मुंबईतील परवानाधारक फेरीवाल्यांना मोठा दिलासा; फुटपाथवर व्यवसायाला मुभा

मुंबईतील परवानाधारक फेरीवाल्यांना फुटपाथवर व्यवसाय करण्याची मुभा देण्यात आली आहे. पण महापालिकेने यासाठी देखील एक अट घातली आहे.

मुंबई : मुंबई महापालिकेच्या अतिक्रमणविरोधी कारवाईवरून सर्वपक्षीय नगरसेवकांनी टीका केली होती. यानंतर आता महापालिका आयुक्त अश्विनी भिडे यांनी परवानाधारक फेरीवाल्यांबाबत महत्त्वाची भूमिका स्पष्ट केली आहे. क्यूआर कोड असलेल्या ओळखपत्रांसह परवाना मिळालेल्या फेरीवाल्यांना फुटपाथवर व्यवसाय करता येणार आहे.

महापालिकेच्या ‘Pedestrian First’ मोहिमेच्या अंमलबजावणीचा आढावा घेण्यासाठी अश्विनी भिडे आणि अधिकाऱ्यांच्या पथकाने दक्षिण मुंबईतील विविध भागांची तीन तासांहून अधिक वेळ पाहणी केली. या पाहणीदरम्यान त्यांनी काही फेरीवाल्यांचे परवाने तपासले आणि नियमांचे पालन करण्याच्या सूचना दिल्या आहेत.

परवान्यात नमूद केलेल्या जागेतच व्यवसाय करावा

परवानाधारक फेरीवाल्यांनी त्यांच्या परवान्यामध्ये नमूद केलेल्या जागेच्या मर्यादेतच व्यवसाय करावा, असे भिडे यांनी स्पष्ट केले. परवान्यात दिलेल्या जागेपेक्षा अधिक क्षेत्रफळावर अतिक्रमण करणाऱ्या फेरीवाल्यांवर कारवाई करण्याचे निर्देश त्यांनी परवाना विभागाला दिले आहेत. महापालिका अधिकाऱ्यांनी स्पष्ट केले की, ही कारवाई केवळ अतिक्रमण करणाऱ्या किंवा अनधिकृत फेरीवाल्यांविरोधातच केली जात आहे. ही भूमिका नगरसेवकांनी केलेल्या अलीकडील टीकेच्या पार्श्वभूमीवर घेतलेली नसल्याचेही अधिकाऱ्यांनी सांगितले.

अतिक्रमणविरोधी मोहीम सुरूच राहण्याची अपेक्षा

लोकंधवाला-ओशिवरा सिटिझन्स फोरमचे सदस्य धवल शाह यांनी महापालिकेची अतिक्रमणविरोधी मोहीम दबावामुळे कमी होऊ नये किंवा थांबवू नये, अशी अपेक्षा व्यक्त केली. या मोहिमेमुळे अनधिकृत फेरीवाल्यांमध्ये काही प्रमाणात भीती निर्माण झाली आहे. याशिवाय फुटपाथवरील अतिक्रमणाच्या समस्येवर उपाय करण्यास मदत होत असल्याचे त्यांनी सांगितले.

सर्व वॉर्डमध्ये मोहीम राबवण्याची मागणी

चेंबूरमधील रहिवासी कला सुरेश यांनी ही मोहीम मुंबईतील सर्व वॉर्डमध्ये राबवण्याची अपेक्षा व्यक्त केली. व्ही. एन. पुरव मार्गावरील ७वा रोड ते डी. के. संधू मार्गादरम्यान फुटपाथवर अतिक्रमण झाल्याची तक्रार एम-वेस्ट वॉर्डकडे करण्यात आली आहे. मात्र, अद्याप त्यावर कारवाई झालेली नसल्याचे त्यांनी सांगितले.

फुटपाथ अधिक सुरक्षित आणि सुटसुटीत करण्याचे निर्देश

पाहणीदरम्यान भिडे यांनी अधिकाऱ्यांना फुटपाथची सुधारणा, सुशोभीकरण आणि सुरक्षितता वाढवण्याच्या सूचना दिल्या. फुटपाथवरुन चालणाऱ्यांना बदल स्पष्टपणे जाणवतील, अशा पद्धतीने सर्व प्रकारचे अडथळे दूर करण्याचे निर्देश देण्यात आले. तसेच फुटपाथवरील झाडांच्या मुळांचे संरक्षण करावे आणि आवश्यकतेनुसार फांद्यांची योग्य पद्धतीने छाटणी करावी, असेही त्यांनी सांगितले. धोकादायक झाडे निश्चित प्रक्रियेनुसार आणि शास्त्रीय पद्धतीने हटवावीत, अशा सूचनाही अधिकाऱ्यांना देण्यात आल्या.