म्हणून पाहिल्या जाणाऱ्या न्यूझीलंडविरुद्धच्या पाच सामन्यांच्या T20 मालिकेला उद्या नागपुरात सुरुवात होत आहे. नागपुरात दाखल झालेला भारतीय संघ कसून सराव करत आहे. एकदिवसीय मालिकेत 2-1 ने झालेल्या पराभवाची निराशा दूर करून T20 मालिकेत वर्चस्व गाजवण्याचे लक्ष्य सूर्यकुमार यादव आणि संघाचे आहे. विश्वचषक सुरू होण्यासाठी फक्त दोन आठवडे शिल्लक असताना, संघाचे संयोजन निश्चित करण्यासाठी ही मालिका भारतासाठी अत्यंत महत्त्वाची आहे.

जितेश शर्माची भेट

विश्वचषक संघातून आणि या मालिकेतून वगळण्यात आलेला यष्टीरक्षक-फलंदाज आणि अमरावतीकर जितेश शर्मा, नागपूरला आलेल्या भारतीय संघाला भेटायला गेला. त्याने हॉटेलमध्ये जाऊन संजू सॅमसन आणि कर्णधार सूर्यकुमार यादव यांच्यासोबत वेळ घालवला. संजू आणि जितेश यांच्यातील मैत्रीच्या क्षणांचा व्हिडिओ सोशल मीडियावर व्हायरल झाला आहे. दोघांना एकमेकांना मिठी मारताना पाहून क्रिकेट चाहते खूप आनंदी झाले आहेत.

मालिकेच्या दबावात येण्यापूर्वी कर्णधार सूर्यकुमार यादव, संजू सॅमसन, इशान किशन, रिंकू सिंग आणि रवी बिश्नोई यांनी पेंच व्याघ्र प्रकल्पात जंगल सफारी केली. सामन्यांपूर्वी मनःशांती आणि संघात एकोपा वाढवण्यासाठी हा एक खासगी दौरा होता.

माझी मोठी निराशा झाली - जितेश

पुढील महिन्यात होणाऱ्या T20 विश्वचषकासाठी भारतीय संघात स्थान न मिळाल्याचे, संघ जाहीर झाल्यावरच कळले, असे भारतीय यष्टीरक्षक जितेश शर्माने उघड केले होते. विश्वचषक संघात स्थान न मिळाल्याने माझी मोठी निराशा झाली होती, असे जितेशने क्रिक ट्रॅकरला दिलेल्या मुलाखतीत स्पष्ट केले. 'संघ जाहीर होईपर्यंत मला विश्वचषक संघातून वगळले जाईल अशी अपेक्षा नव्हती. मला वगळण्यामागे मुख्य निवडकर्त्याने दिलेले स्पष्टीकरण मी नंतर स्वीकारले, कारण ते एक योग्य कारण वाटले. त्यानंतर मी प्रशिक्षक आणि निवडकर्त्यांशी बोललो. त्यांनी सांगितलेल्या कारणांशीही मी सहमत झालो. त्यांनी मला जे समजावून सांगण्याचा प्रयत्न केला, त्याच्याशी मी सहमत आहे,' असे जितेश म्हणाला होता.