भारतामध्ये सोने-चांदी खरेदीचे नवे नियम, 1 सप्टेंबरपासून बदलणार खरेदी प्रक्रिया

मुंबई- एका बाजूला आकाशाला भिडलेली सोन्याची किंमत आणि त्यातच सप्टेंबरपासून येत आहेत सोन्या-चांदीच्या खरेदीसंबंधी नवे नियम. आता या मौल्यवान धातूंची खरेदी करण्यासाठी भारतीय मानक ब्युरो (BIS) द्वारे ठरवलेले नियम पाळणे आवश्यक राहील.

सोन्या-चांदीच्या खरेदीत बदल

चालू वर्षी १ सप्टेंबरपासून चांदीच्या दागिन्यांवर हॉलमार्किंग बंधनकारक होणार आहे. BIS च्या या निर्णयामुळे सोन्या-चांदीची गुणवत्ता तपासणे आणि त्यात पारदर्शकता राखणे सोपे होईल. याशिवाय सोन्यासाठी वजन व उत्पादनाची छायाचित्र माहिती यांसह हॉलमार्किंग अनिवार्य केले जाणार आहे. हा ग्राहकांचा विश्वास वाढवणारा आणि बाजारात दर्जा व पारदर्शकता सुनिश्चित करणारा महत्त्वाचा टप्पा मानला जात आहे.

केंद्र सरकारची अधिसूचना

अलीकडेच केंद्र सरकारने ९ कॅरेट सोन्याच्या दागिन्यांसाठी हॉलमार्किंगबाबत अधिसूचना जाहीर केली असून दागिने उद्योगाने त्याचे स्वागत केले आहे. BIS ने दागिन्यांसाठी २४ कॅरेट, २३ कॅरेट, २२ कॅरेट, २० कॅरेट व १८ कॅरेट या प्रकारांत हॉलमार्किंगचे नियम लागू केले आहेत.

दागिने उद्योगाला नवी उभारी

या हॉलमार्किंगमुळे दागिने उद्योगाला नवसंजीवनी मिळाल्याचे मानले जाते. सध्या सोन्याचे भाव प्रचंड वाढल्याने अनेक ग्राहक खरेदीपासून दूर राहतात. सध्या ९ कॅरेट हॉलमार्क असलेल्या १० ग्रॅम सोन्याची किंमत सुमारे ₹३७,००० आहे, जी २४ कॅरेटच्या ₹९७,८२८ किंमतीच्या तुलनेत बरीच कमी आहे. ३% जीएसटीसह ९ कॅरेट सोन्याचे किरकोळ मूल्य प्रति १० ग्रॅम ₹३८,११० आहे.

ग्राहकांसाठी दिलासादायक निर्णय

केंद्र सरकारने ९ कॅरेट सोन्याच्या दागिन्यांना हॉलमार्कची मान्यता दिली असून BIS ला यासंदर्भात निर्देश जारी केले आहेत. याबाबत ग्राहक संरक्षण मंत्रालयाने अधिसूचना प्रसिद्ध केली आहे.

कमी किमतीत सुलभ खरेदी

९ कॅरेट हॉलमार्क सोन्याची किंमत तुलनेने कमी असल्याने ग्राहकांसाठी ही दिलासादायक बाब ठरते. देशांतर्गत बाजारात सोन्याचे भाव सातत्याने वाढत असताना हा निर्णय सर्वसामान्यांना परवडणाऱ्या दरात सोने खरेदी करण्याची संधी देणार आहे.