मुंबई लोकलचा चेहरामोहरा बदलणार! १८ डब्यांची एसी लोकल ट्रॅकवर उतरण्यासाठी सज्ज; तुमचं स्टेशन या यादीत आहे का?

Mumbai Local : मुंबई रेल्वे विकास महामंडळ (MRVC) विरार-डहाणू मार्गावर प्रथमच १८ डब्यांच्या वातानुकूलित (AC) लोकलची प्रायोगिक चाचणी घेणार आहे. या ऐतिहासिक चाचणीमुळे भविष्यात लोकलची प्रवासी क्षमता वाढवून गर्दी कमी करण्याचे उद्दिष्ट आहे. 

आता विरार-डहाणू मार्गावर धावणार १८ डब्यांची 'मेगा' एसी लोकल

मुंबई : मुंबईकरांचा प्रवास अधिक सुखकर आणि गर्दीमुक्त करण्यासाठी रेल्वे प्रशासनाने एक ऐतिहासिक पाऊल उचलले आहे. मुंबई रेल्वे विकास महामंडळ (MRVC) प्रथमच १८ डब्यांच्या वातानुकूलित (AC) लोकलची प्रायोगिक चाचणी घेणार आहे. या निर्णयामुळे भविष्यात लोकलची प्रवासी क्षमता लक्षणीयरीत्या वाढणार असून गर्दीतून प्रवाशांना मोठा दिलासा मिळण्याची शक्यता आहे. 

विरार ते डहाणू मार्गावर 'शक्तीप्रदर्शन'

पश्चिम रेल्वेच्या विरार ते डहाणू या पट्ट्यात १४ आणि १५ जानेवारी २०२६ रोजी ही महत्त्वपूर्ण चाचणी पार पडणार आहे. सध्या मुंबईत १२ आणि १५ डब्यांच्या लोकल धावतात, मात्र १८ डब्यांच्या लोकलची चाचणी घेण्याची ही पहिलीच वेळ आहे. 

चाचणीतील मुख्य वैशिष्ट्ये

वेगवान प्रवास: बॉम्बार्डियर रॅकची ताशी ११० किमी, तर मेधा इलेक्ट्रिक्स रॅकची ताशी १०५ किमी वेगाने चाचणी घेतली जाईल.

तांत्रिक तपासणी: या चाचणीत ट्रेनची आपत्कालीन ब्रेकिंग सिस्टीम, डब्यांमधील कप्लर फोर्स (जोडणीची ताकद) आणि प्रवाशांच्या सुरक्षिततेच्या निकषांची कसून तपासणी केली जाणार आहे.

आधुनिक सिस्टीम: या लोकलमध्ये ३-फेज प्रोपल्शन सिस्टीमचा वापर करण्यात आला आहे, ज्यामुळे ट्रेनची कार्यक्षमता वाढते. 

कधी सुरू होणार नियमित सेवा?

रेल्वे अधिकाऱ्यांनी स्पष्ट केले आहे की, ही सध्या केवळ एक 'प्रायोगिक चाचणी' आहे. मुंबई शहरी वाहतूक प्रकल्पांतर्गत (MUTP) २१ हजार कोटी रुपये खर्चून सुमारे २,८५६ नवीन कोच खरेदी करण्याची योजना आहे. रेल्वे स्थानकांतील प्लॅटफॉर्मची लांबी वाढवणे आणि इतर पायाभूत सुविधा पूर्ण झाल्यानंतरच या १८ डब्यांच्या एसी लोकल प्रवाशांच्या सेवेत नियमितपणे दाखल होतील. 

कमी फेऱ्यांत जास्त प्रवाशांची वाहतूक करणे शक्य होणार

या प्रयोगामुळे भविष्यात मुंबई लोकलच्या प्रवासाचे चित्र पूर्णपणे बदलणार असून, कमी फेऱ्यांत जास्त प्रवाशांची वाहतूक करणे शक्य होणार आहे.