Gautam Singhania Accident : रेमंड समूहाचे अध्यक्ष गौतम सिंघानीया मालदीवमधील स्पीडबोट अपघातात जखमी; मुंबईत उपचार सुरू

Gautam Singhania Accident : रेमंड समूहाचे अध्यक्ष गौतम सिंघानिया मालदीवमध्ये स्पीडबोट अपघातात जखमी झाले असून त्यांच्यावर मुंबईत उपचार सुरू आहेत. या अपघातात काही पर्यटक बेपत्ता असून शोधकार्य सुरू आहे.

Gautam Singhania Accident : रेमंड समूहाचे अध्यक्ष आणि व्यवस्थापकीय संचालक गौतम सिंघानिया यांना मालदीवमध्ये झालेल्या स्पीडबोट अपघातात किरकोळ दुखापत झाली आहे. या घटनेनंतर त्यांना मुंबईत आणून उपचार सुरू करण्यात आले असून त्यांची प्रकृती स्थिर असल्याची माहिती समोर आली आहे.

कसा झाला अपघात?

मालदीवमध्ये शुक्रवारी पहाटे ‘व्ही फेलिधू’ परिसरात पर्यटकांना घेऊन जाणारी स्पीडबोट अचानक उलटली. या बोटीत एकूण सात जण होते. त्यात यूके आणि रशियातील दोन महिला तसेच भारतातील पाच पुरुषांचा समावेश होता. अपघातात पाच जण समुद्रात वाहून गेले असून त्यात रशियातील एक महिला आणि भारतातील चार पुरुषांचा समावेश आहे.

सिंघानिया यांची सुखरूप सुटका

या अपघातात गौतम सिंघानिया हे देखील उपस्थित होते. त्यांची सुखरूप सुटका करण्यात आली असून त्यांना किरकोळ दुखापत झाली आहे. त्यांच्या प्रवक्त्यांनी या घटनेची पुष्टी करत ते सध्या मुंबईत उपचार घेत असल्याचे सांगितले.

बेपत्ता पर्यटकांचा शोध सुरू

या अपघातानंतर काही पर्यटक बेपत्ता असल्याची माहिती समोर आली आहे. रॅली चालक हरी सिंग यांच्यासह आणखी दोन भारतीय नागरिकांचा शोध सुरू आहे. स्थानिक प्रशासनाकडून शोधमोहीम वेगाने राबवली जात आहे.

प्रकृती स्थिर, मुंबईत उपचार

सिंघानिया यांना दक्षिण मुंबईतील ब्रीच कँडी हॉस्पिटल येथे दाखल करण्यात आले आहे. सूत्रांच्या माहितीनुसार, त्यांना काही ओरखडे आणि किरकोळ दुखापती झाल्या असून सध्या त्यांची प्रकृती धोक्याबाहेर आहे.

व्यवसाय आणि संपत्ती

गौतम सिंघानिया हे अ‍ॅडव्हेंचर स्पोर्ट्सचे शौकीन म्हणून ओळखले जातात. रेमंड समूहाचा व्यवसाय वस्त्रोद्योग, रिअल इस्टेट, इंजिनिअरिंग आणि कन्झ्युमर केअर क्षेत्रात विस्तारलेला आहे. त्यांच्या एकूण संपत्तीचा अंदाज ११,००० कोटी रुपयांहून अधिक आहे.

वैयक्तिक आयुष्यही चर्चेत

सिंघानिया यांचे वडिलांशी मालमत्ता आणि व्यवसायावरून झालेले वाद तसेच पत्नी नवाज मोदी सिंघानिा यांच्यासोबतचे संबंध यामुळे ते अनेकदा चर्चेत राहिले आहेत.