Asia Cup 2025 IND vs PAK : कालचा सामना कोण जिकलं? तिलक वर्मा ठरला हिरो, वाचा प्रत्येकाचा स्कोअर!

Asia Cup 2025 IND vs PAK : टीम इंडियाने पाकिस्तानला हरवून आशिया कपचे नववे विजेतेपद पटकावले आहे. अंतिम सामन्यात भारतीय संघाने उत्कृष्ट गोलंदाजी आणि फलंदाजी करत रोमहर्षक सामना जिंकला. तिलक वर्मा या फायनलचा हिरो ठरला. 

Asia Cup 2025 IND vs PAK : टीम इंडिया पुन्हा एकदा आशिया कप चॅम्पियन बनली आहे. दुबईत झालेल्या रोमहर्षक सामन्यात पाकिस्तानचा ५ गडी राखून पराभव करत भारताने इतिहास रचला आहे. तिलक वर्माची शानदार मॅच-विनिंग खेळी आणि कुलदीप यादवच्या उत्कृष्ट गोलंदाजीमुळे भारतीय संघाने आशियाई क्रिकेटमध्ये आपले वर्चस्व सिद्ध केले आहे. अंतिम सामन्यात पाकिस्तानला हरवून भारतीय संघाने या स्पर्धेत त्यांच्याविरुद्ध सलग तिसरा विजय नोंदवला. याशिवाय, एकही सामना न गमावता संघ चॅम्पियन बनला. चला या ऐतिहासिक अंतिम सामन्याच्या धावफलकावर एक नजर टाकूया...

साहिबजादा फरहानची स्फोटक खेळी व्यर्थ

अंतिम सामन्यात भारताचा कर्णधार सूर्यकुमार यादवने नाणेफेक जिंकून पाकिस्तानला प्रथम फलंदाजीसाठी आमंत्रित केले. प्रत्युत्तरात साहिबजादा फरहान आणि फखर जमानने शानदार सुरुवात करत पहिल्या विकेटसाठी ८४ धावा जोडल्या. पण, फरहान ५८ धावांवर बाद होताच पाकिस्तानची फलंदाजी पत्त्याच्या बंगल्याप्रमाणे कोसळली. त्यामुळे १९.१ षटकांत संघ १४६ धावांवर सर्वबाद झाला. फखरने ४६ धावांची खेळी केली. त्याच्याशिवाय इतर कोणताही फलंदाज विशेष काही करू शकला नाही. तर दुसरीकडे, भारतीय गोलंदाजांनी कहर केला.

भारतीय गोलंदाजीसमोर पाकिस्तानची फलंदाजी ढेपाळली

भारतीय संघाकडून गोलंदाजीत कुलदीप यादवने धुमाकूळ घातला आणि पाकिस्तानविरुद्धच्या अंतिम सामन्यात ४ षटकांत ३० धावा देत ४ बळी घेतले, ज्यात तीन बळी एकाच षटकात आले. त्याच्याशिवाय अक्षर पटेल, वरुण चक्रवर्ती आणि अक्षर पटेल यांनीही प्रत्येकी २-२ बळी घेतले. शिवम दुबेनेही चांगली गोलंदाजी करत ३ षटकांत केवळ २३ धावा दिल्या.

तिलक वर्माने ऐतिहासिक सामन्यात खेळली कारकिर्दीतील सर्वोत्तम खेळी

आशिया कपचे नववे विजेतेपद जिंकण्यासाठी टीम इंडियाला १४७ धावांची गरज होती. प्रत्युत्तरात, टीम इंडियाची टॉप ऑर्डर अवघ्या ४ षटकांत २० धावांवर बाद झाली. अभिषेक शर्मा ५, शुभमन गिल १२ आणि सूर्यकुमार यादव १ धाव काढून बाद झाले. पण, त्यानंतर तिलक वर्मा आणि संजू सॅमसनने ५७ धावांची भागीदारी केली. त्यानंतर संजू २४ धावांवर बाद झाला. पण, तिलकने संयम राखला आणि शिवम दुबेसोबत ६० धावांची भागीदारी करून सामन्याला कलाटणी दिली. दुबेने ३३ धावांची उत्कृष्ट खेळी केली. दुबे बाद झाल्यानंतरही तिलक क्रीजवर टिकून राहिला आणि ५३ चेंडूत ३ चौकार, ४ षटकारांच्या मदतीने नाबाद ६९* धावा करून भारताला विजय मिळवून दिला.

तिलक वर्मा आणि शिवम दुबेने हारिस रौफला धुतले

पाकिस्तानच्या गोलंदाजांनी या अंतिम सामन्यात जोर लावला. विशेषतः फहीम अशरफने ४ षटकांत २९ धावा देत ३ बळी घेतले. त्याच्याशिवाय शाहीन शाह आफ्रिदीने ४ षटकांत २० धावा देत १ बळी घेतला. अबरार अहमदने ४ षटकांत २९ धावा देत १ बळी घेतला. मात्र, या मोठ्या सामन्यात हारिस रौफला चांगलाच मार बसला आणि त्याने ३.४ षटकांत ५६ धावा दिल्या. त्याच्या खराब गोलंदाजीचा फटका पाकिस्तानला बसला.