Mumbai Local Megablock: सावधान! रविवारी मुंबई लोकलचा 'महा-ब्लॉक'; महाशिवरात्रीला घराबाहेर पडण्यापूर्वी हे वेळापत्रक नक्की वाचा

Mumbai Local Megablock: रविवारी, मध्य, हार्बर, पश्चिम रेल्वे मार्गांवर तांत्रिक कामांसाठी मेगाब्लॉक जाहीर केला. या ब्लॉकमुळे अनेक लोकल फेऱ्या रद्द होतील, तर काही गाड्या विलंबाने धावतील. 

सावधान! रविवारी मुंबई लोकलचा 'महा-ब्लॉक'

मुंबई : सण असो वा उत्सव, मुंबईकरांची 'लाईफलाईन' समजली जाणारी लोकल सेवा तांत्रिक कामांसाठी विश्रांती घेणार आहे. मध्य, हार्बर आणि पश्चिम अशा तिन्ही मार्गांवर रविवारी मेगाब्लॉक जाहीर करण्यात आला आहे. रुळांची देखभाल, ओव्हरहेड वायर आणि सिग्नल यंत्रणेच्या दुरुस्तीसाठी हा ब्लॉक घेतला जाणार असल्याने अनेक लोकल फेऱ्या रद्द राहतील, तर काही विलंबाने धावतील. 

१. मध्य रेल्वे: जलद मार्गावर 'ब्रेक'

कुठे: माटुंगा ते मुलुंड (अप आणि डाऊन जलद मार्ग)

वेळ: सकाळी ११:०५ ते दुपारी ३:४५ पर्यंत.

परिणाम: सीएसएमटीवरून सुटणाऱ्या जलद लोकल माटुंगा ते मुलुंड दरम्यान धिम्या मार्गावर वळवण्यात येतील. यामुळे प्रवासाला नेहमीपेक्षा १५ ते २० मिनिटे अधिक वेळ लागू शकतो.

२. हार्बर मार्ग: कुर्ला-वाशी दरम्यान सेवा खंडित

कुठे: कुर्ला ते वाशी स्थानकांदरम्यान.

वेळ: सकाळी ११:१० ते दुपारी ४:१० पर्यंत.

परिणाम: सीएसएमटी ते वाशी/बेलापूर/पनवेल दरम्यानच्या फेऱ्या या काळात बंद राहतील. प्रवाशांच्या सोयीसाठी सीएसएमटी-कुर्ला आणि पनवेल-वाशी दरम्यान विशेष लोकल चालवल्या जातील. तसेच, हार्बरच्या प्रवाशांना ट्रान्स-हार्बर (ठाणे-वाशी/नेरुळ) मार्गे प्रवास करण्याची मुभा देण्यात आली आहे.

३. पश्चिम रेल्वे: बोरिवलीकडे जाणाऱ्या प्रवाशांचे हाल

कुठे: राम मंदिर ते बोरिवली स्थानकांदरम्यान.

वेळ: सकाळी १०:०० ते दुपारी २:०० पर्यंत.

परिणाम: बोरिवली ते अंधेरी दरम्यान सर्व जलद लोकल धिम्या मार्गावर चालवल्या जातील. काही फेऱ्या रद्द करण्यात आल्या असून, काही गाड्या केवळ गोरेगावपर्यंतच धावतील.

४. रात्रकालीन ब्लॉक (शनिवार रात्र)

विक्रोळी ते मुलुंड दरम्यान शनिवारी मध्यरात्री १:०५ ते पहाटे ४:३५ पर्यंत ब्लॉक असेल.

यामुळे शनिवारी रात्री १२:२४ ची ठाणे लोकल आणि रविवारी पहाटे ४:०४ ची सीएसएमटी लोकल रद्द राहील.

महत्त्वाची टीप

खारबाव येथे शनिवारी होणारा रात्रकालीन ब्लॉक रेल्वे प्रशासनाने रद्द केला आहे, त्यामुळे त्या मार्गावरील प्रवाशांना मोठा दिलासा मिळाला आहे.