FDA Fine : हायकोर्टाचा FDA ला दणका, पुणेकराला ५ लाखांची भरपाई; नेमकं काय घडलं?

पुण्यातील एका मिठाई दुकानाचा परवाना रद्द करणं अन्न आणि औषध प्रशासनाला (FDA) चांगलंच महागात पडलं आहे. नियमांचं पालन करूनही परवाना निलंबित ठेवल्याबद्दल मुंबई हायकोर्टाने FDA ला ५ लाख रुपयांचा दंड ठोठावला आहे.

मुंबई : मुंबई हायकोर्टाने महाराष्ट्र अन्न आणि औषध प्रशासनाला (FDA) चांगलाच दणका दिला आहे. पुण्यातील एका मिठाई दुकानाला ५ लाख रुपये देण्याचे आदेश हायकोर्टाने FDA ला दिले आहेत. या दुकानाने अन्न सुरक्षेचे सर्व नियम पाळले होते, तरीही FDA ने दुकानाचा परवाना निलंबित ठेवला होता. यावर कोर्टाने प्रश्नचिन्ह उपस्थित केलं.

या दुकानाचा परवाना १२ जून रोजी निलंबित करण्यात आला होता. तपासणीत स्वच्छता आणि इतर काही त्रुटी आढळल्या होत्या. त्यानंतर दुकान मालकाने सर्व त्रुटी दूर करून तसा अहवाल सादर केला. १३ जुलै रोजी झालेल्या पुन्हा तपासणीत ३६ पैकी ३५ नियम पाळले गेल्याचं दिसलं, म्हणजेच ९८ टक्के नियमांचं पालन झालं होतं. तरीही परवाना निलंबितच ठेवल्याने कोर्टाने ही कारवाई बाजूला ठेवली आणि दुकान पुन्हा सुरू करण्याची परवानगी दिली. तसेच, ३० दिवसांच्या आत ५ लाख रुपये देण्याचे आदेश FDA ला दिले.

राज्यभरात FDA ची मोठी कारवाई

दुसरीकडे, १३ ऑगस्ट रोजी FDA ने राज्यभरात ऑनलाइन फूड डिलिव्हरी प्लॅटफॉर्मवरून खाद्यपदार्थ विकणाऱ्या आस्थापनांवर विशेष तपासणी मोहीम राबवली. यात एकूण ८६ आस्थापनांची तपासणी करण्यात आली. या कारवाईत एका आस्थापनेला तात्काळ व्यवसाय बंद करण्याचे आदेश देण्यात आले, तर ६० जणांना सुधारणा नोटीस बजावण्यात आली. १४ अन्न व्यवसाय परवाने तात्काळ निलंबित करण्यात आल्याची माहिती एका अधिकृत पत्रकात देण्यात आली आहे.

दुग्धजन्य पदार्थांवरही कारवाई

या राज्यव्यापी तपासणी मोहिमेदरम्यान FDA ने दूध आणि दुग्धजन्य पदार्थांवरही कारवाई केली. यात ३४,३०२ रुपये किमतीचा एकूण ६९८ किलो दुग्धजन्य पदार्थांचा साठा जप्त करण्यात आला.

गुटखा, पान मसाल्याप्रकरणी FIR दाखल

विभागाने पान मसाला आणि गुटख्यासारख्या प्रतिबंधित खाद्यपदार्थांची विक्री, वितरण आणि वाहतूक करणाऱ्या प्रकरणांमध्ये १० एफआयआर (FIR) देखील दाखल केले आहेत. या प्रकरणांमध्ये नऊ जणांना अटक करण्यात आली असून ४६,७६,६३१ रुपये किमतीचा साठा जप्त करण्यात आल्याची माहिती पत्रकात दिली आहे.

व्यापक तपासणी आणि जप्ती

याशिवाय दूध, दुग्धजन्य पदार्थ, बेकरी पदार्थ आणि खाद्यतेल यांसारखे सुमारे १,२७० किलो इतर खाद्यपदार्थ जप्त करण्यात आले, ज्यांची किंमत अंदाजे १,२९,७६२ रुपये आहे.FDA ने १०९ हॉटेल्स, रेस्टॉरंट्स, धाबे आणि इतर आस्थापनांचीही तपासणी केली. ४९ आस्थापनांना सुधारणा नोटीस बजावण्यात आली, तर चार अन्न आस्थापनांचे परवाने निलंबित करण्यात आले. (ANI)