मालाडमधील हॉटेलमध्ये उंदरांचा सुळसुळाट, FDA ने परवानाच केला निलंबित
सार
मुंबईच्या मालाडमधील एका हॉटेलमध्ये अन्न आणि औषध प्रशासनाने (FDA) केलेल्या तपासणीत धक्कादायक प्रकार समोर आला आहे.
मुंबई : अन्न आणि औषध प्रशासनाने (FDA) मुंबईतील मालाडमधील एका हॉटेलचा परवाना निलंबित केला आहे. तपासणीदरम्यान या हॉटेलमध्ये अत्यंत अस्वच्छ परिस्थिती, मोठ्या प्रमाणात उंदरांचा वावर आणि अन्न सुरक्षा नियमांचे सर्रास उल्लंघन होत असल्याचे आढळून आले. अन्न सुरक्षा अधिकाऱ्यांनी ७ ऑगस्ट रोजी मालाड (पश्चिम) येथील रामचंद्र लेनमधील सर्वोदय भुवन इमारतीत असलेल्या या हॉटेलची पाहणी केली होती.
तपासणीत आढळल्या अनेक गंभीर त्रुटी
तपासणीदरम्यान अधिकाऱ्यांना अनेक धक्कादायक गोष्टी आढळल्या. अन्नपदार्थ अयोग्य पद्धतीने साठवले होते, काही पदार्थ तर थेट जमिनीवर आणि घाणेरड्या रॅकमध्ये ठेवले होते. कोल्ड-स्टोरेजची स्वच्छताही व्यवस्थित नव्हती. तसेच, मुदत संपलेले (expired) आणि खराब पॅकेजिंग असलेले पदार्थही तिथे सापडले.याशिवाय, कीटक आणि उंदीर नियंत्रणासाठी कोणतीही प्रभावी उपाययोजना नव्हती. कचरा व्यवस्थापनही योग्य प्रकारे होत नव्हते. हॉटेलमधील कर्मचाऱ्यांच्या वैद्यकीय तपासणीची आणि आरोग्याशी संबंधित कागदपत्रांची कोणतीही नोंद ठेवली जात नव्हती.
भाजीपाल्याच्या साठ्यात उंदरांचा सुळसुळाट
सर्वात मोठी चिंताजनक बाब म्हणजे भाजीपाला आणि फळे ठेवण्याच्या जागेत मोठ्या प्रमाणात उंदीर आढळून आले. यामुळे अन्नपदार्थ दूषित होण्याचा मोठा धोका निर्माण झाला होता.
कायदेशीर कारवाई
या सर्व गंभीर प्रकारांमुळे, अन्न सुरक्षा आणि मानक कायदा, २००६ च्या कलम ३२(३) आणि अन्न सुरक्षा आणि मानक (अन्न व्यवसायांचे परवाना आणि नोंदणी) नियम, २०११ च्या संबंधित तरतुदींनुसार कारवाई करण्यात आली आहे. हॉटेलचा परवाना २७ जुलै, २०२६ पासून पुढील आदेशापर्यंत तात्काळ निलंबित करण्यात आला आहे. निलंबन काळात या युनिटला अन्नपदार्थांची विक्री, वितरण किंवा कोणताही खाद्य व्यवसाय करण्यास मनाई करण्यात आली आहे. या काळात हॉटेल सुरू असल्याचे आढळल्यास कडक कायदेशीर कारवाई केली जाईल, असा इशाराही एफडीएने दिला आहे.